Darlawng khua-in Tlungvel mipui tan chawhmeh hlan

Aizawl | August 15, 2021: Hun harsa leh hripui leng karah Mizo nih nawmzia a lang a, mihring hmangaihna hlutzia a lang. Darlawng khaw mipui chuan hripuiin a tihbuai mek an khaw thenawm Tlungvel mipui tan nimin khan thlai leh chawhmeh tam tham tak mai an hlan.

Tlungvel khua  chu covid hripuiin a nuai a, thlawhhma pawh kan thei lovin an awm a, inkharkhip puan a ni mek bawk nen, chu chu lo hriain Darlawng khawtlang chuan an harsatna a ruka lo hmu-in Tlungvel khawtlang tan an luang chhuak a, Nimin tlai dar 6 vel khan Tlungvel khawtlang tan hian chawhmeh chi hrang hrang pik-up trip 3 leh pawsa fai Darlawng VC atangin cheng 3000 an hlan a ni.

Tlungvel khua hi in 630 chuang an ni a, August 13 a tarlan danin, hri vei mek 49 awmin, khunghran mek mi 206 an awm bawk a. Tunah hian hripui vangin an khua hi an inkharkhip mek bawk a ni.

Thilpek an dawn chungchang hi Tlungvel VLTF secretary PC Malsawma chuan, "kan thlai neih ang pawh la thei lovin dan chepin kan awm a, ei leh inah tam takin harsatna namen lo kan tawk meka, Darlawng khua ten he kan harsatna hi a ruka min lo hmu kiauvin kan tan an lo luang chhuak, chawhmeh chi hrang hrang pik up trip 3 lai leh pawsa fai Darlawng VC atangin ₹3000 lai kan dawng nawlh mai, kan va lawm tak em." tiin  a ziak a.

"Darawng khua hi a khaw nawtin an thawk chhuak a, thlawhhma neiin thlai zawng zawng an rut a, vau ngaw karah vangvat thosi leh sehsep tam tak hnuaiah mautuai/rawtuiai an rawn khawm bawk a, fur kawng nalah nilenga che hah hnep te khan hnatlangin an phurhna motor an chaih haw zui nen." tiin an inpekna a tarlang a.

"Heng zozai hi khawngaihna satliah ngawt chuan a seng lo, hmangaihna tak tak nena kan thenawm ten kan tam mangan lai taka chawhmeh chitinreng min rawn vur hi a va ropui em." tiin lawmthu a sawi bawk a ni.



KAN LAWM E!
Kan lawm e tih hian fiah phak lo mahse sawi dan kawng dang a vang si, kan va lawm teh lul em.

 Tlungvel khua  covid hripuii min nuaia, kan thlawhhma te kan thei lovin, kan thlai neih ang pawh la thei lovin dan chepin kan awm a, ei leh inah tam takin harsatna namen lo kan tawk meka, Darlawng khua ten he kan harsatna hi a ruka min lo hmu kiauvin kan tan an lo luang chhuak, chawhmeh chi hrang hrang pik up trip 3 lai leh pawsa fai Darlawng VC atangin ₹3000 lai kan dawng nawlh mai , kan va lawm tak em.

A khaw nawtin an thawk chhuak a, thlawhhma nei lova thlai zawng zawng an rut a, vau ngaw karah vangvat thosi leh sehsep tamtak hnuaiah mautuai/rawtuiai an rawn khawm bawk a, fur kawng nalah nilenga che hah hnep te khan hnatlangin an phurhna motor an chaih haw zui nen.

Heng zozai hi khawngaihna satliah ngawt chuan a seng lo, hmangaihna tak tak nena kan thenawm ten kan tam mangan lai taka chawhmeh chitinreng min rawn vur hi a va ropui em.

Kan lawm e tih bak sawi tur a vang, an mahniin an unload leh veka, a lum ai nuam tawk atangin kan lo thlir tak mai mai a, thingpui takngial pawh kan lo hlui ngam si lo. Darlawng khaw mipui zawng zawng chungah kan lawm e. In thiltih hi Pathianin a let tamtakin Malsawm mawlh che u rawh se.

Pc. Malsawma
Ziaktu, VLTF Tlungvel.

Post a Comment

0 Comments