Aizawl | August 19, 2021: Health Minister Dr. R. Lalthangliana hovin vawiin khan DHME Conference Hall, MINECO-ah Health & Family Welfare Department hnuaia peng hrang hrangte hmalakna thlirletna “Review Meeting” neih a ni a, he meetingah hian Health & Family Welfare Board Vice-Chairman Dr. ZR Thiamsanga, MLA, Health Secretary Pu R. Lalramnghaka, IAS, Health Principal Director Dr. F. Lallianhlira bakah health Department hnuaia hotu pawimawhte leh mawhphurhna pawimawh chelhtute an tel a ni.
Meeting kaihruaitu Health Minister Dr. R. Lalthangliana chuan Health Department hnuaiah hian programme chi hrang hrang chhiar fe tham kalpui niin hengte hi peng hrang hrangin an thawk a, kan hmalakna te kan inhriatpui tawn a tul bakah kan tanho theihna laite, hmachhawp bawhzui dan chungchangte kan sawiho hi thil pawimawh tak a ni, a ti a. Niminpiaha Union Health Minister hova North East State Health Ministerte meeting Guwahati-a neih a a tel chungchang sawilangin Mizoram leh north East State bik tan Health Sector-ah awmze nei zawka thukhat vua a kal a tul thu a sawi tih a tarlang a, Union Health Minister hnena rawtna a thlen zingah hmarchhak state ten harsatna hrang hrang kan neih te sawihoa chinfel dan ngaihtuah turin Union Health Minister in Delhi ah meeting huaihawt leh se a tih bakah, Union Health Minister hnenah hian Hmarchhak State bikte health sector buaipui tur bik officer dah ni se, hemi atan hian Central Ministry a Joint Secretary aia hniam lo ruat ni se tiin a rawt a, DoNER MInistry atanga NLCPR hnuaia 10 % Hmarchhak State te tana dah hran chu CCOVID-19 dona atana mumal taka hman zung zung a nih theih nana hma lakpui turin Union Minister hi a ngen tih a sawi bawk a ni.
Vawiin meetingah hian COVID-19 dona kawnga Health Department hmalak dan chi hrang hrang leh hmalak chhunzawm zel dan tur sawiho a ni a, meetingah hian VLTF leh LLTF memberte COVID-19 hrin kai an awm chuan sawrkar hriatpui inenkawlna hmuna an awm man leh senso dang zawng zawng a thlawn veka pek tur an ni tih sawrkar order awmsa a awm a ni tih sawi a ni a, COVID-19 hri dona atana mamawh hmanrua, bungrua leh damdawi chi hrang hrang dinhmun a tha thawkhat tih tarlan niin, vawiinah pawh RT-PCR test kit leh RNA Extraction kit thahnem tak a rawn thleng tih tarlan a ni bawk.
Lockdown puan chhunga Health Department hmalakna a tha thawkhat tih tarlan niin mass testing pawh veng/khua 65 ah neih tawh niin sample 89323 test zingah positive 2515 (2.81%) hmuhchhuah an ni a, mass test hi kalpui chhunzawm zel a ni. Hri kai an tlahniam zel tih tarlan niin hei hi thil lawmawm takm a nih rualin mipuiten inthlahdah phah nana kan hman erawh a la hlauhawm hle tih sawi a ni.
Food & Drugs Administration lamin Silchar atanga thlai leh theirah lo lut te a thawh hnih nan zanin atangin ramriah an lo endik leh dawn a, April 2020 – July 2021 inkarah damdawi dawr 1287 an endik a, dan bawhchhia licence suspend sak 3 awmin licence cancel sak 85 an awm a ni. Heng bakah hian eitur zuar leh siam thingpui dawr etc 300 chuang an endik a, eitur sample 231 Guwahati ah an thawn bawk a ni.
Mizo State Health Care Scheme hnuaiah kum 2020-2021 khan mi 1,13,720 an inziaklut a, COVID-19 medical reimbursement bill rs. Nuai 49 vel an dawng tawh a ni. Mizoram State Cancer Institute acancer hemna khawl pakhat kum 25 chuang an hman tawh chu khawl thar 3 a thlak mek a ni a, heng zinga khawl pahnih hi hman theih tep tawh niin, hman phalna licence buaipui mek a ni a, khawl dang pakhat pawh peihfel tep tawh a ni. Heng khawlte rawn bun tur leh buaipui tur engineerte leh technician te hmunpui lam atanga rawn kal a ngaih thin a, COVID-19 boruak vangin an rawn kal zung zung thei lova, hei hian hmalak a ti muang deuh this awi a ni a. Cancer Hospital bulding sak mek pawh tluang taka hnathawh a ni.
Vawiin meetingah hian Health department hnuaia peng hrang hrang ten an hmalakna leh hmachhawpte report an pe a ni.
Post a Comment
He post chungchanga i ngaihdan lo sawi ve rawh: