Aizawl 19th July 2021: Vawiin tlai dar 4:25 khan Mizoram Govenor 22-na atan Dr Hari Babu Kambhampati chu lakluh a ni.
Mizoram Governor thar Kambhampati Haribabu hian vawiin chawhnu khan Mizoram a lo thleng a.
Lengpui Airport-ah tluang takin rawn tumin Hon'ble Chief Minister Pu Zoramthanga, Health minister Dr R Lalthangliana, Chief secretary Pu Lalnunmawia Chuango, Mizoram Director General of Police SBK Singh leh Secretary to Governor V Lalsangliana, Brig. Digvijay Singh, SM, Sector Commander, 23 Sector, AR leh officials dang ten an lo hmuak a ni.
Governor Dr. Kambhampati Haribabu Raj Bhavan-ah Deputy Chief Minister Tawnluia, Home Minister Lalchamliana, leh Governor's Secretariat ten an lo hmuak a, Mizoram Governor 22-na atan lak luh a ni.
Vawiin tlai khan Dr Kambhampati Haribabu chu rinawmna thu tiam tir a nih hnuah Mizoram Governor 22-na atan lakluh a ni a. Aizawl khawpui huam chhungah Pathianni zing(18.07.2021) atanga Total Lockdown puan a nih leh tak avangin Governor thar lakluhna inkhawmah hian sawm bik mi tlem te chiah an tel thei a ni.
Chief Justice of Gauhati High Court aiawhin Justice Michael Zothankhuma, Judge, Gauhati High Court chuan rinawmna thu tiam tirin Dr Kambhampati Haribabu chu Governor atan a la lut a. President of India in Dr Kambhampati Hari Babu, Mizoram Governor atana a rawn ruatna chu Pu Lalnunmawia Chuango, Chief Secretary chuan a chhiar chhuak a. Hemi hnu hian Upper Lawn, Raj Bhavan-ah Governor hi thla lak pui a ni. Aizawl khawpui huam chhungah inkhuahkhirhna khauh tak kalpui a nih avangin Governor lakluhnaah hian mi tlem te chauh an tel a. Chief Minister Pu Zoramthanga, Deputy Chief Minister Shri Tawnluia, Speaker Shri Lalrinliana Sailo, Council of Minister te, Chief Secretary, DGP, Political Party aiawh hruaitu pakhat theuh, NGO lian deuh te aiawh hruaite pakhat zel te chiah an tel a ni.
Kambhampati Haribabu hi June 15, 1953 khan Thimmasamudram, Prakasam District, Andhra Pradesh-ah a piang a. A nu leh pa te chu Pu Kambhampati Venkateswarlu leh Pi Seethamma niin a nupui Pi Kambhampati Jayasree nen fanu pahnih an nei a ni. An khuaah Sikul te a luh hnuah zirna sang zawk zir turin Visakhapatnam khawpuiah a insawn a. Helai hmuna Andhra University-ah B.Tech (Electronics and Communication engineering), ME (Electrical &Control Systems) leh PhD(Control Systems) te tha taka zirchhuakin zirtirtuah a tang chhunzawm nghal a. Associate Professor a nih hnuah pawh kum 24 lai chu he University chhunga Engineering College-ah a thawk hman a; he hna a thawh lai hian mipui rawngbawlna huang zau zawkah luh duhna neiin politics-ah a in hmang chho ta a ni. Politics huanga a luh hnu hian a hlawhtling chho hle a, Visakhapatnam-I bialtu MLA a nih lain kum 2003 khan Assembly House-ah Floor leader te a ni thin a. Hemi hnuah hian kum 2014 khan President, Andhra Pradesh State atan thlan a ni a; kum 2014 khan 16th Lok sabha chhunga Vishakapatnam khawpui bialtu Member of Parliament(MP), Lok Sabha atan thlan tlin a ni a. Governor atan ruat a nih hma hian India ram pum huapa dinhmun pawimawh tak, BJP National Executive Member (2018-2021) a ni thin a ni.
Mizoram Governor thar lakluhna Live:
Governor thar hi July 6 khan President Ram Nath Kovind chuan state dang 4 Governor turte nen a ruat a, Hari Babu Kambhampati hi Andhra Pradesh atanga Lok Sabha member hlui a ni.
Union Cabinet tihdanglam dawn vang khan Governor te sawi danglam hmasak an ni a. Governor dinhmun sawi danglam a nih rual hial Union minister nilai chu Governor atan ruat a ni thung!
Union Minister for Social Justice and Empowerment leh BJP Rajya Sabha leader Thawarchand Gehlot (83) chu ministry atanga lachhuakin, Karnataka Governor atan ruat a ni.
Mizoram Governor PS Sreedharan Pillai chu Goa governor atan ruat a ni a. Haryana Governor Satyadev Narayan Arya chu Tripura Governor atan ruat niin, Tripura Governor Ramesh Bais chu Jharkhanda-ah governor atan dah ani thung.
Himachal Pradesh governor nilai Bandaru Dattatraya chu haryana Governor atan ruat a ni a, Hari Babu Kambhampati chu Mizoram Governor atan, Mangubhai Chhaganbhai Patel chu Madhya Pradesh governor atan ruat niin, Rajendra Vishwanath Arlekar chu Himachal Pradesh governor atan ruat a ni.
- Pic : Raj Bhawan / DIPR
Post a Comment
He post chungchanga i ngaihdan lo sawi ve rawh: