KRAWS AVANGIN KAN ṬAWNGṬAI THEI

- Rick Warren

- 11 August, 2021

“Ama Fapa ngei pawh zuah lova kan zaa aia petu chuan, thil zawng zawng pawh a thlawnin min pe tel lo vang em ni.” Rom 8:32.

Pathian chu a ṭhat em avangin amah ai pawhin i ṭhatna a dah lian a ni. 

Hei hi Chanchin ṭha chu a ni – Lal chu a mipuite tan a inhlan a ni. Thawnthuah chuan, khua leh tui te chu lal tan an thi a, eng pawh huamin an lal an venghim ṭhin a ni. Khawvelah hian Lal a mipuite tana nunna hlan chanchin pakhat chiah a awma a. Chu chu Chanchin ṭha hi a ni.

Kristian sakhuaah hian sakhaw dang reng rengin a an neih ve loh chanchin danglam tak a awm a ni. Pathian chuan i sual avangin hrem hmabak i ni min ti a. Mahse chu chu chanchin tawpna a la ni lo. Beiseina kan neih thu Rom 6:23-ah Bible-in min hrilh a, “Sual man chu thihna a ni si a; Pathian thilthlawnpek erawh chu, kan Lalpa Krista Isua zarah chuan chatuana nunna a ni.”  

Hemi awmzia chu, Pathian chu mi dik tak a nih avangin, mi tu emawin a man an pek a ngai a ni. Ani chu Pathian ṭha leh Pathian Thianghlim a ni a, a hmangaih che a, chuvang chuan chhandam i nih theih nan ruahmanna a siam a ni. He leiah Pathian Fapa, Isua Krista anga lo kalin, i sualna avangin a thi a ni. Hei hi a ni hmangaihna puanchhuahna tawpkhawk chu – Lal chu mipuite tan a thi a, Berampu chu a beramte tan a thi a ni.

Pathian chauh lo chuan tuman i sual man pek an duh lovang. Isua kha Rom sawrkar avanga kraws a thi a ni lo. Hmangaihna avangin a thi a ni. A hmangaih em che avangin i tan thih a inhuam a, a ni chu Pathian ṭha leh zahngai thei tak a nih avangin.

Kraws a Pathian thil tih avang chuan ṭawngṭai thei dinhmunah kan ding ta a ni.

“Ama Fapa ngei pawh zuah lova kan zaa aia petu chuan, thil zawng zawng pawh a thlawnin min pe tel lo vang em ni.” Rom 8:32.

Isua Krista chu i tana Kraws a a thih avang khan, i harsatna lian ber chu tihkianin a lo awm ta a ni. I nuna lo thleng harsatna dang zawng zawng te chu atan chuan thilte tham te a ni ta! Thi khawp hiala Pathianin a hmangaih che avang chuan, a ṭhatna avang vek chuan, i bill te, i hriselna te leh inlaichinna chungchanga i  harsatna te chu a puih che i ring lovem ni? Pathian tan chuan engmah thil lian lua a awm lo. Chutiang chiah chuan Pathian hnena kan vei zawng kan thlen tur te chu te lua a awm lo a ni.

Ṭawngṭainaah chuan engmah Pathian hnena i thlen theih loh a awm lo. Thi khawp hialin a hmangaih che a, chuvangin i ṭawngṭaina te pawh chhang turin a hmangaih tawk che a ni.  

Han ngaihtuah la

Thil lian lua emaw te lua emaw i tih avanga ṭawngṭaia Pathian hnena i thlen ngam loh thil eng nge ni?

Isuan krawsah i harsatna lian ber a tih kian sak che a ni tih i hriat khan, chu chuan engtin nge i ṭawngṭai dan kal hmang a thlak sak che le? 

Pathianin a chhandam che tih i ring tawh a, vawiinah hian eng nge Pathiana rinna nghah tur i neih le?

[Lettu: Sangpuia]