Mizoram-ah Covid hrik thar Alpha variant leh Eta variant hmu!

Aizawl | July 21, 2021: Mizoram-ah Covid hrik thar Alpha variant leh Eta variant  hmuh a ni. Heng variant te hi Aizawl District ah pakhat ve ve hmuh a ni a. Eta variant death rate hi 2.7% a ni a, Alpha  variant death rate hi 1.9% a ni.

Mizoramah Covid-19 hrik thar - Alpha, Eta Variant kai an awm tih finfiah thar a ni. Delta Strain kai an awm tih finfiah a ni tawh a, tuna result tharah pawh hian delta strain kai an awm leh tih hriat a ni bawk. :Covid-19 state nodal officer Dr Pachuau Lalmalsawma

Vawiin khan Dr. Pachuau Lalmalsawma State Nodal Officer & Official Spokesperson on COVID-19 chuan COVID-19 hrik chhuak thar a awm leh awm loh finfiah tura Mizoram atanga COVID-19 positive te swab sample 100 Whole Genome Sequencing tura National Institute of Biomedical Genomics (NIBMG), Kalyani, West Bengal-a an thawn result niminah an hriat thu sawiin, sample 100 an thawn zinga 75 ah COVID-19 hrik thar chi thum hmuh a nih thu a sawi.

Heng hrik thar hmuhte hi Delta (B.1.617.2) variant – 73,  Alpha (B.1.1.7) variant – 1 leh Eta (B.1.525) Variant – 1 an ni.

Aizawl district a sample lak 70 zingah sample 56 hi Delta variant niin, Alpha leh Eta variant 1 ve ve an ni.

Lunglei district a sample 10 lak zingah sample 9 hi hrik thar niin Delta variant vek an ni .

Kolasib district a sample 10 lak zingah sample 5 hi hrik thar niin Delta variant vek an ni .

Serchhip district a sample 10 lak zingah sample 3 hi hrik thar niin Delta variant vek an ni .

Dr. Pachuau Lalmalsawma chuan zirchianna neih tawh chinah Delta Variant kai zinga 0.1% in nunna an chan tih sawiin, Alpha Variant kai zinga 2% leh Eta Variant kai zinga 2.7% in nunna an chan tih a sawi.

Alpha  leh Eta Variant te hi United Kingdom atanga lo piang chhuak a nih avangin ram pawn atanga khualzinte rawn ken luh, kan inkaidarh tak a ni tih a chiang a ni,  a ti a. Tunah hian COVID-19 hrik chi dangte pawh Mizoramah a lo awm ve tawh em tih hriat tumin hma lak zel a nih thu sawiin, July ni 15, 2021 khan COVID-19 hri kaite sample 151 chu Whole Genome Sequencing tura National Institute of Biomedical Genomics (NIBMG), Kalyani, West Bengal-ah thawn leh tawh a nih thu a sawi.

Variant chhuak thar zingah Eta variant chu a hlauhawm bik lehzual tih sawiin hri kai zinga 69% chu ICU a enkawl ngai an ni thin tih a sawi a, Delta Variant hi khawvel ram tinah a awm tawh tih sawiin, Alpha Variant hi ram 175 ah hmuhchhuah tawh a nih thu leh Eta Variant hi ram 67 ah hmuhchhuah a nih tawh thu a sawi a ni.

Mizoramah pawh district hrang hrangah heng hrik thar hi a awm theih tawh thu sawiin, mipuite chu fimkhur lehzual turin an ngen a, COVID-19 hri laka invenna tura sawrkarin inkaihhruaina a duante chu uluk taka zawm turin a chah a ni.

Whole Genome Sequencing tura Mizoram atanga sample thawn tawh dan chu hetiang hi a ni :

1.       March, 2021 – sample 69 thawn niin variant thar hmuh a ni lo

2.       April, 2021 – sample 217 thawn niin Deta Variant 4 hmuh a ni.

3.       June, 2021 – sample 100 thawn niin Delta Variant 73, Alpha Variant 1 leh Eta Variant 1 hmuh a ni.

4.       July ni 15, 2021 – sample 150 thawn niin result hriat a la ni lo.

Dr. Pachuau Lalmalsawma chuan sample thawnna hmun National Institute of Biomedical Genomics (NIBMG), Kalyani, West Bengal chu India hmarchhak State 8 in kan intawm avangin sample test hian hun a duh rei deuh thin a, result kan hre har deuh thin tih a sawi bawk a ni.