KHAW NGE AN AWM ZAWH TAK?


Veng pakhatah chuan covid 19 positive avanga ZMC ICU a enkawl lai mek a awm. An in chhungah chhungkaw pa, eizawngtu a ni. A enkawlna senso chu nuai 2 chunglam daih a ni dawn. Ni tina inhlawhfa chawp an ni mai si a, lockdown rei tawh nen, pawisa an nei tawh lo. Engpawh tawk se la, tuna a chhungte lu ti haitu chu  damdawi in awmna bill pek tur hi a ni.


Vaccine a la lo va, adhaar card an nei lo. Vaccine chu lo la se hetiang teh hrep hian he hri hi a la na lo mai thei. Healthcare ah chuan inziak lut se a enkawlna bill hi eng nge maw chen chu hmuh lêt leh theih dan a awm ang. A engamah an lo ti si lo. A chhungkhat laina zingah a sing tel tal pawh han theh chhuak thei an awm lo va. A awmna bill rawn chhuak tur hi an huphurh ngawih ngawih ta mai.  Nunna a hlu si a, ICU a inenkawl lai, sum neih loh vanga han in pawh chhuah ngawt thu awm si lo.
Covid 19 hripuiin min han nuai tak taka, engtianga na in nge min la nuai dawn lah a hriat der si loh. Hetiang anga harsatna tawk chhungkua hi tam tak an awm tawh a, an awm mek a, an la awm zel dawn chu a ni si a. Ava manganthlak ta ve le!! He kan hri hian vaccine la leh la lo, healthcare a inziak lut leh ziak lut lo lah a thliar der si lo.

A nih, aadhaar card hlau tura rawn fuihtu, vaccine la lo tura inti fing taka rawn campaign tu, ration  card leh healthcare a hming inziah luh pawh hlauhawm chhuaha rawn chhuahpuitute kha khawnge an awm tak ? Hei chhungkua an rûm anih hi. Anmahni avanga chhungkua leh mimalin harsatna an tawh zozai hi an rawn hmu em ? Hetianga mi thluak su a thahnem rawn ngaitute hian an harsatna ah eng chen nge an rawn țan ve dawn le?

Bible zirtirna tluang pangngai kal pela mi tih țhaih a, Kohhran zirtirna ngil tak laka mite hruai kawi a. Hlauh tur zawnga mi harsa zawk leh an aia mawl zawk te rawn luh chhuah a, an thluak rawn suk sak a. Sorkarin a ram mite tana țha tura a buatsaih dodaltute hian heng hripui leng karah hian an zirtirna awiha tuartute tan hian eng chen nge an rawn pen chhuah ve dawn le?

Post a Comment

0 Comments