Hmu leh Hmu lo


Johana 9:35-41 
Vanlalthansânga




Thuhmahruai

Mi pakhat Piantirh ata mitdel hi a awma, a ni chuan kawthlerah kutdawhin a dam khawchhuahna tur a ngaihtuah thin a. Ṭum khat chu chutih laia lar tak tihdam theihna nei chu a hote nen mitdel awmna lai chu an rawn paltlanga, chupa chu an hmuh veleh, “Zirtirtu saw pa sawn thiltihsual a nei nge, a nu leh paten thil an ti sual zawk – engati nge saw tiang sawn a awm?” an ti a. Nimahsela an zirtirtupa chuan, “thil tisual vang a ni lo, Pathian ropuizia a lanna tur a ni zawk” a ti a, a chhanga. Tichuan mitdel mitah chuan hlum a bela, “Siloam dilah va sil rawh” a ti a. A sawi ang chuan chu mitdel chuan a ti a, amit a lo var ta a ni. Thim zinga awm thin khan êng a hmu ve ta a, Mitdel ṭhin khan a lo hmu thei ta a, a mit alo var ta, hmutheilo ṭhin khan Isua avangin alo hmu thei ta a ni. Kan zir ho tur ‘hmu leh hmu lo’ hi kawng hrang hrangin a sawi theiha; hmu leh hmu lo (seeing and the unseen), eng leh thim (light and darkness) emaw, mitvar leh mitdel (sight and blindness), thlarau mitvâr leh thlarau mitdel ti te pawhin kan sawi thei ang.

 

Taksa mitdelna leh thlarau mitdelna

Johana bung 9 bikah hian kan hmuh theih chu taksa mit delna (physical blindness) leh thlarau mit delna (spiritual blindness) kan hmu ve ve a ni. Pharisaite chu tisa (physical) chuan hmu thei mahse thlarau (spiritual) ah chuan mitdel (blind) an ni. He laia Mitdel dam leh kan hmuh phei hi chu a malsawmna dawn hi a thuahhnih leh zual a. Tisa leh thlarau ah pawh hmuthei, mitvâr a lo ni ta a ni tih kan hria a, chu chu Isua vanga a chan a ni. 

 

Mitdel Isuan a tihdam tak kha hnawhchhuah a ni

Engvangin nge Judate biak in (Synagogue) a inkhawm ṭhinte theuh theuh kha in enhranna a lo awm? Judate leh Kristian - Kohhran (Lal Isua zuitute) inkarah daidanna bang a awmna chhan chu – Isua chu Krista/Messia a ni tih pawm leh tlangau pui apiang kha chu Synagogue atanga hnawhchhuah (excommunicate) tur tia an rel vang a ni (9:22). An rel ang ngei chuan Mitdel dam leh pawh khan Isua chu Pathian hnen atanga chhuak a ni tih a ṭan tlat avangin Synagogue aṭanga hnawhchhuah a ni ta reng a ni (9:34).

 

Hmu leh hmu lo danglamna

Lal Isua hunlaia hmu leh hmulo, êng leh thima leng an awm ang khan tun hunah pawh an la awm zel dawn a ni. Hmu thei tur chuan eng kan mamawha, thim ata êngah kan luh a ngai a ni. Thim thimna chu êng in arawn luahlan angai a ni. Tu te pawh hi thima leng sa in kan piang a, nunna pe thei eng kan mamawh theuh mai a ni. Mitdelin mitvarna a chan ang chiah khan (Isuan eng min pek atang chiah khan) thim ata chu kan chhuaka engah kan awm ta a ni. Mitdel kutdawh ngei pawh thimah a awm avangin a hmu theilo ṭhin a ni. Chutiangin khawlvel Êntu tura lokal chuan hmuhtheihna – ênna a pe ta a ni. Johana 9: 39 ah Isuan, “rorel turin he khawvelah hian lokal ka ni. Mitdelte chu an mit a lo varna tur leh, mit vârte chu an mit alo delna turin,” a ti a. Chumi awmzia chu a hmu in an hmulo anga, a hmulo in an hmu thung ang ti pawhin kan sawi thei ang. Thlarau mitdel chunga hmu thei inti ten an hmu lo anga, thlarau mitdel nia inhria te erawh chu an mit a var thung dawn a ni. Kan piantirh ata thlarau mitdelin kan awma, Isuan kan mitdelna chu hria in min tihdam sak a ni. Pharisai te erawh kha chu an inring sual a. Hmutheia inngaiin an hmu thei hauh si lo. An thlarau mit aṭang chuan an kiang lawka mi Isua kha an hmu thei tlat lo a ni. An thlarau mitdelna kha in pawmin kan hmu theilo, hmuh ve kan duh ti se chuan hmuh tir an ni ve mahna. Amaherawh chu hmu thei hauh si lo khan ‘kan hmu thei e’ an tih tlat avangin sualna neiin an awm reng mai a ni.

