MNF Tuirial West block-in Sethawn CCC chaw dawn enfiah

Aizawl | July 17, 2021: MNF Tuirial West Block chuan vawiin khan an president Pu B Sakhawliana hovin Covid 19 hri kai te awmna Sethawn Jordan Centre Chaw dawn chu a hmuna kalin an enfiah a ni.

Thudawn danin, Enfiah lai hian Chaw supply thintuten Chaw an lo pe dawn mek a. Kolasib atangin Dr Lalhlimpuia CMO a tel bawk a ni.

MNF Tuirial west block hian, Social Media thenkhat-ah Chaw leh Dal leh Fanghma zai lep khat chiah dawng anga thlalak darh chu enfiahin, a hmuna awm Medical lam Deptt leh venghimtu Security te chuan nitin-a an chaw dawn chu Dal leh Thlai (Hnah leh Rah) bai a ni tih an lo hrilh.

Sethawn CCC  chaw dawn anga darh chu

An thuchhuahin a tarlan danin, Chaw supply tu te chuan zing leh tlai-ah Chaw bakah Dal leh Bai an pe a; a changin Fanghma an dah tel a; a changin Pickle lam chi an dah tel bawk a, kar khat ah Sa vawi hnih an pe thin tih an lo hrilh a ni.

"Chaw ei man hi Rs 100/- chauh a.nih avangin chaw hmeh duhthusama tam leh tui chu a theih loh mai thei tih chu hriat sak an ni." tiin thuchhuah chuan a tarlang bawk.

MNF Tuirial West Block hruaitute chuan, zing chaw inpek hun chu a tlai lutuk deuh a; CCC ah hian naupang te an awm si a; chuvangin a tlai berah dar 10:00 hma-in zing chaw inpek theih nise an duh thu Chaw supply tu te hnenah an hrilh a. Chaw leh chawhmeh an pek te chu thianghlim (fresh) tak nise an duh tih an hrilh bawk.

"Chaw sem lai mek hian mi 15 vel in Chaw an chang lo tih a chhunga awm ten an sawi a; Chaw supply tu te chuan a belhna (Extra) an dah te pawh an pek belh leh a. An inchan kim ta a. Mahse a hnu lawk-ah mi thenkhat chuan an Chaw dawn chu a Hing tih an rawn sawi leh a; Block hruaitute chuan Chaw Supply tu te chu theih tawp chhuah turin kan chah zui ta a ni." tiin thuchhuah chuan a tarlang.

MNF Tuirial West Block hruaitute chuan Chaw Supply tu te hnenah hian nitin-a Chaw leh Chawhmeh an pek ang thlalak (photo) chu thawn ziah turin an hrilh bawk a ni.

Seṭhawn hi Kolasib district chhunga awm niin, Thingdawl khua, Thingdawl VC hnuaia awm a ni.