Aizawl-ah ropui takin India Zalenna champhai vawi 75-na lawm

Aizawl the 15th August, 2021: Vawiin khan ramchhung hmun dang te rualin Mizoram hmun tinah India ram in mahni a ro a inrel hranna ni champha vawi 75-na chu lawm a ni. Aizawlah chuan sipai lammualah vawiin khan a lawmna neih niin, Chief Minister Pu Zoramthanga chuan Hnam Puanzar pawtparhin, mipui hnena thuchah a sawi.
CM thusawi : HETAH a awm


COVID-19 hrileng avangin sawrkar chuan mipui him zawkna tur ngaihtuah chungin kumin Independence Day lawmna parade a awmlo a. Guard of honour pe tur armed forces contingent panga (2nd BN Assam Rifles, 90 BN BSF, 3rd BN MAP, 5th IR BN & Mizoram Home Guard) leh Band Party pakhat (First MAP Brass Band) an tel a ni.


Chief Minister Pu Zoramthanga chuan Zoram mipuite leh India ram hmun hrang hranga chengte hnenah Independence Day chibai a buk a. India ram zalenna sual chhuaktu mihuaisente inpekna leh inhlanna chu tun thlenga ram chhung mipuite fuihtu leh phurna petu a la nih reng thu a sawi. COVID-19 hrileng chuan nunphung thlakdanglamin, harsatna min thlen thu a sawi a; nunna chan ta te chu a tawrhpui thu leh an kalsan takte Pathian awmpuina leh thlamuanna dilsak an nih thu a sawi. Hrileng karah sawrkar department hrang hranga thawkte, VLTF/LLTF te, tlawmngai pawl zawng zawngte leh kohhranhote, daktawrte leh nurse te, daktawr pension tawhte thlengin hripui do tura in rawn pen chhuak te, hripui kaite enkawltu zawng zawngte leh ambulance driver te, volunteers zawng zawngte bakah mipuite mahni awmhmun theuhah theihtawp kan chhuah tlan vangin tun dinhmun hi kan thleng a ni, a ti a. Nunphung pangngaia kir leh thuai turin hri danna lak hi a pawimawh tih hria a, tumahin hri danna lak hi tim lo tur leh, kan himna tur zawk a ni tih hria a hri danna la thei chin chuan la vek turin mipui a sawm a ni.


Chief Minister chuan Mizoram Sawrkarin ram chhung venhimna ngaipawimawhin, hemi atan hian chak takin hma a lak chhunzawm zel thu a sawi a. Ramri kaihhnawih a harsatna awm thinte chingfel turin theihtawp chhuah zel a nih tur thu a sawi. Fall Army Worm (FAW) puangin thlai nasa taka a tih chhiat avangin KVK, Lengpui-a State Biological Control Laboratory chu NABARD kal tlangin cheng nuai 131.88 seng a chei tha in, PM KISAN Programme hnuaiah loneitu chhungkua 1,49,243 hnenah tanpuina Rs. 6000/- theuh pek a nih thu a sawi bawk. COVID-19 thawh hnihna (second wave)a hripui hluar laia Lockdown kan kalpui thin lai khan Horticulture Department chuan ‘Fruits and Vegetable supply Chain’ a kalpui chu a tangkai thu leh, kumin July chawlh kar khatna thleng khan supply chain avanga lo leh huan neitute hnena sum lut belhkhawm chu cheng nuai 88.90 a tling a ni, a ti.

African Swine Fever hrilengin kumin March ni 21, 2021-a Lungsen khuaa a len thu hriat a nih atanga August ni 12, 2021 thleng khan vawk 22,371 a thih phah thu Chief Minister hian sawiin, he hri hi a darh zel loh nan hri vei vawk 8579 chu suat niin, hri lenna hmun ah vawk 45,288 dang chu hri kai mai thei dinhmunah an awm mek thu a sawi a. Tun dinhmuna pawimawh ber chu vawkvulhtu, he hrileng avanga vawk tam tak chân tuten bul an tan that leh theihna tura a theih ang anga tanpuia tuamhlawm niin, he ASF hrileng avanga chhiatna hi Disaster Act, 2005 hnuaiah chhawmdawlna pek a nih theih nan he hrileng hi ‘State of Calamity’ a puang turin hmalak mek a nih thu Chief Minister hian a sawi a ni.

Sawrkar Flagship Programme SEDP hnuaia ruahmanna awm saah kawng hrang hranga hma lakna turin Planning & Programme Implementation Department chuan kum 2020-21 chhungin department hrang hrang hnenah cheng vaibelchhe 99.61 crores a pe a. Heng zinga 23% chu kawngpui siam nan a ni a, hriselna kawnga hmalak nan 19% dah niin, building sak nan 16%, Aviation tan 13%, zirna lama hmalak nan 8%, Agriculture leh a kaihhnawih tan 7 %, Energy sector tan 4%, Water & Sanitation sector tan 2%, Rural Development tan 1% ruahman niin 7% la bang hi department hrang hrangah sem darh a ni.

