1 TIMOTHEA 6:10 LEH MIZORAM KOHHRAN TE

Pu Michael Lalmanzuala hian Martin Luther-a hunlaia Roman Catholic Kohhranin sum a atchilh ang thova vawiina Mizoram kohhran te hian sum hi an atchilh thu a sawi hi vawi khat chu ka hre tawh a. Mizoram kohhran sualna lian ber hi eng nge tiin inzawt ta ila, kohhran han tih hian kohhran hruaitute sawinaah ngai ta ila, 1 Timothea 6:10-a kan hmuh - "Tangka sum ngainat hi sual tinrêng bul a ni si a" - hi a ni ngei ang.

Post hmasa lama tarlan tawh ang khan Mizorama kohhran hruaitute hian an ngaihpawimawh em em chu thawhlawm khawn hi a ni a (thawhlawm khawn hrim hrim hi a dik lo a ni lo), Lal Isuan Kohhran a din inrelbawlnana thupek a pek ni lo Thuthlung Hlui huna Israel ram leh hnam tana Lalpa Pathianin dan a pek chu kohhran hruaituten dik lo taka zirtirin kohhran mipui rilru ah sawma pakhat hi compulsory-a pek tur angin an tuh a. An innghahna ber Thuthlung Hlui dan hi Israel te hnena pek a nih anga vawiina kan hmang dawn a nih phei chuan 10% nilo 25% vel emaw a aia tam daih kha Pathianin pek ngei ngei tura Israel hnam hnena a tih a ni a. Mizoram kohhran hruaituten Malakia 3:8 hmanga sawma pakhat pe lo chu Pathian ta ruksak anga min zirtir hi Thuthlung Thar kohhran te tana applicable ni ta se, a lo berah 15% hi kohhran hian a sawi ngai reng reng tawh lova, chuvang chuan an zirtirna logic-a tehin Pathian ta ruksak turin min zirtir tihna a ni.

Thuthlung Thara thilpek/thawhlawm chungchanga zirtirna kan dawn chu lawm tak leh phal taka pek a ni a. A zat bituk a awm tawh lova, Pathiana lawm apiangin phal takin an pe mai tawh zawk a ni. Chu chu Bible in ringtute thawhlawm thawh dan tur min kawhhmuh a nih laiin Mizorama kohhran hruaitute chuan guaranteed income 10% kha an zirtir a. Thilpek chungchanga Pathianin min duhdan hre lovin dan hnuaia awm ang maiin tam tak chuan an ngaih phah a ni.
Sum ngainatna sualah hian Mizoram kohhran te hi kan tang tak tak a. Entirna tha ber pakhat chu 2010 lama Chhinga Veng Presbyterian Kohhranin NECS neitupa, tuna Sports Minister Pu Robert Romawia Royte hnen atanga cheng nuai 30 chuang a dawnah khan a ni awm e. 


Hriat theuh angin khatih laia SSA Asst Project Director Pu Robert Romawia Royte khan sorkar dan kalhin NECS tan sum tam tak a siam a; SOSA, FOMTU leh PRISM ten Anti-Corruption Bureau hnena thubuai a thehluh khan uluk taka chhui a ni a. A tawizawngin sawi ta ila, an hmuhchhuah chu Pu RRR-a khan sorkar dan a bawhchhe ngei a, sum tam tak a hlawhchhuah pawh khan dan bawhchhiaa a hlawhchhuah a ni tih an report ah khan chiang takin a lang a ni. A hunlaia Home Minister Pu R.Lalzirliana'n a hum a, action lak a ni ta lova, bawhzui a ni ta lo a ni. 
Chulam chu lo dah tha ta ila, Chhinga Veng Presbyterian Kohhranin dan bawhchhiaa sum siamna atanga thawhlawm a dawn chungchangah khan a hria ten an sawi dan chuan an pastor leh upa ten an ngaihtuah ngei a, dik lo taka sum siam a ni tih hai theih a ni lo chung khan hnawl emaw pek let lam an rel ta lo a ni.


June 22, 2016 khan Mizoram Baptist Kohhranin an headquarters Office Serkawn, Sap Upa leh Pu Buanga Hall-ah North East Consultancy Services (NECS) hi an college - HATIM - Administrative Block sakna tur chungchangah Memorandum of Understanding an ziahpui a. Khatih laia NECS Chief Managing Director Pu Robert Romawi Royte-in a hming a ziak a, BCM aiawhin General Secretary Rev. F. Ramdinmawia'n a hming an ziak a ni. 
BCM leh NECS inremnaah chuan HATIM building hi a pung awm lova NECS sum hmanga sak tur a ni. Hunserh hmannaah Rev F.Ramdinmawia'n NECS inphalna chu Kohhran tan an hlut zia sawiin Kohhran ho te thawhlawm ringawt atang chuan vawilehkhata han tlin mai theih a nih loh thu te a sawi a, Pu Robert Romawia Royte hnenah lawmthu a sawi a ni.
HATIM Administrative Block sakna man hi Rs 2,11,35,865.00 (Nuai zahnih sawmpakhat sing thum sangnga zariat leh sawmruk panga) a ni a, MoU ang chuan kum 7 chhunga a pung awmlova rulh tur a ni. 2022 thleng a nih chu.
Han ngaihtuah ta ula, Mizoram Baptist Kohhran hian Pu Robert Romawia Royte, Mizoram politician zinga corruption haw lo ber mai hi ACB report pawh chhiar se demna reng reng a nei thei dawn lo tihna a ni a. A chhan chu a pawisa cheng nuai 200 chuang an ba tlat a. Kohhran ten an thawhlawmin an rul mek a, nakuma rulh zawh tur chauh a la ni a. Rulh zawh hnuah pawh Pu RRR-a fakna lo chu BCM ang phei chuan a ri tawh kher lovang a tih theih awm e. Chhinga Veng Presbyterian Kohhran hruaitute phei chuan Mizoram hmelma lian ber corruption do miah lo tu, haw miah lotu Pu RRR-a pawisa tam tak a thlawna an dawn avang hian corruption do tih te hi an ti hlei thei tawh dawn lo tihna a ni. 
Mizoram Baptist Kohhran rorelna sang berin 2013-a a rel - “Kan ramah hlemhletna (Corruption) a tlem theih nan hmalak nise” tih te kha hruaitute hian an la hre reng a ni phei chuan eirukna haw miah lo te nena MoU ziah te hi thil inhmeh lo a ni tih hriat awm tak a ni. Kohhran rorelna bawhzuia thuchhuah siam te hi vawiin thlengin a la awm lehnghal a https://www.mizobaptist.org/corruption-chungchanga-bcm-thuchhuah/ Corrution hi kohhran hian a do tak tak a pawimawh hle.
Eng nge a chhan kan tih chuan sum ngainatna sual vang a ni a tih loh theih loh a ni.
Kohhran te hian sual do kawngah hian tan kan lak a ngai a, mahse sum kan ngainat tlat chuan sual do hi thil har tak a ni zel dawn a nih hi.



Post a Comment

He post chungchanga i ngaihdan lo sawi ve rawh:

Previous Post Next Post