Mizoram governor kal chhuak PS Sreedharan Pillai thlah

Aizawl | July 10, 2021: Kum 2 dawn Mizoramah hun a hman hnuin Governor P.S. Sreedharan Pillai chuan a hna thar zawm turin Mizoram a chhuahsan ta. Governor thlahliamna hun hian Chief Minister Pu Zoramthanga chuan Helipad, Thuampui-ah a buatsaihsak nain khawchhia avangin Raj Bhavan lamah chawpchilh takin buatsaih a ni leh ta zawk a ni.


Chief Minister Pu Zoramthanga leh amah tawiawmtu Dr R.Lalthangliana, Health Minister leh Pu Lalruatkima, DIPR Minister te chuan Governor Pillai leh Lady Governor Retha Sreedharan Pillai te chu Raj Bhavan-ah lenchilhin ngaihhruihna thilpek an pek bakah an hna thar tur tha taka an thawh theihna turin duhsakna an hlan nghal bawk a ni.

CM Zorama'n Guv Pillai thipek a hlan

Governor P.S. Sreedharan Pillai chuan Mizoramah kum 2 tling lo hret awm mahse Mizoram leh Mizo mipuite chu a ngaina hle a, a hriatreng tawh tur thu a sawi a. Mizoram a rawn thlen atanga reilote chhungin amah leh a chhungte chuan Mizoram mawi an tih baka nuam an tih thu a sawi a ni. Hun reilote chhunga Mizoram dung leh vang a fang chhuaka, Mizoram  hmun hrang hranga mipuite nen an inhmelhriat thei chu vannei a inti hle a. Mizoram Governor a nih hnu rei vak loah Covid -19 hripui a rawn leng nghal tih sawiin he hrileng dona kawnga Mizoram sawrkar hmalakna te chu chhuanawm a tih thu Chief Minister Pu Zoramthanga chu a hrilh a ni. Covid -19 hrileng a la reh loh avangin Mizoram mipui te pawh sawrkar tha taka thawhpui chhunzawm zel turin  a ngen a. An awm chhung rei lotea Mizoram mipui te duhsakna leh thlawpna te, Chanchinbu miten tha thaka an thawpui avang tein lawm thu a sawi a. A awm loh hnuah pawh, a hla thu chham, Mizoram mawi a tihzia a phuahchhuahna “Oh, Mizoram” chu chhiar a nih chang apianga amah hrechhuak leh thin turin ngenna a siam bawk a ni.

Health minister Dr Thangtea'n Guv Pillai thipek a hlan

Chief Minister Pu Zoramthanga chuan hun reilote an awm chhunga Mizoram leh mipui tan theih tawp an chhuah avangin Governor Pillai leh a nupui chu lawmthu a hrilh a. Covid-19 hripui leng avanga hun harsa State in a paltlang laia Raj Bhavan lam pawn a remchan dan ang anga theihtawp an lo chhuah thin chu lawmawm a tih thu a sawi bawk a. Mizoram mipui ten Governor Pillai te nupa chu an awm chhung reilo mahse an hre viau hman nia a hriatthu a sawi a. State hotu luber a nih anga a hna tlin taka a thawh bakah Lehkhabu ziakmi a nih anga a hlawhtlinnaah te Governor chu a lawmpui tak zet tih a sawi a. A hna thar pawh tha taka thawk chhunzawm zel turin duhsakna a hlan bawk a ni. 

Kum 2019 October 25 khan President of India chuan Governor P.S. Sreedharan Pillai chu  Mizoram state a nih hnua Governor 21-na atan chuan a ruat a.  5th November 2019 khan Raj Bhavan-ah rinawmna thu tiam tirin Mizoram Governor atan lakluh a ni. Tunah hian Mizoram Governor thar Dr Kambhampati Hari Babu chuan a hna thar a rawn zawm hnai nia hriat a ni a. Tun thla chawhnu lamah Mizorama rawn chhoh hman beisei a ni. Dr Kambhampati Hari Babu hi Vishakhapatnam khawpui, Andhra Pradesh a cheng mek a ni a. University-ah te Associate Professor dinhmun a han thlen hnuah Politics-ah a zuang lut a. 16th Lok Sabha-ah khan Vishakhapatnam bial atangin MP, Loksabha a lo ni tawh a ni.













- DIPR

Post a Comment

He post chungchanga i ngaihdan lo sawi ve rawh:

Previous Post Next Post