FCS&CA in inremchem turin mipui ngen

Aizawl | July 30, 2021: Food, Civil Supplies & Consumer Affairs Department chuan thuchhuah siamin POL, LPG, Buhfai leh thil dangte theihtawpa inrenchem turin mipuite a ngen.

Hemi chungchanga thuchhuah an siamah Food, Civil Supplies & Consumer Affairs Department chuan tunhnaia ramri chungchanga Assam nen buaina thar kan tawh avangin kan nitin mamawh chawkluhna kawngpui chu a ralmuang rih lova. Chuvangin, mipuite nitin mamawh pawh hun engemaw chen chu a khaihlak thei ani tih hriain inrenchem taka kan khawsak a tul hie a ni, an ti a. Mizoram Sawrkarin mipui nitin mamawh, POL leh LPG pawh thenawm State dang atanga chawlut turin chak takin hma a la mek a, amaherawhchu hnianghnar taka kan hmuh thin zat ang kha tun dinhmunah chuan kan pha rih lo thei a. Tin, Sawrkarin buhfai a lakluhna ber rail kawng pawh Assam ram chhungah tih chhiat anih bawk avangin hun rei vak lo chu buhfai pawh a rawn thleng muang deuha rin a ni, an ti a ni.

Zoram mipuite chu nitin a kan mamawh, heng POL, LPG, buhfai leh thil dang ah te pawh theihtawpa inrenchem theuh tur leh mamawh bak a chuang a liam chhungtin ten chheprelh lo turin FCS&CA Department chuan Zoram mipuite a ngen a ni.

Mizoram-in COVID-19 pandemic nasa taka kan tawrh mek bawk avangin Sawrkar-in inkaihhruaina khauh tak Standard Operating Procedures / Covid Appropriate Behaviour a duan zulzuiin FCS&CA Department hnuaia nitin mamawh te leh emergency thila Department dawr duh te tan Online services link: fcsca.ssdd.in ah dawr theihna an siam a, hei hi hmang tangkai turin mipuite an ngen a ni.

Post a Comment

0 Comments