 

“Ka hmuh theih tâk hi”

Johana 9:25 ah mitdel khan Blepo (I see) – “ka hmuh theih tak hi” a ti a. Blepo (Greek) hian tisa mitvarna chu a kawk ngei mai a, amaherawh chu awmze pahnih a nei a; Blepo hian mitvâr leh mitdel bakah êng leh thim pawh a thlunzawma, chu chuan taksa leh thlarauva hmuh theihna a kawk tel ta a ni. Tun dinhmunah hian kan mit chuan khua hmu mahse – Pharisaite anga kan hmuhtheihlohna, kan mitdelna kan inhriatloh chuan thimah kan awm reng mai dawn a ni. Thima awm ka ni a, eng ka duh e kan tih chuan, Lal Isua kaltlangin kan hmu thei dawn a ni. Mitdel damleh ang hian Tisa leh Thlarauvah hlawkna kan hmu dawn a ni. Adik a dik chuan Pharisai te angin thimah kan leng a. Nimahsela thima awmah kan inngaih theih tlat loh avangin, êngah kan awm thei lo. Chu lai taka chu kan ngaihtuah chian a pawimawh hle in ka hria a. Mahni inhriat chianlohna emaw mahni nihna inhriatsualna, inhriatfuh tawklohna kan nei a chu chuan ‘thutak’ min hriattir thei lova, Pathian kan hriat theihloh phah ta ṭhin a ni. Êng chu a awma, mahse miin êng chu a hnawl si chuan a mit a del kumkhua mai dawn a ni. Kan mitdelna ata mit vâr min pe tu chu Lal Isua a ni. Mitdel kutdawh khan a pan hmasa lo, Isuan kalchilh zawkin a tidam a ni. Mitvarna – hmuhtheihna min petu Isua kan nei tawh em? Nge chu chu hnawlin ka hmu thei reng alawm kan ti dawn?

 

Tlângkawmna

Johana bung 9 atanga kan zir theih pawimawh tak pakhat chu; Isuan êng (light)- hmuhtir theitu a nih zia rawn tarlan a tum a ni. Thlarau mitvarna (seeing of faith) chu taksa mitvarna (physical sight) symbol-a hmangin a rawn entir a ni. Chu chu Isuan alo sawi tawh a ‘Kei khawvel Êntu ka ni’ (8:12; 9:5) a ti a ni. Chu chuan hriatthiamna min pe a ni. Piantirh ata Mitdel tihdam chungchang kan zir aṭanga min zirtir a tum ber chu tu te pawh hian hmuh theihna, mitvarna, êng – Isua atanga lo chhuak kan mamawh vek tih hi a ni. Mitvâr emaw Hmu thei emaw kan nih chuan mitdel anga kan awm kha a rem tawh lo. Ênga kan awm chuan thim thiltih kha kan tih a rem tawh lo a ni. Nitin hian êng leh thima awm theihna hun kan nei renga, ênga awm kan nih chuan thima awm duhna kan neih kha kan hneh ve zel a ngai a ni. Ka beih hi midangin min beih pui dawn lo, ka hma lam hun hi tuman min pe ngawt dawn lo. Keimah ngei hian ka hlawh chhuah a ngai a, ka hneh a ngai a ni. Chuvangin nitin nunah duhthlan tur a awm zel ang, a thim lam chu hnawl zelin a êng lam zawk zel hi Tirhkoh Paulan a lo sawi angin a um in kan um zel zawk tur a ni.

image source: Jesuswalk.com

Post a Comment

0 Comments