CHAWLHNA ISUA

Matthaia 11:28- 30

Vanlalthansanga

28 “Nangni thawk rim leh phurrit phur zawng zawng te u, ka hnenah lokal ula, keiman ka chawlh tir ang che  u”.

             Lal Isua hun laia mipuite kha Kristian (Lal Isua hnung zuitute an ni vek lova), Kristian tia an kohna hmasa ber chu Antiokei ah chauh a nih kha, Lal Isua hunlaia mipui a tam zawk kha Juda sakhua vuantute an ni. Juda sakhuaah chuan dan zawm tur a tam em em a, chung dante chu sakhaw puithiamten strict taka zawm turin Juda sakhaw zuitute chu an duha, an beisei thin a ni. Chutianga an sakhaw dan te chu strict taka zawm tura an duh avang chuan Juda sakhaw zuitute tan chuan thawh rim angai hle a, phurrit a a tling tak zet  a ni. Lal Isuan Juda sakhaw zuitute harsatna leh an phurrit chu a hre chiang hle a, chumi avang tak chuan, “Nangni thawk rim leh phurrit phur zawng zawng te u, ka hnenah lokal ula, keiman ka chawlh tir ang che  u” a ti a ni. Hrehawm leh hahdamlo taka awmte, thawkrim rim em emte, nun hahchawlhna nei lo leh phurrit phurte, beidawng ngawih ngawihte Lal Isuan a hmuh khan he thu hi a sawi  a ni.

source: dailybibleverse.com

             Juda sakhaw zuitute ang mai hian kan awm ang tih a hlauhawm hle a ni, Juda sakhaw vuantute khan an kiang hnaiah, an ban phakah Lal Isua kha awm reng mahse amah zui nachang an hrelova, a thusawite khan an zawm hek lo a ni. Keini pawh kan eizawnnaahte kan rawngbawlnaah te hian Isua chu dah pawimawh hmasa lovin kan eizawnna te leh kan nihnate kan dah pawimawh zawka chumi avang chuan kan nun a hahdam lova, hrehawm kan ti a, kan thin te pawh a chhe em em a, chawlhna tur chu Lal Isuaah ni lovin hmun dang dangah kan zawnga kan hmu si lo a ni. Chung zawng zawng ai chuan kan thawhrimna leh phurrit kan phurhna zawng zawngte min chhawk turin Lal Isua pan ila, tichuan a nin min chawlhtir dawn a ni.

 

29 “Ka nghawngkawl bat ula, ka hnenah zir rawh u; thunuairawlh leh rilrua inngaitlawm tak ka nih hi: tichuan in thlarau tan chawlhna in hmu ang”.

        Lal Isuan chung mipui hote an sakhaw dan zawm an duh avanga thawk rim em em leh phur rit tak phurte a hmuh chuan a khawngaih hlawm hle a, an phur te chhawk zangkhaia, an ritphurh te chu a kian deuh theihna turin ‘ka nghawngkawl bat ula’ a ti a ni. Lal Isuan, ‘ka rilru a inngaitlawma, thuhnuairawlh thei tak ka ni bawk a. Midangte hriatthiamna tam tak ka neih avangin in harsatnate pawh ngaihthlaka ngaihtuahpui in ni zel anga, tichuan harsatna, buaina leh manganna karah pawh in nun a hlim anga, beiseina nung in neih tlat dawn a vangin in thlarau tan hahchawlhna in hmu ang’ a ti bawk a ni. Thlarau hahchawlhna hi a pawimawh hle a, Juda sakhaw zuitute khan, dan zawmloh hlauva, buai reng rengin an khawsa, an taksa a chaua, an thlarau a hahdamlo a ni, chumi avang tak chuan Thlarau hahchawlhna Lal Isuan mipuite chu a tiam a ni.

        Juda sakhaw puithiamte kha an duh khirh em em a, mipuite chu Juda sakhaw dante zawm thlap thlap turin an phuta an beisei a ni, mi tam takin an zawm lo a ni tih an hriat khan puithiamte leh sakhaw zuitute inkarah harsatna leh inhmuhthiamlohna te pawh a awm fo thin ang. Chutiang chiah chuan keini pawhin mihring taka, rawng kan bawla, mihring taka hruaitu kan nih chuan kan memberte zingah leh rawngbawlpuite zingah pawh kan mittlunlohna te tam tak kan hmu anga, kan lung pawh a awi kher lovang. Nimahsela chung zawng zawngte theihnghilhin Lal Isuan ‘ka hnenah hian lokal rawh u, ka nghawngkawl hi bat ula, ka hnenah hian lo zir ve teh u’ a ti a, tichuan ‘vuivaina turte pawh in zawng reng lovanga, hahdam takin midangte er ran lovin rawng in bawl anga, in thlarau tan pawh chawlhna a ni ang’ a ti a ni.

