Ticker

10/recent/ticker-posts

Power & Electric-in Electric Bill chungchangah thuthang diklo sawifiah

Aizawl | July 16, 2021: Pi Lalhmingliani Hmar, Chief Engineer(RE), Office of E-in-C, Power & Electricity Department chuan tunhnai Lockdown leh mipui chetvel inkhuahkhirhna a awm chhunga Electric Bill siam danah mi thenkhatten thudiklo an lo vawrhdarh avangin a hnuaia tarlan ang hian mipui te lo hriat a tan sawifiahna a siam.

Covid-19 hrileng avanga Mizoram Sawrkarin Total Lockdown a puan leh mipui chetvel inkhuahkhirhna a awm chhunga Electric bill siam dan chungchangah thil felhlel a awm nia an hriat thu mi thenkhat thuchhuah tualchhung chanchinbu, Local cable TV chanchin thar leh social media hrang hrangah hmuh a nih avangin a hnuaia tarlan ang hian sawifiahna buatsaih a ni.

1. Hrileng laka kan him tlanna tur atana Mizoram Sawrkarin May ni 10, 2021 atanga Total Lockdown hial a puan tak avangin Consumer Energy meter reading lak, bill sem leh bill counter hawn chu tih tawp lailawk a ni a. Hetianga mipui chetvel inkhuahkhirhna a awm hun chhung atan hian JERC(M&M) Supply Code Regulations,2013 Clause-5.22 tlawhchhana Meter reading lak theih a nih lai thla hnuhnung pathum a energy hman zat atanga thlakhat average chhut chhuah hmangin provisional bill siam a nih tur thu te, bill hi sem chhuah a nih dawn loh thu leh online hmanga bill pe duh leh pe thei tan bill hi pek theih a nih tur thu te, online hmanga bill pe theilo tan pawh Bill counter hawn theih a nih veleh hrileng avanga mipui chetvel khuahkhirhna a awm chhunga bill pek loh tling khawm chu bill pek tlai avanga a pung (late payment surcharge) tel lovin a hlawma pek mai tur a nih tur thu te, Energy meter reading a pangngaia lak theih a nih veleh Provisional bill lo siam tawhah siam rem ngai a awm a nih chuan siam rem a nih tur thu te hi official Circular hmangin Dt. 01.06.2021 khan Circular tihchhuah a ni a, hei hi tualchhung chanchinbu, Local cable TV leh social media hrang hrangah puanzar a ni bawk a ni.

2. April 2021 thlaa eng chhit man hi JERC(M&M) in eng chhit man thar a bithliah hman tan hun chiah a ni a. P&E Department in bill a siam thin danah April thla a power kan hman man hi June thla ah bill thin a ni a, chuvangin a chunga tarlan Provisional bill pawh hi engchhit man thar hmang veka siam a ni.

3. Total Lockdown puan a nih tak avangin May,2021 thla laihawl vel atang khan Bill counter khar lailawk a ni a, khatih hun lai atanga Bill pe tawh lo tan chuan tun tum (July,2021 thla) a provisional bill lo chhuak hi thla thum bill tling khawm ( Principal amount leh lockdown hma lama arrear lo nei sa tan chuan chung arrear tel vek chuan) a ni tawh dawn a, tun tuma bill lo chhuak hi thlakhat bill anga lo ngai tan chuan a lang tam viau thei bawk a ni.

4.   Provisional bill siamah hian tihsual palh awm thei a ni a, bill chungchanga Complaint thehlut duh leh bill pe duh tan Sub Division Office bikah Bill Counter hi Dt.05.07.2021 atang khan hawn tan a ni leh tawh a, mamawhtu te tan mahni bialtu SDO office pan theih a ni e.


- DIPR
Post i hmuh dan

Post a Comment

0 Comments