Lo fimkhur hle rawh

(Sextortion through Video Call)

- Remmuana Chawngthu

Lo chhiar chhuak hram la aw...

July 8 2021 tlaiah khan facebook-ah Rohini Gupta inti (A fb profile leh thlalak hrang hrang aṭang chuan hmeichhe hmelṭha deuh a nih duh hmel tawp.) hian inbox lamah min lo bia a.

 Mizoram chungchang thil zawh tur nei anga insawiin, ka whatsaap nb min dil a, keiin ka lo pe ve ngawt pek a.

"I va mawl tak!" min lo ti ngawt su; fb-ah hian vai hi ṭhian tam tak (hmeichhia leh mipa) ka nei a, mahnia english zir ve nan ka hmang ve ṭhin a, english in thiam dan danin kan inbe ve hlawm ṭhin a, ka ṭangkaipui ve phian zel a, anni lam pawh an fel hlawm ṭhin hle a, whatsaap lamah pawh thil tam tak kan sawi ve nawk nawk hlawm thin a. Hetiang tur deuhah hian ka ngaih vang hi a ni pakhat a.

Zan a lo ni a,  zan tin deuh thawa kan lenna inah thianzahoa tennis (Wimbledon 21) khel kan en tui lai takin min rawn video call thut mai a, ka han lak chuan le.... 

Hmeichhe inla sexy deuh hi a lo lang a, a video chu a fiah lo hle, ka han thlek deuh vung vung a, "Engnge thil awmzia?" ka ti chhuak deuh phawng nghe nghe. Minute khat pawh a tlin hmain ka off nghal daih a.

Chumi hnu lawkah phone ka en leh chuan ka lanna kha a lo record a, thildang tenawm deuh deuh, zahmawh rawng kai  nen a edit kual hnu chu min thawn a, ka fb ṭhiante hnena thawn darh a, mi tih-mualpho a tum thu leh Rs 3000 ka thawn loh chuan youtube thlenga vawrh darh a tum thuin min lo vau ve khanglang a.

Hetiang thil mai mai a zam/chi-ai chi hi ka lo ni lo hlauh pek a, engmah ka hlauh loh thute in ka chhang a, a tawpah phei chuan, "I account nb min pe la, Rs nuai 10 ka lo thun ang" te ka va ti vel a, "Chutiang ka duh lo, Rs 3000 chu min thawn vat rawh" a ti ang lawi a.

Fb leh Whatsaap lamah ka block a, hetiang lam thil hre deuh tura ka biak ten thil awmdan min hrilh hlawm a, a lawmawm hle.

Hemi zana ka thil tawn hi tawitein fb lamah minute 10 chhung ka post lang a, ka fb friend zinga mi 6 zet chuan min lo inbox, anni pawh chu hetiang lamah an lo buai ve hlawm a lo ni pek a.Hahthlakin.😃

Thurawn min petu leh thil nih dan min hrilhtu ten ngawihbopui lo a, midangte tana fimkhurna leh hriatzauna anih theih nan, a ṭangkai thei tur zawk a thuziak turin min ngen hlawm a; thu tarlan tur pawimawh hrang hrangte ka dawn khawm hnuah a hnuaia thu pawimawh tak takte hi ka lo tarlan theih phah ta a ni.

Chhiar ngun hle rawh le👇👇👇

Tunlai hian inbumna chi khat, sextortion kan tih mai, hluar thar a awm a, hemi laka mipuite kan lo fihlima kan fimkhur theihna turin uluk takin lo chhiar rawh le.

*A kalhmang tlangpui chu hetiang hi a ni:*

1. Facebook / Instagram / Whatsapp etc velah Profile Picture-ah hmeichhe chhe lo deuh thlalak hmangin Friend Request i dawng anga.

 

2. Chumi account atang chuan Video Call request i dawng leh ang. A nih loh pawhin whatsaap lamah.

3. Video call i accept atang khan i screen an record reng tih hriat a pawimawh. (Screen Recorder te a awm tawh a)

4. Video call-ah chuan hmeichhia chuan kawr te a phelh maithei e, nang pawh in phelh ruaka sex chat kan tih mai hmang turin a thlem ang che. Mahse i screen kha an record reng tih hriat tur. 

5. Chutia in in-Video call lai an record chu pawisa i pek loh chuan i Facebook / Whatsapp contact te hnenah tih leak-out / thehdarh tumin an vau let leh dawn che ani.

*Hriattur pawimawh te:*

1. Facebook/Instagram etc ah i mi hriatchian loh te Friend Request accept suh.

2. Number hriatloh emaw atanga Video Call i dawn chuan pick up loh a him.

3. Video Call ah hian mi tupawhin screen an record thei reng tih hriat a pawimawh.

4. Online-ah inbumna a tam tih hre rengin i fimkhur tlang ang u.

Lo fimkhur hle rawh aw..

Ka lawm e.

👇👇👇

Cyber Crime Police Station,

PHQ, Khatla,

Aizawl, Mizoram.

Ph  : 0389  2333656

Mob  : 811 993 5420

Fb : facebook.com/CyberCrimePSAizawl

IG  : @cybercrime_aizawl