Kulikawn LLTF-in 'random test' kalpui; Dawr kai mi 117 'test' a 'negative' vek

Aizawl | July 24, 2021: Aizawl Kulikawn Local Level Task Force buatsaihin Covid-19 'random testing' kalpui a ni a. D3 Business Enterprise neitu Dr Lalmalsawma, chuan an Veng (Kulikawn)-a 'random test' neihna tur atan hian RAgT Test Kit ṭha chi SD Biosensor siam Kit 100 a 'donate' bakah test senso dang a tum sak vek a, vawiin hian mi 117 test niin an 'result' a 'negative' vek a ni.


Pu Lalchawiliana, Kulikawn Local Level Task Force member aṭanga report kan dawn danin, "Dr Lalmalsawma Nghaka'n kan venga 'Random Test' kan neih theihna tur hi RAgT Test Kit 100 min donate a. Alpha Hospital Kulikawn lam aṭangin Test hi min rawn buaipui sak (conduct) a ni," a ti.

Kulikawn Local Level Task Force te hnen aṭanga thudawn danin mipuiin an dawr tam bik ; Eichawp zuar, thlai hnah, damdawi dawr leh ranchaw zuartute bik tan hian 'random test' hi Kulikawn Branch YMA Hall-ah neih a ni. Positive hi mi 10 an hmuh tlin chuan dahnaah an buai dawn avangin an chawlhsan rih a ṭul tur thu an sawi lawka mahse vanneihthlak takin an 'negative' vek.

Dr. Lalmalsawma chuan, Sorkar ti buai kher lova kan veng LLTF ten hetiang tih nachang an hria hi chhuanawm a tih thu leh, Covid19 hri do nan theihtawp chhuah tu LLTF kan nei hi a vanneih thlak hle a ni, a ti.

Thudawn danin Kulikawn Vengah hian 'Containment Zone' te pawh a hmain a awm ve deuh hman a, tunah erawh 'Containment Zone' siamte hi hlih vek a ni tawh thung.

Dr. Lalmalsawma hian nimin khan ITI LLTF hnenah 4C ṭanpui nan Rs.10,000 a lo hlan tawh bawk a, tun hnaiah Zoram Medical College, Falkawn ICU tih changtlunna tur LG Company hnena a dilchhuah Rs. Nuai 27 man hu bungrua a hlan bawk. Mission Veng LLTF hnenah pawh 'Random Test' an tih nan SD Biosensor RAT test kit 100 an lo pe tawh bawk.


- MSR

No comments

He post chungchanga i ngaihdan lo sawi ve rawh:

Powered by Blogger.