Mizoram sawrkar buatsaihin Lengpui Airport-ah Olympian Lalremsiami hmuak

Aizawl | August 25, 2021: Vawiin chawhnu khan Indian Women’s National Field Hockey player, Mizo nula chhuanawm Lalremsiami chuan Mizoram a rawn thleng a. Women’s Field Hockey Semi Final, Summer Olympics 2020, Tokyo a khelh hnua Mizoram a rawn chuankai lehna denchhen hian Lengpui Airport-ah Mizoram sawrkar chuan Official Reception Programme a lo buatsaih sak a ni.


Lengpui Airport-ah hian Pu R. Lalzirliana, Minister, Power & Electricity,etc., Pu K. Lalrinliana, Minister of State, Food, Civil Supplies & Consumer Affairs, etc., Sports Department official te, MSSC hruaitute, official dang te bakah infiammiten Olympian Nula Lalremsiami an lo hmuak a. Pu Robert Romawia Royte, Minister of State, Sports & Youth Services,etc., leh official thenkhat ten Delhi atangin an rawn tawiawm chho bawk a ni.


Nula Lalremsiami hian Lengpui Airport a rawn thlen veleh Mizoram Hockey Player te chuan lawmpuina chibai an lo buk hmasa berin a darah Tawlhlopuan an lo bat a. NCC, Hrangbana College, a lehkha zirna college, ten Press Conference Hall-ah an hruai lut a. Helai hmunah hian Minister te leh mi pawimawh ten lawmpuina pangpar leh thilpek nen an lo dawngsawng a. Hemi hnuah hian Chanchinbumite nena inkawmna hun an hmang chhunzawm a ni.


Chanchinbumite a hmachhawn hmain thusawina hun a nei a. Thinglung takin Mizorampuite chungah amah an thlawp tlat avang leh an lo tawngtaisak avangin lawmthu a sawi a. Chief Minister Pu Zoramthanga duhsakna leh thlawpna tha tak a dawn avanga lawmawm a tih thu a sawi a. Sports Minister Pu Robert Romawia kaihruaina tha a tih thu leh lawmawm a tih thu te, bialtu MLA Pu K.Lalrinliana, Supply Minister leh sawrkar hruaitute, Hockey lo zirtirtu a coach te, hockey huanga a senior te chungah te pawh lawmthu a sawi bawk a ni. Nula Lalremsiami chuan Mizoram Sawrkarin Group A sawrkar hna an pek avanga thinlung taka a lawm thu a sawi bakah tuna amah ruai mektu Railway Ministry chungah lawmthu a sawi tel leh bawk a ni. Nula Lalremsiami chu Hockey Khelh chhunzawm zel a tum thu sawiin ram tan hlawhtlinna lian tam zawk thawhchhuah ngei a tum tih a sawi bawk a ni.

Post a Comment

0 Comments