LLTF Visit Team-in AMC area LLTF te tlawh kual mek

Aizawl | July 8, 2021: Health Minister Dr. R.Lalthangliana ruahmanna kal zelah Aizawl DC Dr.Lalhriatzuali Ralte IAS chuan Aizawl Municipal Council  Area-a NGO, LLTF, MKHC leh Health Deptt. te ko khawmin AMC area-a LLTF zawng zawngte tlawh chhuaka an hnena lawmthu sawina leh infuih tharna hun hmangtu tur LLTF Visit Team a din a.

Heng team-te hian July ni 1, 2021 atang khan hma la tanin tunah hian Aizawl khawpui huam chhung veng hrang hranga LLTF 83 te tlawh chhuakin hun an hmang mek.

State danga awm ve lo 4C dinna kawnga LLTF hmalakna leh inpekna te, sawrkar an tawiawmna leh mipuite phurrit nasa taka chhawktu an nih avanga lawmthu sawi tur leh, an harsatna ngaihthlaksak bakah tul dang sawipui turin heng team pali te hi din an ni. Heng team li-ah te hian an vaiin member 25 awmin Aizawl khawpui zone 10-ah chan insemin heng mite hian an tuam mek a ni.

LLTF Visit Team te hian veng hrang hrang LLTF te hnenah Sawrkar thawhpuia theihtawp an chhuahna kawngah lawmthu sawi zelin chumi rualin an thu ken te hetiang hian an hlan pah zel bawk.

1) Sawrkar thuchhuah reng reng ngai pawimawh chhunzawm hram hram tur leh a bik takin Sawrkarin Containment Zone leh micro containment zone puan tula a hriat hunah pawh puang hreh lo tur leh a puan chin tawhah an harsatna tawh te hriatpui.

2) Mipuiin CAB tha taka an zawm theihna tura tan la tura ngen leh Alcohol Based Sanitizer chauh hmang tura in hrilh hriat.

3) A tam thei ang bera mipui zirtirna (awareness) neih leh social media hmanga thehdarh nasat lehzual.

4) Sawrkarin chawhmeh rate a bitukte uluk taka kenkawhpui tura ngen.

5) Vaccine lakna, chawhmeh Bazar, sample collect-na, leh khawsakhona-a social distancing kengkawh tha tura ngenna.

6) Covid -19 3rd Wave thleng lo tur hian mipui mimir kan pawimawh vek avangin, mask, social distancing leh hand washing/sanitize te hi mahni inchhungkhur thlenga i zawm tura inhrilh hriat leh zual.

7) Harsatna an neihte ngaihthlaksak bakah tuldang awm apianga beng chhit leh che chhuak thei reng tura inkau.

Heng thu keng hian tunah hian heng visiting team te hian Aizawl AMC Area LLTF te an tlawh kual mek a. An chanpual te an zawh vek hnuah an report te hi Pu R.Vanrengpuia, ADC (G) leh Pi K.Vanlalruati, ADC (E) hnenah an pe lut leh dawn a ni.