COVID-19 | Hripui vangin mi tam takin Aizawl Khawpui an chhuahsan!

Aizawl | July 21, 2021: Hripui vanga hna thawk thei tawh lo mi tam takin Aizawl chhuahsanin mahni khaw lam an pan.

Kum 2020 April 9 a ni a Mizoram Sawrkarin thingtlang lam mi, Aizawl khawpuia ei zawnna avanga inbengbel, hripui vanga linkharkhip a nih hnua eizawnna kalpui thei lo leh hna thawk thei tawh lote tan mahni khaw lam panna hun a hawng a. He ni hian mi tam tak chuan Zofate Jerusalem chhuahsanin mahni khaw lam an pan a ni.

krismas-ah chauh mahni khuaa haw thin te leh kum tam tak hmasawnna uma eizawnna avanga mahni khua hmu tawh lote pawhin hripui vangin mahni khaw lam an pan a lo tul ta a ni.

He thlalak Biaka Ralte-in a lak hi Covid 19 vang a hnathawk thei lo te Aizawl chhuah sanin mahni khua pan tura Vanapa Hall kawt leh a chhehvela April 9 , 2020 a an inbuatsaih lai a ni.

Thlalak source: https://biakaralte.blogspot.com/

Khualzin lirthei-te an tlan loh avangin Mizoram sawrkar hnuaia department leh zirna in lirtheite chu hman a ni a. Khaw hrang hrangin haw tur inzawngkhawmin chung haw turte chuan mahni chuanman theuh intumin Mizorama la thleng ngai lo 'Haw Runpui' a thleng a, Mizoram hun chhiara Aizawl khawpui atanga Thingtlang pan tam ber tum nia sawi a ni hial a ni.

In luah man chu sawi loh mahni ei tur pawh thawhchhuah a theih tawh lova, Aizawl khawpuia awm reng kha an tan a rem tawh si lova, ngai leh thlahlel takin hripui vangin Aizawl an chhuahsan a lo tul ta a ni.