LOCKDOWN | Kámding ni vè ila, December 31 thleng ‘pawh sei’ law law ka va’n châk vè dáwn tak!

Kámding ni vè ila, December 31 thleng *‘pawh sei’* law law ka va’n châk vè dáwn tak!
Kár hnih khauh lehzuala min khàr-khum (inkhalh hnan?) chhúng hian eng hma lâkna lian nge (sawrkar hian) a neih? A lian ber nia ngaih theih, test rûnpui ang hi, khawsak phung pangngaia khawsa chungin a tih theih tho loh em ni? Vairengte daia force lam intirh belh bâk eng nge a tih dang? Mi rethei leh thla bi hlawh nei ve lo tán ruahmanna tha deuh a siam thar em aw?


Electric leh tui bill discount chu ring lo leh zêl phawt ila. Sawrkar hna zawng lai tána kum bithliah tih hniamsak pawh ‘an tih’ rin ngam a harsa khawp ang (an ngaihtuah phâk pawh ka ring teuh lo)! Ni tin inhlawhfa leh mistiri-te hrawk hi an la rehsak zêl dawn em? A nih leh, thawmhnaw leh bungraw zawrh tùr chah thleng ve tê tê te hi an thawmhnaw leh bungrua an dah hmuartír uar dáwn nge le?

Mipui dàwrtu/hmangtu (consumer) chhuah khap chunga public transport—taxi, 2 wheeler taxi leh city bus tlàntír ang style kha an thiam ve tâwk chauh a ni leh palh hlauh ang e aw! _Fair_ taka thawk loa ei hmu lo chêpna khawvêl ni sâ rengah, he lockdown hian nasa leh zualin chûng mite khawvêl chu a hmer chêpsak lehzual a. Rilru lam a khawih pha dáwn hiala ‘anni'n’ an ngaih lai hian, nasa takin a khawih hrep tawh tih hriatsak rawh se! Patlingin calendar a en vang vang tawh chinah chuan, sawrkar lam auhin awmzia a nei meuh tawh lo a, “Eng chen nge maw ni zêl dawn, Lalpa?” tia mit tui nèna Chung lam auh bâk tih theih kan nei ve ta lo e! An insawi anga ‘An sawrkar chak tak’ hmalâkna hi nghah chi a ni si lo a le!

– Zirsangkima
July 31, 2021 / 6.00 p.m.

Post a Comment

0 Comments