Health Minister hovin ZMC harsatna tawh leh damlote enkawltu indaihlohna sawiho

• District tina Dedicated COVID Health Centre (DCHC) leh Aizawla DCHC thar 2 -ah thawktu mi 220 vel mamawh belh dawn
• ZMC a volunteer nurse chawl tate thlaktu tur tihfel vat tul

Aizawl | July 28, 2021: Vawiin khan Health Minister Dr. R. Lalthangliana hovin SAD Conference Hall, MINECO-ah Dedicated COVID Hospital (DCH) Zoram Medical College harsatn a tawh chungchang leh damlote enkawltu volunteers frontline workers indaihlohna chungchang sawiho a ni a. He hunah hian Medical Operational Team on COVID-19 Chairman Dr. ZR Thiamsanga, Health Secretary Pu R. Lalramnghaka, Health department hotu pawimawhte leh Zoram Medical College hotute an tel a ni.

Zoram Medical College Director Dr. John Zohmingthanga chuan an dinhmun tarlangin June thla khan ZMC-ah nau piang 35 an awm thu leh an zinga 15 chu enkawl uluk zui ngai (neo-natal care) mamawh an nih thu sawiin, tun thla kal mek July-ah vawiin ni thlengin naupiang 50 an awm thu leh an zinga 30 chu enkawl uluk zui ngai (neo-natal care) mamawh an nih thu a sawi a. COVID-19 third wave lo thleng tur atana inbuatsaihna, naupangte enkawlna tur bik HDC/NICU/SICU pawh buatsaihna theihtawpchhuaha an kalpui thu sawiin, LG Company in an pek Air Conditioner pawh an bun thu a sawi a, TATA Trust atangin oxygen pipline siamna tur leh thil pawimawh dang tihna tur sum an hmu dawn tih a sawi bawk.

COVID-19 Second Wave ZMC a damlo enkawl ngai an pun nasat avanga thawktu a biik takin volunteer nurse an lak belhte zinga mi 45 lai mai chu an exam a hnaih tawh avangin an chawlh a ngai tawh dawn tih sawiin ZMC Director chuan heti a nih mek lai hian naupangte enkawlna tur ward peihfel a nih chuan thawktu tur nurse lak a ngaih belh dawn tih a sawi a, nurse mai bakah thawktu dang medical attendant chim hrang hrang indaihlohna a nasa tih a sawi.

ZMC a COVID-19 hri kai damlote enkawlna khum (ICU telin) awm mekah tun dinhmunah damlo 310 an awm a, an zinga enkawl ngai zualte awmpuitu mi 82 awmin nausen pianghlim 12 an awm bawk a, an vai hian mi 404 an ni. Hetih rual hian ZMC khum indaihlohna phuhru tura ruahman, damlo serious vak lo enkawl uluk la ngaite dahna tur ruahman MRD DCHC, MINECO, khum 50 awmna pawh luah khah vek a ni bawk.

District tina Dedicated COVID Health Centre (DCHC) leh Aizawla DCHC thar 2 ruahman Kuolikawn Hospital leh Mualpuia Sports Council building ah thawktu mi chi hrang hrang a tlem berah mi 220 vel mamawh belh a ni dawn tih meetingah hian sawi an ni a, Specialist daktawr, MBBS, Staff Nurse, Lab Technician leh thawktu dang engemawzat mamawh belh an ni. ZMC a volunteer nurse chawl tate thlaktu tur pawh a rang thei ang bera tihfel a tul thu sawi a ni bawk.

Heng mamawhnate hi a tul anga sawrkara thuneitute hnenah thlen a, tihhlawhtlin thuai a pawimawh thu sawi a ni.