Health Minister hovin Covid Relief for Key Population hawnna hun hmang

Aizawl | July 8, 2021: Vawiin khan Health Minister Dr R.Lalthangliana chuan PWNM, MISNOPP, MDUF leh YWCA te buatsaih “Covid Relief for Key Population” hawnna programme Positive Women Network of Mizoram (PWNM) office, Aizawlah a hmanpui.


Dr R.Lalthangliana chuan Community Based Organisation hrang hrang - YWCA, Positive women network of Mizoram (PWNM), Mizoram Drug User Forum (MDUF), leh Mizoram State Network of Positive People (MISNOPP) ten HIV/AIDS dona kawnga an thawhhlawkzia Sawrkarin a hriatpui tih sawiin an chungah lawmthu a sawi a. COVID hri leng mek do kawngah YMA, kohhran leh khawtlanga mi zawng zawng kan tangrual ang chiah hian HIV/AIDS dona kawngah tanrual a tul tiin he programme kaltlang hian mipuite thawhhopuiah a sawm a ni. Health Minister chuan UNAIDS leh CDC in tanpuina sum leh pai an pek avangin lawmthu a sawi a. Khawvela reilote kan awm chhung hian kan mihringpui harsatna tawk mek te tanpui leh an tana rawngbawl hi kan tih theih hlu ber te zinga mi a ni, a ti.



HIV/AIDS vei te, drugs ti thin te, seks worker te leh hetiang lama harsatna tawk mi dangte zingah COVID hri leng mek avanga harsatna namenlo hmachhawn an awm a. Sum leh pai, ei leh in tur piahlamah chenna tur nei lo te pawh an awm tih hriat a ni a. Heng tlawmngai pawl hrang hrangte hian heng mite tan hian United Nations Programme on HIV/AIDS (UNAIDS) leh Centre for Disease Control & Prevention (CDC) ah tanpuina an dilsak a. An member mi 500 te tan tanpuina ration, mask leh sanitizer te an dawn bakah COVID-19 lockdown chhunga chenna tur nei lo te awmna tur temporary shelter siamsak an remti bawk a ni. PWNM, MISNOPP, MDUF leh YWCA ten July atanga September, 2021 chhungin he hmalakna hi an kalpui dawn a ni.


Hawnna programme hi Online-in mi thahnem takin an chhim a. CDC, UNAIDS, NACO leh pawl hrang hrang aiawhten thu an sawi a. Aizawl Mayor Pu Lalrinenga Sailo leh Deputy Mayor Pu R.Thanglura te bakah National Health Mission, Mizoram State AIDS Control Society hotute leh pawl hrang hrang aiawhte programme-ah hian an tel a ni.

- DIPR

Post a Comment

0 Comments