RAMRI | Assam Armed Police te kha an silai hmetpuak hmasatu an ni a; anmahni ngei kha silai thlah hmasatu chu an ni a, thi leh hliam an awm phah a ni - CM Zoramthanga

Aizawl | July 30, 2021: Mizoram CM Zoramthanga chuan vawiin khan instagram kaltlangin Mizoram leh Assam intihbuaia Assamte chet dan a hriatthiam theih loh thu sawiin, "Ka hriatthiam theih loh chu, Union Home Minister kaihhruaina hnuaiah hmarchhak CM te nen inbiakna hlawhtling tak kan neih zawh hlimah engvangin nge Assam Sawrkar hian ralthuam famkim nena inthuam Assam Police te kan ramri pela a rawn tirh?" a ti a.

"Assam Armed Police te kha an silai hmetpuak hmasatu an ni a; anmahni ngei kha silai thlah hmasatu chu an ni a, thi leh hliam an awm phah a ni" a ti bawk.

View this post on Instagram

A post shared by Zoramthanga (@zoramthangaofficial)

CM thusawi:

• Ka hriatthiam theih loh chu, Union Home Minister kaihhruaina hnuaiah hmarchhak CM te nen inbiakna hlawhtling tak kan neih zawh hlimah engvangin nge Assam Sawrkar hian ralthuam famkim nena inthuam Assam Police te kan ramri pela a rawn tirh?

• Engvangin nge ramri pela CRPF awmna paltlanga Mizoram Police Outpost an rawn luahlan?

• Silai keng chunga Silai keng ve tho te awmna inlaksak tumna chuan buaina nasa zawk leh inbeihna, inkahna thlengin a thlen thei a ni tih chu thil chiang sa vek a ni.

• Assam Armed Police te kha an silai hmetpuak hmasatu an ni a; anmahni ngei kha silai thlah hmasatu chu an ni a, thi leh hliam an awm phah a ni.

• Assam Armed Police te hi silai leh ralthuam nen, inkahna thleng thei tih hre sa leh inbuatsaih sa vekin ambulance nen silai kengin an rawn kal a ni.

• Union Home Minister Amit Shah chuan Assam CM nen min be ve ve a. State pahnih CS te pawh Union Home Secretary kaihhruaina hnuaiah an ṭhukhawm tawh bawk. An thutlukna chu buaina chinfelna kawng zawn a ni a. Union Home Ministry kaihhruainain kan chinfel thuai pawh ka beisei.

• Amaherawhchu, a duhawm loh lai ber leh ṭhalo lai ber chu, Union Home Minister hova hmarchhak CM zawng zawng ten inbiakna hlawhtling tak kan neih zawh hnua an chet dan hi ngaihthiam theih a ni lo.

• Silai keng Sipai 200 leh ralthuam nena ramri pela rawn kal a, kan Sipaite awmna rawn luhkhung a, rawn hnehchhuhna hi ngaihthiam theih loh, sawifiah ngaihna awmlo a ni!

Mizoram hi Mizo te ta a ni a, a ni reng bawk ang.