COVID-19 | ZMC-ah damdawi pawimawh pahnih Tocilizumab leh Monoclonal Antibody tlachham; Natna benvawn nei a bikin lung thalo, thisen sang, zunthlum, tar chaklo leh raipuarte an ngaihtuahawm bik - ZMC Director

Aizawl | August 7, 2021: COVID-19 hri kaite enkawlna hmun  Dedicated COVID Hospital, ZMC hotute chuan vawiin khan ZMC dinhmun sawifiah pahin mipuite hnenah thuchah pawimawh tak tak an sawi.


ZMC Director Dr John Zohmingthanga chuan, COVID-19 thawhhnihnaah hian damlo an enkawlte leh nunna chan tate an bihchiannaah natna benvawn nei a bikin lung thalo, thisen sang, zunthlum, tar chaklote leh raipuarte an ngaihtuahawm bik niin a lang a ti a, hetiang mi chenpui kan nei a nih chuan fimkhurpui a tul thu leh COVID-19 hri an kai palh a nih a in lama an inenkawl an nih phei chuan uluk taka vil an ngai tih a sawi a, damlo ZMC a admit te, a bikin Home Isolation atanga ZMC a phurhte chu an thlen phei meuh chuan an chau hle tawh tlangpui thin a, hei vang hian in lama enkawltuten  uluk taka kan vil an mamawh a ni, a ti. Raipuarte hi nau neih hun tawhte leh natna langchhuak nasate chauh ZMC ah an admit thei tawh tih sawiin, natna lang chhuak lote chu CCC, CCCC leh Home Isolation lamah uluk taka lo inenkawl ni se a duh thu a sawi bawk a ni.

ZMC Director chuan tunhnaiah damlote mamawh damdawi pawimawh tak tak pahnih Tocilizumab leh Monoclonal Antibody phai lam atanga an chahte a chhan hriat loha a rawn thlen theih loh vangin an tlachham tih sawiin, theihtawp chhuaha hma an lak thu a sawi a, Health Minister hmalakna in ICMR in RT-PCR test kit 20000 an pek thu sawiin RNA extraction kit pawh an dawng tel tih a sawi a, vanduaithlak takin rna extractor an dawn chu company dang siam a nih vangin an khawl neih nen a inmil lo tih a sawi a, Guwahati atang RNA extractor kit lirthei hmanga rawn phurh mek a ni tih sawiin, hemi chhung hian emergency a test ngaite chauh an test theih dawn tih a sawi a, reilo teah a pangngaia test kalpui theih an beisei thu a sawi a, mipuite leh sample test result nghaktute hriatthiamna a ngen a ni.

Dr. PC Lalramenga, Nodal Officer, COVID-19 Task Force, Zoram Medical College pawhin COVID-19 hripui laka kan him theihnan  vaccine lak leh sample test ran a pawimawh tih a sawi a, sawrkarin sample test runpui a buatsaih bakah mahni inchik a inrinhlelhna nei kan nih chuan in test zung zung a pawimawh tih a sawi a, sawrkar leh Task Force ten test tura min tih chuan lo hnial lova a rang thei ang bera in test tura mipuite ngenin, positive kan inhmuhchhuah rana kan in lak hran zung zung hi kan himna tur pawimawh ber pakhat a ni tih a sawi a ni. Sample test a tama positive kan inhmuhchhuah tam takah hian loh theih lohin in lama inenkawl (home isolation) kan tih tam a ngai dawnin a lang a, CCC leh CCCC in min daih seng lova, symptom nei lo leh symptom nei nasa lote chu uluk taka in lama inenkawl hi a pawimawh dawn tih a sawi  a ni.

Dr. Ramenga chuan second wave hi rin aiin kan tuar nasa a, damlo pun chak dan leh an nat dan en hian kan rin aiin hripui leng hi a darh niin  kan hria, hri kan kai thar tam ber hi kan hriat hmasak China Wuhan variant ni lovin a thawk na chi leh a hlauhawm zawk nia an sawi Delta variant leh a aia thar variant chi hrang hrangte an ni tih kan lo chhinchhiah dan hmuhchhuah tawh a ni a. Hri in kaichhawn a awlsam avang hian mitin kan fimkhur a ngai lehzual a, lockdown a ni emaw, lockdown a ni lo emaw kan fimkhur reng a ngai a, COVID Appropriate Behaviour, a bik takin mask vuah that hi a pawimawh lehzual tih a sawi a, damdawi inah positive enkawltute an ni chungin an zingah hri kai an awm mang lo tih a sawi a, hei hian CAB zawm a him tawk tih a tarlang a ti bawk a ni.

ZMC hotute chuan sawrkar leh khawtlangte kan tangrual viau chungin he hri hi kan dang seng tawh lova, nikum lamah chuan positive zawng zawng deuhthaw kan admit a tih theih a, kumin kum tir lam khan natna lang chhuak nasa lo (mild symptomatic) kan admit tel thin a, tunah erawh chuan natna lang chhuak nasa leh damlo serious te chauh kan la tawh a, chuti chung chuan tunhnaiah damlo enkawlna khum 300 chuang erh awrh kan neihah hian mi 400 bawr vel nitin kan enkawl a, damlote bakah enkawl ngai bikte awmpuitu an ni, an ti a. Kan khawlte hi chum lo chat lovin kan hmang reng a, an rim tawh hle in, thawktute pawh chhunzan zawmin an buai a, sawrkarin volunteers mi 150 vel min laksak bawk a, kan staff quarters te ti ruakin frontline workers ten an luah rih a ni an ti a, thawktute an indaih lohna chhawk zangkhai turin sawrkarin ruahmanna a siam mek nia an hriat thu sawiin lawm thu an sawi nghal a ni.

Post a Comment

0 Comments