RAMRI | Assam-in Nitin mamawh, ei leh bar lakluhna dang ping; Home Secretary-in Central Sawrkar-ah thlen

Aizawl | July 28, 2021: Tun hnaia Assam leh Mizoram ramria buaina chhuak kal zelah Assam chuan Mizoram tana nitin mamawh, ei leh bar chawk luhna kawngpui a dan pin bakah rel kawng a tichhia a. Hemi chungchangah hian Mizoram Sawrkara Home Secretary Pi Lalbiaksangi chuan Sawrkar Laipui Union Home Secretary hnenah vawiin khan lehkha a thawn.


Pi Lalbiaksangi chuan National Highway - 306 leh Mizoram leh Assam inkar kawng te Assam chuan July ni 26 atanga vawiin thlengin a dang ping tih a sawi a. National Highway - 306 hi Mizoram mipuite nitin mamawh lakluhna kawngpui pawimawh ber a nih avangin hei hian nasa takin nitin khawsak phungah Mizoram State chhung mipuite harsatna a siamsak a ni, a ti. NH-306 dan pin mai duh tawk lovin Assam atanga Mizoram luhka zawng zawng te chu Assam hian a dang chat vek a ni, a ti bawk.

He lehkhaah hian Home Secretary Pi Lalbiaksangi chuan Assam State sawrkar hmalaknain Mizoram chak lakna kawng te hi kum kalta October ni 17 atanga November ni 11 thleng khan a lo dang chat tawh bawk, tih a ziak a. Kha thil thleng khan nasa takin Mizoram mipuite nitin khawsak a tibuai a, vawiin thleng hian Mizoram mipuite chuan nitin mamawh phuhrukna kawngah harsatna an la tawk chhunzawm zel a. National Highway leh rel kawngin an state a paltlang avanga a duh hun huna Mizoram panna kawngte Assam-in a chhu chat zel mai hi pawikhawihna lian tak a ni a, hetiang thil hi vawi tam tak a thleng tawh thin a ni, a ti.

Assam state chhunga Hailakandi District-ah misual tu tih hriat loh ten Mohammedpur Railway Station leh Ramnathpur Railway Station a rel kawng an tichhia, tiin Home Secretary hian a ziak a. He rel kawng tihchhiat tak hi Mizoram tana kawng pawimawh tak niin Bairabi Railway Station pawhna kawng awmchhun a ni a, National Highway tih lohah chuan Mizoramin mamawh a phurh luh theihna kawng awm chhun a ni, a ti bawk.

Pi Lalbiaksangi chuan National Highway leh rel kawng neitu dik tak chu Sawrkar Laipui a nih avangin State sawrkar emaw, mipui emaw, eng pawl mahin dang turin thuneihna an nei lova, heng kawngpuite kaltlanga mamawh phurh luh tih tawp theihna dan an nei lo, tiin a lehkhathawnah Union Home Secretary hi a hrilh a. Chuvangin, Sawrkar Laipui chuan he thil pawi tak thleng mek hi a ngaihthah thiang lova, an pawikhawih mek ti tawp turin Assam Sawrkar hnenah khauh taka thu pe turin a ngen a. Mipui mamawh phurh luhna tura National Highway leh rel kawng te paltlang a nih leh thuai theihna tura hma la turin Mizoram Home Secretary Pi Lalbiaksangi chuan Union Home Secretary hi a ngen a ni.

- DIPR

No comments

He post chungchanga i ngaihdan lo sawi ve rawh:

Powered by Blogger.