Sports Promotional Programme chuan rah tha a chhuah zelin, Mizoram atanga kan infiammi Lalremsiami chu kumin Tokyo Olympic Games 2020-ah India ram aiawha Hockey Team-ah a tel thei chu Mizoram pum tan thil chhuanawm tak a tling a ni, a ti a. Mizoram sorkar chuan amah chawimawi nan leh lawmpui nan sumfai cheng nuai 25 bakah sorkar hna leh Kolasib-ah inhmun a pek tur thu a sawi. Lalremsiami bakah hian Dubai a May ni 14-31 a Asian Elite Boxing Championship-a Silver Medal la tu Lalbuatsaihi leh March ni 23-31, 2021 a Tashkent, Uzbekistan-a World Junior Weightlifting Championship-a Silver Medal la tu Jeremy Lalrinnunga te chu state mai nilo rampum tana chhuanawm an nih thu a sawi.

Health & Family Welfare Department leh District Disaster Management Authorities te, Home leh department dang hrang hrangte chu Covid-19 dona tura an hmalakna hrang hrang chu fakawm a ti a; Information & Public Relations Department chu Covid-19 hripui leng dona kawngah pawh sawrkar department zinga a hmatawng pawla tang chhunzawm zelin mipui tana hriattur pawimawh thehdarh kawngah te chhun leh zan zawmin an thawh thu a sawi.

Chief Minister chuan harsatna hrang hrang kan hmachhawn mekah hian zam mai lovin tumruhna, huaisenna, thuawihna leh chhelna nen hma lam pan turin leh kan hmalamah hlawhtlinna lian zawkin min hmuak a ni tih hre reng turin mipui a chah a ni.

Vawiin Independence Day lawmna ah hian award hrang hrang puan leh sem a ni a. Nimin (1.08.2021)-a Union Home Ministry in hna thawh that avanga chawimawina dawng tura Mizoram police a puan te chu vawiin hian an hming puanchhuah an ni a. Chungte chu:

I. President’s Police Medal (PPM) for Distinguished Service: Pu K. Laltluangliana, Dy.SP, Traffic, Aizawl

II. Police Medal for Meritorious Service:
(i) Pu Lallianmawia, Commandant, 4th IR Bn (Asst. Inspector General of Police (Modernization), PHQ hna chelh lai mek a ni)
(ii) Pu C.S Lalrinzuala, Asst. Commandant, 5th IR Bn.

III. President's Fire Medal for Distinguished Service: Pu Lalremmawia, Station Officer

IV. President's Fire Medal for Meritorious Service: Pu Ruatliana, Leading Fireman

V. Union Home Minister's Medal for Excellence in Investigation: Pu V.L. Chama Ralte, Champhai DEF

Khuallian in chawimawina hrang hrang vawiina a hlante chu hengte hi an ni: (Sl no. I - IV te hi kumin Replublic Day a Union Home Ministry in National Award dawng tura a lo puan tawhte an ni)

I. President's Police Medal for Distinguished Service - Pu VL Hmangaihzuala MPS, Dy.SP (Legal), PHQ

II. Police Medal for Meritorious Service:
1) Pu F. Lalhmingliana, MPS, Asst. CO, 3rd IR Bn.
2) Pu Zarzokima, Inspector, OC, Aizawl Police Station
3) Pu F. Vanlalkima, Inspector, Mizoram Police Central Armoury

III. Governor’s Gold Medal:
1) HHC Pradeepan EP, Kolasib DEF
2) Const. P.C. Zothanpuia, Security

IV. Governor’s Silver medal:
1) SI(AB) P.C. Liantluanga, 5th IR Bn.
2) Hav. Lalremmawia, 5th IR Bn.
3) Constable C.T. Vanlalhruaia, 5th IR Bn.

V. Mizoram State Teachers’ Award, 2021:
1) High School - Pu C. Lalhluna, Headmaster, Govt. Bethlehem Vengthlang High School, Aizawl
2) Middle School - Pu Rosangzuala Ralte, Headmaster, Govt. Edenthar Middle School, Aizawl
3) Primary School - Pi Vanlalthangi Chhakchhuak, Headmistress, Govt. Electric Veng Primary School-II, Lunglei

Vawiin Independence Day lawmnaa Parade Commander te chu Pu Lalrinpuia Chenkual, SDPO, Aizawl South leh Pu F. Vanlalrochana, DSP te an ni.

Post a Comment

He post chungchanga i ngaihdan lo sawi ve rawh:

Previous Post Next Post