PATHIAN LAMA DANGLAMNA CHUAN HUN A DUH

PATHIAN LAMA DANGLAMNA CHUAN HUN A DUH

- Rick Warren

- 7 July, 2021

“Mihring thar, thutak felna leh thianghlimnaa Pathian anga siam khan inthuam bawk ula.” Ephesi 4:24 

Thlarau lama ṭhanglian tura Pathianin a puih che khan, a kut zung ṭang hmangin a thawka vawi lehkhatah a lo thleng a ni ngawt lo a. Zawi zawiin a belchhah zel a ni. Pathianin pâ siam a tum khan darkar ruk a duh a, mahse oak thing siam tur chuan kum 60 lai a duh thung a ni.

Pâ nge nih i duha oak thing nih le?

Thlarau Thianghlim chuan i ngaihtuah phak bakin a ti danglam thei che a ni, mahse zan khat thil thuah chuan a lo thleng dawn lo a ni. 

Saddleback Kohhranin “kum 10 chhung thil tum” kan neih khan ka ṭawngṭaina chu: Thlarau Thianghlim leh Pathian Thu hnathawh kal tlangin, kohhran hnuaia pawl intelkhawm te puihna nen – kan kohhran chu puitling zawkin, Krista ang zelin, kum 10 chhunga kan tum chu kan hlen zel ang tih hi. 

I tana ka ṭawngṭaina pawh chutiang tho chu a ni: kum 10 hnuah chuan thlarau lama puitling zawkin, Krista ang zelin, chhan neiin ilo ṭhanglian zel ang.  

Rilru, taksa, thlarau, ngaihtuahna leh sum leh paia i chak deuh deuh ka duh a, mahse nangmah ngei pawhin tumna i neih a ngai a ni. Bible chuan, “Mihring thar, thutak felna leh thianghlimnaa Pathian anga siam khan inthuam bawk ula,” min ti a ni. Ephesi 4:24

Hei hi Isua kan anna tur chu a ni. Isua kan anna leh hriatnaa min daltu awm thei thil hlui leh kawng hlui te chu kan paih zel a ngai a. Mihring thar chu Thlarau Thianghlim hmangin kan inthuam ang a. Tichuan Pathian chu keimahniah a lo thawk dawn a ni, a rei zawng chu eng chen pawh ni sela.   

Eng nge a rah ni ang? “Lalpa Thlarau keimahnia a thawh ang zelin, amah chu kan ang deuh deuh ang” (2 Korinth 3:18) 

Han ngaihtuah la

Krista hre zual zel turin eng “thil hlui leh kawng hlui” i neih te nge i paih ngai?

A taka “thil thar” i inthuam theih tur thil te chu eng te nge ni ang? 

Engtiangin nge Pathian chu i nunah hna lo thawk se i tih? Amahah chuan i innghah theih nan leh i nuna Pathian thil tum chu i hriat theih nan puih dil la, ṭawngṭaiin ngen ang che.

Isua hi ila ring lo va, amah chu ila zui lo a nih pawhin, nakin hun nghah kher a ngai em ni? 

I sualna avang chuan Pathian nen ṭhenhran in ni a. Pathian khawngaihna avang chauhin amah nena inlaichinna ṭha chu i nei thei chauh a ni. 

Bible chuan, “Rinna avanga khawngaihnaa chhandam in ni; nangmahni thawhchhuah a ni lo va, Pathian thilpek a ni; thiltih avang a ni lo ve; chuti lo chuan, miin an chhuang dah ang e,” a ti. (Ephesi 2:8-9)

I siamtu nena inremna neih chu i duh a nih chuan, hetiang hian ṭawngṭai ang che. 

“Isua duhawm, ka rin che chuan, ka thil tih sual engkim hi min ngaidam ang tih i intiam angin min ngaidam ang tih ka rin avangin ka ring che a ni. Ka nun awmzia te ka zir anga, i vanin nuamah chuan min lo pawm ve ang che.

“Ka sualna te ka puang a, min chhandamtu i nih ka ring e. Ka sualna te ka puan chuan min chhandam ang tih i intiam angin ka ring che a. Chhandamna chu rinna avang chauh leh ka thil tih dang vang a ni lo tih ka ring bawk e. Ka Lalpa atan ka ring che a ka pawm ta che a ni. Vawiinah hian ka nunna engkim hi i nunah ka rawn pu lut ta a.

“Min siam ang ngeiin awm ka duh a, mahni rawng bawl ai chuan dam chhunga i rawng bawl hi ka thlang ta zawk a ni. I ang chhunga min pawm tur leh min chhandam turin ka nunna tlawm tak hi ka hlan a che. I hmingin ka dil a che. Amen."

A chunga mi ang khian i ṭawngṭai a nih chuan, hetah hian min lo hrilh ang che – Rick@PastorRick.com. Isua nena hun i hman zel theih nan thil ṭangkai tur a thlawnin ka lo thawn ang che. 

[Lettu: Sangpuia]

Post a Comment

0 Comments