COVISHIELD A HIM LO EM NI!?

- Zairemthanga

Kum 18 chung lam tana covishield vaccine 2nd dose chu lak a lo hun chho dawn ta reng mai a, insawithaihna ang reng post pawh a awm leh ta zeuh zeuh mai. Thenkhat chuan dose engzat pawh lak tur ti se, la duh tur an awm laiin dose khat duhtawk mai an awm bawk a, la duh lo hrim hrim an awm bawk. Kan lak duh chhan leh lak duh loh chhan chu a inang lo thei viau thung ang. Engpawh ni se, vaccine chungchang hi tawitein i han bih chiang thuak thuak teh ang. Covishield chu a rin tlak nge rin tlak lo.

Covid vaccine kan lak hi covid damdawi emaw, covid kai lohna emaw a ni lem lo a. Covid-in kan taksa min luhchilh huna chak taka kan do let theihna tura siam a ni. A awmzia chu vaccine kan lak hi virus a ni a, Adenovirus an tih mai chu covid hrik ang taka siam danglamin, covid aia thawk nep si leh taksa tana pawi pha lo turin an siam a. Chu vaccine(virus) chu kan taksa-ah an han chiu luh khan virus a nih miau avangin khawsik, taksa na, luak chhuak leh thil dang harsatna lian tham lutuk lo a thlen ta thin a ni. chu chu thil nih dan tur  a ni a, hlauhawm a ni lo. Naupang pawh vaccine an lak hian zanah chuan an khawsikte pawh a sang viau thin a ni. Tichuan Chu virus kan taksa-a an thun chu hneh turin kan taksa chuan antibody nasa tak a lo siam chhuak a, chu chuan kan taksa-a ral do khawl(immune system) chu a rawn ti chak ta a, awlsam zawkin chu virus chu a lo hneh ta thin a ni.(technical deuh hlek pawhin research an beihnate nen hetah pawh kan post tawh kha) 

Covishield kan lak avang khan covid lakah ka fihlim a ni reng reng lo a, englai pawhin ka kai ve thei reng a, ka vanduai chuan ka thihpui ve thei tho tih erawh hria i la. Mahse, kan taksa ral do khawl a tih chak tawh avangin vaccine la ve lote aiin covid hri chu ka hneh hma thung ang. Tin, mi dangte an kai chhawng har bik niin mi thiamte chuan an sawi bawk. A chhan chu covid hrik kha kan taksa-in a lo do chak tawh em avangin a dal tial tial tihna a nih chu. Naupangin zeng hri danna an lak pawh hian zeng hri kha an taksa-ah a lut thei lo tawp a ni bik lo a. Mahse, hri danna an lak miau avangin zeng hri zawk kha chu hri danna vang chuan an ti zeng ta zawk thin a ni. Chutiang tho chuan Covishield kan lak khan kan taksa-a virus lo lut kha che hleithei loin kan siam a, nat em em pawh awm loin positive atangin negative-kan lo nih theih phah dawn tihna a nih chu.

Mi tam takin vaccine full dose la tawh pawh an thi fo tho tih chhuanlamin mi dangte pawh vaccine la ve duh lo turin an fuih fo thin a, a tha lo khawp mai. A nihna takah chuan a la leh la lo hi kan la thi vek dawn hrim hrim. Khawvel a ni a, dam kan duh a, kan la a ni mai. Pathian thu nen sawi zawma intih Pathian rin tlur lam kha a ni lem lo. Khawvel thiamna mamawh miah lo khawpa kan ring a nih chuan thu hran daih a ni. A thena Pathian, a thena daktawr tih khan awmzia a nei lo a, Pathian kan rinna leh kan mawhphurhna hi a kal kawp tlat zawk tur a ni. Tin, vaccine lak piah lama nitina kan mawhphurhna hi kan hlen chhuah a pawimawh hle bawk. 

Mi pahnih khatin an harsatna an sawi avanga alo hlauh ve ringawt tur pawh a ni lo. Damdawi ngeih zawng pawh a inan loh hi. Nu pakhatin, 'Vaccine ka lak atang khan ka nerve tha lo a chhuakin ka hria' a tih avangin nerve tha lo zawng zawng khan vaccine an lakin an nerve tha lo a chhuak dawn tihna a ni kher lo. Tumah tihluih theih chu a ni lo a, kan duhthlanna a lal ber a, chutih rualin vaccine lak avanga thi nge covid vanga thi tam zawk tihte ngaihtuah i la, Vaccine lak vanga thi hi India ah phei chuan lungthu daih pawh an la awm lo. Mahse, covid vanga thi erawh chu maktaduai an tling tawh thung. 'he laiah hian motor vawi-3 a tlan liam tawh' an tih avangin kan hel ngat ngat tur a ni kher lo a, kan tlan ve ngam lo tur tihna a ni lo a, fimkhur takin kawng chu kan zawh mai zawk tur a ni.

Chuvangin, i chhia leh tha hriatna kha ngun takin lo hmang la, lo fimkhur la, lo him ang che.