LALPA LAM I HAWI ANG U

(TKP Day 2021 pualin)
- Remmuana Chawngthu

Ni 26 July 2021-a Mizo sipai leh Assam sipai inkah boruak sang takin hmun hrang hrangah thawm a la nei a; State pahnih Chief Minister leh Chief Secreatary inbiaknate, Mizoram Home Minister leh Vairengte khawtlang bakah kan Rajya Sabha MP te leh midangte chetvelna leh an thusawi sawhkhawk thil tam tak ten media-ah hmun sang tak a la chang a; Covid 19 hri lengin kan ram leh India hmarchhakah bu a khuar na zel bawk nen, khawvel chanchin thar dangte han thlir ila, buaina neuh neuh hriat tur a lo tam ve viau zel bawk nen; tunhmaa kan ngaihhlut ṭhin em em - Olympic (@Tokyo) lam pawhin rilru a luah hneh hlei thei mang der lo chu a ni e.



ṬHALAI KRISTIAN PAWL
BCM hnuaia TKP chuan hun buaithlak tak karah kum 70 a lo tling ta a, a lawmawm hle mai.

Kum 1951 July 30 zana Serkawna ṭhalaite leh Kohhran hruaitu kalkhawmte chuan, Zosap Missionary te duhsakna leh kaihhruaina hnuaiah ṬKP hi an lo din a, Golden Jubilee leh Diamond Jubilee te lawm a nih hnuah tunah kum 70 a lo tling ta; hei chen min hruaitu -LALPA fakin awm rawh se.

"Kan kawngte chu fiahin en ngun ila, Lalpa lam i hawi ang u," (Jeremia ṭah hla 3:40)

 Kumina ṬKP Day-a kan thupui hi "Lalpa lam i hawi ang u" tih a ni a, Kohhran bil hunpui mah nise, kan thupui hi tuna kan ram dinhmun thlirin, Kohhran tin leh mipui mimir, kan hnam tan a pawimawh hle a ni.

Jeremia ṭah hla kan hmuh hi _"Zawlnei Jeremia'n Jerusalem tih chhiata awm a hmuhin, lungchhe takin a ṭhu a, Jerusalem chu ṭah hlain a sun ta a ni."_ tiin Greek Septuagint chuan Jeremia ṭah hla thuhmahruai a sawi a ni. Ṭah hla hi thu panga thlan khawm a ni a, a hmasa palite hi ṭah hla niin, a panga-na hi khawngaih dilna/ṭawngṭaina a ni.

Babulon-hovin Jerusalem leh Judai ram an hal a; a lan dan chiang takah chuan, mite khaw loh vang a ni tih a hriat theih. Thuthlung tharah Lal Isuan Jerusalem a ṭah thu (Luka 19:41) kan hmu ve leh bawk a nih kha.

Lalpa lam hawitute chan
          Lalpa lam chu engtia hawi tur nge, engtia hma lak chi nge, engnge tih tur ber chu? tih zawhna tam tak a awm thei a; han sawi vek sen pawh a ni lo ang. Kan theih dan, kan rilrua a thawh dan leh ṭha kan tih dante chu.

Bible-a Lalpa lam hawi langsar tak, an chanchin pawh kan sawi fo pahnih lo tarlang lawk ang.

A pakhatnaah chuan Judate lal -Jehosaphata a ni a. Amah bei turin Moaba leh Amona thlahte, Meun-ho nen nasa takin an lo thawk chhuak a; Jehosaphata a mangang a, a zam chhe hle a ni kha. Mahse, a mite nen Lalpa an au a, "...I lam kan lo hawi mai a ni...." tiin, Lalpan an hmelmate hnehsakin, hlawhtlinna, hlim leh lawmna bakah thlamuanna tlangah an lawm a nih kha (2 Chro 20: 1-12).

A pahnihna chu zirtir Petera a ni a. Zirtirtu (Lal Isua) tui chunga a kal laiin, a hmaa Petera tui chungah a kal ve a; Mahse, a vela tuifawn leh thlipui a hriat leh hmuhin a hlau a, tuiah a pil mai dawn a nih kha (Mat 14:28).

Bible meuh luahlum zo pha mi tam tak, harsatna leh manganna ruama an din lai leh hlauhna leh thlabarna buaithlak takin a bawh buai lai taka Lalpa lam hawi a, chumi hnua hlimna tlâng duhawm taka lawn leh ta te chanchin hi zirchian a nuam hle a, an awm dan leh nun dante hre thar zel teh ang u.

A tak takah chuan lawmnaa khah lai leh manganna reng rengin min chim loh lai ai chuan, harsatna hrang hrangin min han chim buai nak nak lai hian Lalpa lam hawi a, a hming lam hi a lo awlsam zawk ni hian a lang deuh chu a ni ber e.

Mahse, zahngaihna tawp nei lo Pathian neitute kan ni hi a vanneihthlak thlawt a. A hnena kan dil leh ngen apiang hi Ama'n ṭha a tih dan ang zelin min chhang ṭhin a. Keini rilru ang lek pu ve lo Pathian kan nei hi a va lawmawm em!

*A ṭhatna leh zahngaihna chuai thei lo kan Pathian chu, eng hunah pawh; khawi hmunah pawh hre zelin, A lam i hawi reng ang u.*

*"Kawlkila mi zawng zawng pawhin an hre leh ang, Lalpa lam an hawi tawh ang a; Hnam tina chi tin, I hmaah an kun ang.*
*Ram chu Lalpa ta a ni a, hnam tin chunga roreltu a ni. (Sam 22:27-28)*

*A LAM HAWI ZEL THEI TURIN, A ZAHNGAIHNAIN LALPA CHUAN MIN HRUAI ZEL RAWH SE.*

No comments

He post chungchanga i ngaihdan lo sawi ve rawh:

Powered by Blogger.