Mizoram Departmental Officer-ten ram leh hnam chhan nana a inpekna vangin Chief secretary Lalnunmawia Chuaungo chawimawina hlan


Aizawl | August 26, 2021: Mizoram Chief secretary Pu Lalnunmawia Chuaungo, IAS chu Mizoram sawrkara dinhmun hrang hrang, Principal Secretary Home & Finance, leh tuna Chief Secretary hna chelha a thawhna ah mahni tana pawi tur pawh ngaihtuah lova, a theihna zawng zawng senga ram leh hnam chhan nan a beih thinna avangin Mizoram Departmental Officers Association(MDOA) chuan vawiin khan a office ah chawimawina, Thuchei, Tawlhloh Puan leh Thangchhuah Diar an hlan a ni.


Pu Lalnunmawia chuan MDOA ten ram tana a hnathawhte hriatsak a, chawimawina an hlan chu lawmawm a tih rualin phu lo a intih thu a sawi a. Mizoram sawrkar hnuaiah officer fel leh rintlak tak tak, khawi hmun ah mah zahpuiawm bik lo tur tam tak an awm nia a hmuh thu sawiin Pu Lalnunmawia chuan “Mizo te hi kan tih tak tak chuan hnam dangte aiin kan nep bik lo a ni”, a ti a. Kum 2018 Mizoram State Assembly inthlan hmaa Mizoram atanga sawn chhuah a nih chungchang ah Bru raltlan te Electoral Rolla thun tuma hmalakna leh, vote an thlak theihna tura a bika ruahmanna siam tumna dodal a, Union Home Secretary hova meeting ah Mizoram sawrkar ngaihdan dik tak a present avanga Mizorama atanga sawn chhuah tawk nia a inhriat thu a sawi a. Bru te chu engtik lai mahin Mizorama indigenous people a chhiar tel an nih ngai loh thu leh kum 1951 chhiarpui ah pawh Bru tawng hmang mi 51 chauh an awm thu te, Mizo te hlauh vang ni lovin anmahni duh thu ngeia Mizoram chhuahsan an nih thu leh kum 20 vel zet Mizorama an awm tawh loh avangin Mizoram khua leh tui anga vote nei thei an nih tawh loh thu te, Mizorama vote an thlakna tura a bika ruahmanna siamsak tur an nih loh thu te a sawi chhuak tih Pu Lalnunmawia chuan a sawi a. Tunhnaia Assam nena ramria buaina chungchang ah leh sawrkar inenkawlna kalphungah pawh ram leh hnam thatna tura thahnem ngaihna avangin tawngkam hriam leh dawnsawn nuam lo chhakchhuah a lo neih thin pawhin thahnem ngaihna vang a ni tih pawmsak a, hrethiam turin a ngen bawk a ni.


Chief Secretary chawimawina hun hi MDOA President Pu Lalchuailova, Dy.Director Art & Culture in a kaihruai a. MDOA Senior Adviser Dr.C.Lalzirliana, State Information Commissioner, leh MDOA hruaitute bakah MDOA Executive Commitee member te an tel a ni. He hunah hian MDOA Vice President 2- Pu C.Vanlalchhuana Dy.Commissioner, Taxation Department leh Dr.J.TVanlalngheta,Joint Director, LES&DE ten thu sawina hun an hmang a. Kum 2018 a Hnam Hnathlang ropui tak Mizoramin a neihna chhan leh Assam nena ramri buaina chungchang ah pawh Chief Secretary Pu Lalnunmawia chu ram leh hnam himna tura Mizoram sawrkar aiawha huaisen taka ding a, hma la thin a nih thu an tarlang a ni.

Post a Comment

0 Comments