30 “Ka nghawngkawl chu a nuam a, ka phur pawh a zang a ni a ti a”.

             Lal Isuan ka nghawngkawl chu midang nghawngkawl ang a ni lova, a nuam em em a, ka phur pawh a zang bik a  ti a ni. Juda sakhaw zuitute chu an puithiamten dan chi hrang hrangte chu a kip a kawia zawm tura an beisei avangin, chung dan zawng zawngte zawm tur chuan an beih nasat a ngai em em a, an nghawngkawl pawh chu a rit hle a, an phur chu a rit em em a ni. Chumi avang chuan Lal Isuan a mah chu zuiturin mipuite chu a sawm a, amah zuitute chu nghawngkawl a bah pui thin a vangin, ka nghawngkawl chu a nuam a ti a, ka phur pawh a zang a ni a ti a, a chhan chu Isuan amah zuitute chu nghawngkawlte a pe a, an phur te a phurh pui thin a, chuvang tak chuan zang takin an kal thei a ni.

     Chutiang chiah chuan nang leh kei pawh hi Lal Isua nghawngkawl kan bah loh chuan kan nghawngkawl te pawh a rit kan ti hma thin em ema, kan phurte pawh hi kan phur zo lo vawi tam kan tlu thin a ni. Keini pawhin Lal Isua kan zui chuan nghawngkawl nuam tak kan bat thei ang, a chhan chu, Lal Isuan ahnung zuitute chu a awmpui tlat thina, nghawngkawl a bahpui tlat thin a vangin, a nghawngkawl pawh a nuam bika, chu mai bakah kan phur pawh a zang sawt dawn a ni. Juda sakhua angin dan zawmtur chi hrang hrangte kha a awm tawhlo, nimahsela Lal Isua hmangaihna chuan min phuarkhawma, Isua hmangaihna chuan a thu zawm turin leh a duh anga awm turin min nawrkal tawh zawk dawn a ni.

             Tunlai hun anga kan phurrit phurhte:

Eizawnna

Kan tunlai khawvelah hian mihring fate hian harsatna hrang hrang kan tawk thin a ni. A then chu kan eizawnna avang te in kan lungngaia hrehawm kan ti, kan bei a dawng thildang han tih vak ngaihna kan hre thin silo. Hrehawm ti takin leh rual awt takin kan nunga kan khawsa mek a ni. Kan eizawnnaah malsawmna kan chan theihnan, kan phurrit min chhawk turin Chawlhna Isua kan pan angai a ni.

 Chhungkuaah

Chhungkaw thenkhatte chu kan inchhungkhur a nuam thlawt lova, kan inkaihhruai dan a fuh tawk tawh loh avang nge ni, chhungkaw thenkatte hi chu kan buai nuaih mai ni. Chhungkaw boruak hi a rit em em thin a ni. Hetiang ang karah hi chuan nu leh pa tan men ngaihna a awm thin lova a luhai thlak thin hle  ani. Chutiang karah chuan chhungkaw lu ber ni turin Isua Krista kan sawma, kan zuia, kan thlan angaia, amahah chuan chawlh hahdamna a awm a ni.

Rawngbawlnaah

Kan rawngbawlnaah hian harsatna leh buaina kan tawka, mite sawiselna pawh kan tawk fo thin a ni. Chutianga harsatna leh sawiselna kan tawh chang chuan Chawlhna Isua a chawl lova, mahni a inhnem kan tum leh fo thin. Isua hnenah kan buaina te leh kan harsatnate kan thlen chuan aman min chinfel sak anga, hahdam takin min chawlh tir dawn a ni.

Thalaite zingah

Thalaite zingah nun hlimna thuruk chhar tawh engzat nge awm ang le? Hlim awm ang deuhin an langa, an nui uar uara, nimahsela an nun chhungril chu a ruak si a ni. Nun hahchawlhna zawngin an thlarau a vak a, nimahsela hahchawlhna an hmu si lo a ni. A tak ni lovin, a lemin, a derin an nung a ni. Thalaiten nun zangkhai, hlimawm leh duhawm kan neih theihna turin Lal Isua kan pana, Isuaa kan chawlh angai tak zet a ni.