Health Minister hovin COVID-19 chungchang thil pawimawh sawiho; 2nd wave-ah naupang hri kai 2865 an awm tawh!

Aizawl | July 7, 2021: Vawiin khan Health Minister Dr. R. Lalthangliana hovin SAD Conference Hall, MINECO-ah Mizorama COVID-19 hri hri leng mek chungchanga thil pawimawh chi hrang hrang sawiho a ni a. He hunah hian Medical Operational Team Chairman Dr. ZR Thiamsanga, MLA, Health Secretary Pu R. Lalramnghaka, Health department hotu pawimawhte bakah National Health Mission hotute, DP&AR leh Finance Department hotute, ZMC a damlo enkawltu daktawrte, Indian Medical Association, Non-Government Hospital Association of Mizoram, Association of Physicians leh Aizawl Civil Hospital aiawhte an tel a ni.


Health Minister Dr. R. Lalthangliana chuan Mizoramah COVID-19 hri kai kan la tlakhniam hleih theih loh rualin kan ngaih pawimawh ber tur pakhat chu hri kaite nunna chhanhim a ni a, chutih mek laiin mithiamten hripui thawh thumna (third wave) lo thleng leh ngei tura an sawi avangin kan tlin ang tawk chinah a tha thei ang bera kan inbuatsaih a ngai a ni a ti a, third wave atana Mizoram sawrkar inbuatsaihnate pawh tluang takin a kal mek tih a sawi bawk a ni.

Vawiin meetingah hian Sawrkar laipuia Ministry of Health & Family Welfare in third wave lo thleng tur chungchanga naupangte enkawlna tur inkaihhruaina tunhnaia a siam “Guidelines on Operationalisation of COVID Care Services for Children & Adolescents” thlirho a ni a. He inkaihhruaina tharah hian damdawi in hrang hranga naupangte enkawlna tur khum siam belh dan turte, naupang damlo enkawlna tura hmanrua leh damdawi inruahman dan turte, naupang damlo awmpuitute chungchangte leh khawtlanga inkaihhruaina leh inzirtirna kalpui dante bakah thil pawimawh chi hrang hrang tarlan a ni.

COVID-19 first wave (April 2020 – February 2021) chhung khan India ramah naupang kum 10 hnuai lam COVID-19 hri kai mi 3,68,117 an awm a, second wave (March, 2021 – June 21, 2021) chhungin naupang kum 10 hnuai lam COVID-19 hri kai 5,68, 767 an awm a ni. Hetih lai hian kum 10 – 20 inkar first wave chhunga hri kai mi 9,05,807 awmin, second wave chhung June ni 21 thleng khan hri kai mi 15, 67,972 an awm thung a ni. Mizoramah chuan 1st wave chhungin naupang hri kai mi 513 an awm a, second wave chhung hian 2865 an awm tawh bawk a ni. Naupangte tan vaccine a la pek chhuah theih loh avangin anni hi third wave lakah ven fimkhur lehzual an ngai dawn tih sawi a ni. Mizoramah chuan naupang (paediatric age) mi nuai 4 vel awm anga chhut a ni.

Sawrkar laipuia mithiamte chuan 1st wave leh 2nd wave ah naupang hri kai zinga 2 – 3% chu damdawi ina enkawl ngai an ni tih an tarlang a, an hisap dan chuan third wave ah naupang hri kai zinga 5% vel damdawi ina enkawl an ngai dawn a, 95% hi chu symptom nei lo leh symptom nei nasa lo, Home Isolation emaw, CCC emaw a enkawl ngai an nih rin a ni a. 3% hi moderate case, damdawi ina oxygen nena enkawl ngai turn i a chhut niin, 2% hi damlo serious, ICU/HDU a enkawl ngai ni tura chhut a ni. Naupangte COVID-19 hri kaite, hri an kai hnu kar 2 - 6 inkara MIS-C an vei theih avangin he natna veite enkawlna tur hmun lo ruahman lawk a tul thu guidelines ah hian tarlan a ni.

Third wave lo thleng tur chungchangah mipuite hnena inzirtirna tha taka pek a tul thu meetingah hian tarlan niin, hemi atan hian ASHA leh Health Worker te training pek tawh an nih thu tarlan ani bawk a, Paediatrician te chu CCC-ah teleconsultation hmanga rawn theih tura ruahmanna siam tur niin, DCHC ah chuan on-call duty an nih a ngai dawn bawk a ni.

Naupang enkawltute, a bikin an chenpuite hnenah naupangte venghim tura uluk taka zirtirna pek a tul thu sawi a ni a, vaccine an lak ve loh avangin fimkhurpui hle an ngai tih tarlan a ni a, a bikin asthma, lung tha lo, chuap pawp leh natna benvawn dang neite ven fimkhur ann ngai zual tih tarlan a ni. Hetih rual hian kum upate leh natna benvawn neite hlamchhiah loh tur a nih thu sawi a ni bawk.

ZMC ah naupang enkawlna tur ICU khum 25 leh COVID ward khum 60 awmna ruahman mek a nih thu tarlan a ni a, Aizawl Civil Hospital-ah pawh Paediatric Intensive Care Unit peihfel tawh a nih thu tarlan a ni a, District hospital pawh a theih ang anga naupang enkawlna tur ward ruahmanna siam mek a ni.
Meetingah hian July ni 6, 2021 thleng khan Mizoramah vaccine dose 615646 pekchhuah tawh a nih thu tarlan a ni a. First dose la, second dose hmabak mi 549233 leh awmin full dose la mi 66413 an awm tawh a ni. Electoral roll thar ber atanga chhutin Mizoramah vaccine la thei (kum 18 chunglam ) mi 775106 an awm a, heng zinga mi 549233 (71%) hian vaccine an la tawh a, full dose la tawh hi 12 % an ni. Vaccine second dose pek chhuah mek niin, vaccine stock a awm that thu tarlan a ni bawk.

Raipuarte vaccine pek chungchangah sawrkar laipui a fimkhur tih tarlan niin, sawrkar laipui duh danin vaccine petute tunkar chhung hian training uluk taka pek an ni a, karleh atang chuan pekchhuah tan theih tum a ni. Raipuarte hi vaccine pek an nih hmain uluk taka counselling neih pui tur a ni a, anmahni duhthlanna ngeiin pek chauh tur an ni.
ZMC daktawrte chuan damlo an enkawl dan leh an buaipui dante an sawi a, damlote an enkawlna kawnga damdawi an mamawh ang chi sawrkara an thlente rang taka ngaihtuah sak an nih avanga lawmthu sawiin, damdawi chan har leh man to tak takte sawrkarin a chah thlen sak chu an lawm tak zet tih an sawi. Tun dinhmunah damlo serious a hma anga an tam tawh loh thu tarlan niin, inthlahdah hauh lova theihtawp chhuah reng turin an infuih leh a ni.

- DIPR

Post a Comment

0 Comments