ARGENTINA, ARGENTINA, Aw....ARGENTINA, AYALA

(Copa America Final - Argentina v. Brazil. @11.7.2021 5:30 A.M.)

- K Remruatfela (Fela Ayala)

Kum 1994 World Cup-a ruihhlo vanga Maradona an thawn haw a, Second Round-a an tlak lai khan kum 3 mi lek ka la ni a. Mahse, chu thil thleng chu mumang hriatin ka la hre deuh riai ruai. Khata tang khan vawiin thlengin eng game pawh ni se,  Argentina hming an put tawh phawt chuan ka la tan char char a ni.

Kum 1998 World Cup erawh In khat veka an en thin avangin ka hre ve ta hle a. Chuti lutuka beiseina ka neih san loh tehlul nen group stage a an chet that em avang khan beiseina min pe sâng hle a. Ayala, Batistuta, Cannigia, Ortega, Simeone, Veron, Sensini, Carlos Roa,  Gallardo etc. te inkawp khan thil ropui tak an tihtheih ka rin vangin, ka beisei pawh a sang hle. Mahse, Quarter Final-a minute 89 naa Ayala kapkâra Dennis Bergkamp in Holland chakna Goal a thun khan chu ka beiseina chu vaivutah a chang ta a, vawiin thlenga You tube a ka en let pawhin ka mittui a la tla hial thei!

Kum 2002 World Cup erawh ka hre chiang tak zet tawh. Qualifying match-a an chet that em avangin khami tum kha kan Champion kum turah ka lo puang ringawt a. Mahse, a dawn tepa khawvela ka Defender duh ber, Roberto Ayala a inhliam tih ka hriat chiah khan ka beiseina chu thingkawrawng ang maiin a ruak zo ta a. Mahse, a position-a khel tur Pochetino kha ka mi hriat chian, defender rintlak tak ni-a ka hriat vangin beiseina nung chu ka la nei set set a. Chubakah an defender ho Samuel, Zanetti, Placente leh Pochetino te inkawp tluk baka sut tlang harsa an awm kha ka lo ring vak lova. Tin, midfield lamah lah Veron, Ortega, Simeone, Sorin an la nei bawk a. Forward ah lah Batistuta, Crespo, Lopez… Champion beiseiawm tak an ni. Mahse, beiseina a thlâwn leh ta!

Kum 2006 World Cup kha beiseina ka neih chaurau ber tum a ni hial âwm e. Mahse, Roberto Ayala a khel dawn tih ka hriat vang khan miracle a thleng thut chu ka beisei ru reng tho a. Midfield ah duhthusam vak lo mah se, forward ah Saviolla, Tevez leh Messi an awm vang khan attack ah chuan an hlauhawm khawp ka ring a. Riquelme te an khel chhe lo bawk a, beisei aiin an thleng sang fu a, mahse Quarter Final ah Portugal lakah Penalty in an tlâwm ta  a nih kha!

Kum 2010 World Cup kha chu khawvela footballer tha ber ka tih Maradona hova hmachhawn tur an nih vang leh tleirawl (Rawlthar ni lovin) rual an nih hlawm avang khan beiseina ka nei sang hle a. Beisei ang ngeiin an khel tha chho reng a. Messi, Hiquian, Tevez, Di Maria, Mascherano te ho chevel kha khawvelin a thlir khamlo a nih kha! Mahse, Maradona risk lak sual avangin Germany lakah namen lovin kan vanduai leh ta si a, a van pawi tehlul em!

World Cup 2014 ah erawh  Messi thiam filawr lai tak a ni bawk a. Lallukhum kan chan ngei kha ka ring nghet bur. Kan forward ho ka thlir khan, khawvela tha ber ber hlir – Messi, Aguero, Higuain, Tevez, Lavezelli te an ni dawn a. Midfield ah lah senior player Mascherano hovin Di Maria te an ni dawn bawk a. An defender lam kha chaurau deuh mah se beiseina ka nei sang hle a. Final hial kan thleng ta hial reng a. Champion kan hlat tawh lo tehreng nen hun tawp dawnah Gotze'an beiseina beidawng min siam a. Mittui nen German players leh an bialnu chhelo tak takte che vel kan thlir ta ringawt a nih kha! 

Kum 2018 World Cup a lo thleng leh a. Sawi thui ngai lovin second Round atangin World Cup a tâwp ta ringawt a nih kha! Roberty Ayala mittui a hnâm a, ka mittui pawh a tla. Roberto Ayala nena kan mittui far kha tu in nge min hrûk hul sak ta ang? Pakhat tal in awm lo'm ni???

Kum 3 zet mittui a luan hnuah Argentina chuan kan hmelma kumhlum Brazil lak ata an Nomawi lâksak turin hun tha a rawn inher chhuak dâwn ta! Argentina thinlunga neitute tan chuan naktuk i.e. ni 11 July, 2021 zing dar 5:30 Copa America Final awm tur hi hun pawimawh ber a ni kumkhua tawh ang. Chumi hun a lo thlen chuan lungngaihna vanga kan mittui a hul ang a, lawmna avangin kan mittui a luang tawh zâwk ang.

*Argentina...Argentina....Aw..................Argentina...Ayala.*