Sawrkar-in Olympian Lalremsiami chawimawina hun hmang

# Lalremsiami tan sawrkarin inhmun leh lawmpuina pe
# Lalremsiami'n CM Relief Fund-ah sum hlan; Hockey Mizoram tan tanpuina hlan

Aizawl | August 26, 2021: Mizo Olympian Hockey Player Lalremsiami Tokyo Olynmpic 2020 a tel avangan chawimawina vawiin khan Mizoram sawrkar chuan Vanapa Hall-ah a buatsaih a. Chief Minister Pu Zoramthanga, Deputy Chief Minister Pu Tawnluia ten an telpui a ni.


Lalremsiami chuan sawrkar, pawl leh mipui ten an lawmpuina chungah lawmthu sawiin, vawiina amah chawimawina hun buatsaih chuan a kal zelna turah phurna nasa tak a pek thu a sawi a. Tun hi a tawpna tur a nih loh a beisei thu sawiin, amah lawmpuina thilpek hrang hrang chungah lawmthu a sawi bawk. Lalremsiami chuan hockey a khelh tan tirh dan te, academy a lut a, India team a tel dan leh Olympic Games a tel thei tura a kalkawngte sawiin, a thalai puite chu thil engkimah Pathian rawn chunga hma la thin turin a chah a. A bik takin infiammi te tan phei chuan mahni hriselna ngaipawimawh a, zuk leh hmuam laka fihlim a pawimawh thu te a sawi a ni.


Lalremsiami hian Chief Minister's Relief Fund-ah tanpuina sum pe in Chief Minister hnenah hian a hlan nghal a; Hockey Mizoram hnenah tanpuina sumfai a pe bawk.


Chief Minister Pu Zoramthanga chuan Mizoram Olympian a nei belh ta chu ropui tiin Lalremsiami chu a lawmpui thu a sawi a. Infiammna discipline hrang hranga hmasawnna siam tura sawrkarin hma a laknaah a ruhrel, infrastructure chu thil pawimawh tak a nih avangin hockey tihhmasawna zel tur chuan hockey field neih tam te a pawimawh thu a sawi a. Tuna Lalremsiami hlawhtlinna hian hockey a tui tharna leh hmasawnna thalaiah a thlen ngei a rin thu a sawi a. Aizawla hockey ground tha nei tura hma lak a nih tur thu a sawi.


Pu Zoramthanga chuan infiammi te tan an thiamna leh talent a pawimawh rualin mahni taksa inthunun theihna a pawimawh hmasak thu sawi telin, taksa tichhe thei thil- zu leh ruihhlo, zuk leh hmuam leh thil dangte chu an nih tur ang an ni theilo a siamtu a nih thin avangin mahni inthunun theihna nun nei turin infiammite a chah nghal a ni.

Mizoram sawrkarin Lelremsiami chu Olympic a tel tura thlan a nih avanga lawmpuina leh amah tihphurna tur atan cheng nuai 25 pek nise tia a lo rel tawh chu games tan hma khan cheng nuai 10 pek a ni a. Vawiin khan a bang cheng nuai 15 chu Chief Minister chuan a kutah a hlan a ni.


Deputy Chief Minister Pu Tawnluia chuan Lalremsiami chu harsatna hrang hrang paltlanga beidawng lova tun dinhmun a thleng hi ngaihsanawm tiin, thalai dangte tan amah atang hian zir tur tam tak a awm thu a sawi a. Mizoram sawrkar chuan khawvela infiamna langsar ber zinga ami pakhata tha taka khel thei Mizo nula a nei chu lawmawm tiin, ama tan thil tam tak tih a duh laiin tih theih chin, amah duhsakna leh chawimawin nan Sports & Youth ServicesDepartment hnuaiah ama bilin Chief Coach (Hockey) chuan a siam belh thu a sawi a.

Deputy Chief Minister hian Lalremsiami hnenah hian Chief Coach atana ruatna Appointment letter chu a hlan nghal a ni.

P&E Minister Pu R. Lalzirliana chuan sawrkarin Lalremsiami chawimawina atana Kolasiba inhmun a pek chu he hunah hian a hlan a. A taimakna chu fakawm tiin a kal zelna tura a duhsakna thu a sawi a. Hockey lama hmasawnna ruhrel lo din hmasa tute thahnemngaina chu Lalremsiami hian ama taimakna bakah a seng tel nia a hria thu a sawi a. Hmana Mizo ten Hockey kan lo tuipui tawh thin chu tharthawh a nih leh theih nan hockey ground changtlung tak neih belh zel pawimawhna a sawi bawk.


Sports & Youth Services Minister Pu Robert Romawia Royte chuan he hunah hian Lalremsiami a lawmpui thu a sawi bawk a. Amah lawmpuina atana supernumerary post siam chu amah ah a bet, a zawmlo a nih chuanin emaw, a zawm hnu ah pawh thildang avanga a chhuahsan leh a ngai a nih pawha tawp leh mai tur a nih thu a sawifiah a; midang kaisanna tur pawh a dal loh thu a sawi. Amah chawimawina leh lawmpuina atana sawrkarin a tih theih chin te hi hockey-ah a aia sang zawk a thlen theihna tura ruahman, ama tawpna tur a nih loh thu a sawi bawk.


Vawiina Lalremsiami chawimawina hunah hian Imphal, Manipur-a SAI NERC Deputy Director Pu Lianminthang pawhin thu sawiin, Mizoram sawrkarin sports tihhmasawn a ngaihpawimawhna chu fakawm a tih thu te, sawrkarna chang tawh phawt chuan thahnem an ngaih vek zel thin nia a hmuh thu a sawi.

Vawiin inkhawmah hian Lalremsiami Olympic zin kawng documentary tawi thlir ho a ni a. Mimal leh pawl hrang hrang atanga lawmpuina thilpek hlanna hun hman a ni bawk.


Chief Secretary Pu Lalnunmawia Chuaungo chuan vawiin hun hi kaihruaiin, Minister leh MLA thenkhat te, sawrkara hotu pawimawh te leh sports association hrang hrang aiawhte an tel a. SEDP Board Vice Chairman (Youth Affairs and Sports Board) Pu TC Pachhunga chuan lawmthu sawiin hun a khar a ni.

Post a Comment

0 Comments