Civil Hospital Lunglei-ah Covid-19 Sample Collection Kiosk tan

Aizawl | July 30, 2021: Lunglei High Powered Committee (HPC) kaltlanga buatsaih Civil Hospital Lunglei (CHL)-a ‘Covid-19 Sample Collection Kiosk’ chu vawiin chawhma khan Lunglei HPC Vice Chairman Pu Lawmawma Tochhawng in a hawng. ‘Covid-19 Sample Collection Kiosk’ chhunga dah tur Air Conditioner a hlan nghal bawk a ni.

\

Lunglei HPC Vice Chairman Pu Lawmawma Tochhawng chuan Covid-19 hrileng do kawngah medical lam hnawthawkte thawhrim zia leh an hah zia chu sawrkarin a hriatpuiin an inpekna chu a ropui takzet a ni tiin sample lakna hmun rem leh zau zawk ‘Covid-19 Sample Collection Kiosk’ Medical lam hotute thahnemngaihna avanga ruahman a ni chu lawmawm a tih thu a sawi a. Hrileng do kawngah sawrkar pawhin theihtawp a chhuah zel dawn a, thawktute mamawh pawh a theih angin ruahman pui chhunzawm zel dawn a ni tiin mipuite pawh fimkhur chhunzawm tur leh sawkarin inkaihhruaina a siam te tha taka zawm turin a chah a. Lunglei District chhunga VLTF-te thawhrimna leh inpekna avangin an chungah lawmthu a sawi a ni.

‘Covid-19 Sample Collection Kiosk’ hi Civil Hospital Lunglei (CHL) Medical Superintendent Office hnuai ah siam niin a chhungah waiting room, reception, sample lakna pahnih, observation room , duty room leh doffing room te ruahman a ni. Hospitala admit tur, operation theatre lut tur, damlo awmpuitu te chu nitin engtik lai pawhin (24x7) a in test theih a, certificate mamawh vang emaw thil dang vanga test duh te tan (voluntary test) chawhnu dar 1 atanga dar 3:30 thleng a test theih a, Medico legal case avanga in test mamawh te tan tlai dar 4:00 atanga a tuk zing dar 9:00 thleng a in test theih a ni. Test man hi sawrkarin a bi tuk angin Rapid Antigen Test (RAgT) atang Rs 200/- niin Truenat Test atan Rs.1000/- a ni.