LAWMNA NEN NI TIN BUL ṬAN RAWH

- Rick Warren

- 17 August, 2021



“Thilpêk ṭha leh thilpêk famkim zawng zawng chu, chunglam aṭangin êngte Pa hnen ata a lo chhuk ṭhin a ni, amahah chuan danglamna leh herna hlim rêng rêng a awm thei lo.” Jakoba 1:17.

Mithiamte chuan nilenga i rilru put hmang tur chu i thawh hlim aṭanga minute riat chhungin a in siam ṭhin an ti a ni. Nilenga phun nawi, lungawi lo leh ngui bura awm i duh em? Nge hlim taka awm i duh zawk? 

Kan Bible chuan “Thilpêk ṭha leh thilpêk famkim zawng zawng chu, chunglam aṭangin êngte Pa hnen ata a lo chhuk ṭhin a ni, amahah chuan danglamna leh herna hlim rêng rêng a awm thei lo” a ti. Jakoba 1:17.

I lawmna chuan i mamawh zawng zawng neitu i Pa nangmah hmangaihtu hnen lam chu a hawitir thei ang che.  

Ni thar chu inpuanna emaw ngenna emaw neiin bul ṭan suh la. Lawmna nen bul ṭan zawk rawh. Pathian leh a ṭhatna chu ngaihtuah la. Pathian, i pa chu a ṭhat zia hrilh la, a duhsakna, nelawmna leh a pangngai rengna avang tein lawmthu hrilh ang che. I tana a ṭhatna te kha han sawi chhuak teh le. I lawmna te chu han hrilh teh le: tui in tur, mut bu leh khum, khaw vawh laia in lum nuam tak leh khaw lum lai pawha in dai nuam tak avang te in. Thudik tak i sawi avang chuan hrehawm ti suh. I rilru a awm leh i vei zawng te chu sawi chhuak mai rawh.  

Lawmna nena ni thar i ṭan theihna tur kawng khat chu hla i ngaihthlak tur thlang chhuak la. Lawmthu sawina lam hla te, Pathian chu tunge a nih tih hriattir nawn thei tur che leh Pathianin i tana a thil tih sakte tarlanna lam hla thlang bawk la. I thawh rual rualin ngaithla nghal la, tichuan i rilrua thu awm hmasa ber chu lawmna lam a ni ang. Chawimawina nena thawh hi a ṭha ber a ni.

A dang lehah chuan i lawmna te chu ziak chhuakin i khum bulah emaw fianrial hun i hman ṭhinnaah emaw i dah thei ang. Lawmthu sawina thil i ziah chhuah te chuan Pathian ṭhatna lam hawitir chein, i thinlung chu ama lamah chuan lawmthu sawiin i luangliam thei ang.  

Tuktina i harh apianga, i thil tih hmasak ber chu tawp lova a hmangaih avang che a Pathian hnena lawmthu sawina leh kawng eng kima i tana a ṭhatna i hriatchhuah fona lo ni ngei rawh se. 

Lawmna nen tho chhuak la. I nileng hun hman tur chu a thlak danglam vek ang!

Han ngaihtuah la

Lawmna nena ni thar i hman theih nana i bul ṭan theih leh a taka i chhunzawm zel theih tur thil dang eng te nge ni ang?

Lawmna nena bul i ṭan hian i nileng hun hmanah engtiangin nge awmzia a neih le? 

Hun kaltaa Pathian ṭhatzia i hriatchhuah khan thlamuanna a pe chein, chu chuan i nitin nun hman danah engnge awmzia a neih le?

[Lettu: Sangpuia]

Post a Comment

0 Comments