I HMALAM HUN I HMU THEI LO MAW? PATHIANAH INNGHAT RAWH

- Rick Warren

- 26 August, 2021

“Thuhnuairawlhte chu rorelna felah a hruai anga; thuhnuairawlhte chu ama kawng chanchin a zirtir bawk ang". Sam 25:9.

Bible chuan Pathian kaihhruaina dawng turin kawng hranga tih ngai a sawia, mahse thil tih hmasak ber ngai chu hei hi a ni: Kaihruaitu i mamawh tih hi i inpawm a ngai a ni. 

Mi ṭhenkhatte ang i nih chuan, Pathian emaw midang tumah i zui duh lovang a. Nangma duh danin kal i tum anga. A chang phei chuan Pathian chu i chhaih kual vela, nangma duhzawng tho i ti leh ṭhin. Pathianin ti tura a duh che tih ai chuan, nangma kut ngeia thiltih i duh leh ṭhin. Kaihruaitu emaw kawng kawhhmuhtu emaw i mamawh tih hi pawm harsa i ti a ni.

Beramte hi an zia rengah pawh, kawng dik lova vah bo ching an ni a. “Kan za hian beram angin kan vak bo va; mahni kawng kawngah kan peng ṭheuh va” Isaia 53:6.

Beramte chak lohna dang pakhat chu hmathlir an nei thiam lo hi a ni. Hmalam hun hi an thlir thui thei lo va. Chuvang tak chuan berampu an mamawh a ni.

Engang pawhin bei nasa mah la, hmalam hun i thlir thui thei chuang lovang, chu chu Pathianin a siam dan che a ni tlat. Chutiang chuan Pathianin engvangin nge a tih mai le? Amahah i inghah theih nan chu thil chu a ti a ni.

“Mi ngaiha kawng dik ni awm taka lang, a tawp chu thihna kawng ni si a awm.” Thufingte 14:12. Kan thutlukna siam te reng reng hi a ṭha hlein kan hre ṭhina, mahse a rei hnuah chuan a ṭhat lohzia kan hmuchhuak ṭhin. Kawng ṭhenkhatte phei chuan a tawpah thihnaah min hruaia, kawng bovin kan awm phah ṭhin. Chumi avang tak chuan hei hi i pawm a ngai a ni, “Lalpa, ka ngai che” tih hi.

Pathian chuan kawng dika hruai che a duha, chuvangin Pathian hruai theih tura i inpumpek leh i in hruaitir hunah chiah a che dawn a ni. 

Han ngaihtuah la

“Mi ngaiha kawng dik ni awm taka lang, a tawp chu thihna kawng ni si a awm.” Thufingte 14:12. I hun liam taah khan kawng dik nia i hriat a hnua dik leh si lo eng nge ni le? 

I nunah khan eng thil nge Pathian hnena hlan harsa i tih em em le?

Vawiinah hian  Pathian hruaina i chan theih nan eng thil nge i pawm ngai le? 

[Lettu: Sangpuia]