ZIRNA UAR

(Zirna in a Ram leh Hnam Humhalh)

- Vidpuia Hrahsel

Kumpuan atan 'Ram leh Hnam Humhalh' kum enge maw chen kan hman hnuah YMA General Conference 2019 neih zawh tak chuan Kumpuan atan 'Zirna Uar' tih chu lungrual takin kan thlang ta a. Zirna Uar tih hian kan ram zirna dinhmun hi a hniam tawh em vangin emaw zirna ah kan tlakhniam tawh em vangin he Zirna Uar hi thlang lo theilo dinhmun ah kan ding tihna a kawk em em lo niin a lang. Zirna Uar kan tih hian eng ber ah nge kan ṭanrual na tur leh tun aia hma kan sawn na tur, lam a kawk mah a, ṭhahnemngaihna thu a ni zawk mah. Zirna hian mihring awm dan tur leh mihring nundan mawi, mi hlawhtling leh mi puitling a chherchhuah a tum ber a. Mitin huap kumpuan, mitin te telna kumpuan a ni. He Zirna Uar hian in tin a thleng a, khawtlang kohhran leh mimal thleng a kan ṭanrual na tur kumpuan a ni.

Chu Zirna Uar chu mitinin kan zawm in, kan ti hlawhtling thei ṭheuh a, mawhphurhna kengtu khawtlang hruaitu te hmachhawp hrang hrang te,  thlawp mai bakah zawm kan tum tur a ni. He Zirna Uar hi khawtlang tin a, Zirna In sikul ah te, tun ai nasa zawka ṭan kan ngaihna te, zirna a kan dinhmun te, ram leh hnam humhalh na lam hawia inzirtirna te in a kal pui theih a. Ram leh Hnam Humhalh na ṭha ber chu Zirna hi a ni tih kan hriat nawn fo a ṭul a, kan kumpuan hi a hma a Ram leh Hnam Humhalh nen a kaikawp theih a, a ki dangin tun ṭum chu, zirna lamah hma kan sawn zel theih nan hma kan la dawn a ni. Engti kawng zawngin nge hma kan lak ang le? Veng tin Zirna in ah te, Zirlai tan a, an lehkha zir lam a, inzirtirna buatsaih te, kan vengchhung ah harsatna avanga zirlai lehkha zir theilo an awm em tih te, vengchhung a zirlaite dinhmun te leh an puitlinna kawng a, kawng tam tak an zawh tur lam hawia zirtirna pek te pawh a ni thei vek ang. Zirna chuan mi puitling ah min chher a, zirna in hlawhtlinna min pe a, thiamna leh finna mai bakah nundan mawi, hringnun sukthlek dan min zirtir a, kan ngaihhlut a, kan chawi san deuh deuh a, kan uar lehzual a va ngai em.

Zirna in aṭang kan hnam i chhan ang u, mi ropui tak tak, mi hlawhtling tak tak te hi zirna run an belh lai a, mi tumruh, an tum a chiang, leh theihtawp a an nih tum bei ṭhin te an ni. Keini pawh hian theihna kan nei a, tum nei ran a, thil ti ṭhin te chuan an sa seh lai an thlah mai mai ngailo, tum nei la, i thil tum ah chiang rawh. He kan ram chawisang a, ti hmingṭha thei tur hian i theih lai khan zirna uar tum la, he hnam tan hian mi rotling tak i ni thei asin. Hnam hmangaihna rilru put theihna ṭha ber chu Zirna in aṭang hian a ni. Zirna hi kan rohlu, kan ban phak, tun aia sang zawk a min dah thei tu a ni. Zirlaite tan chauh zirna uar ni suh se! Lehkha zir tawh lo te tan pawh, kan intodelh na tur kawng ah ṭheuh ṭan la in, kan hmasawnna tur kawng kan dap thiam a va ṭul em, awm mai mai chungin he Zirna Uar hi a hlawhtling theilo, zirlai kan ni tawhlo anih pawhin, kan kawng zawhna apiangah hmasawn tum in, zir tur thar zir zel ila, he Kumpuan hi a lo hlawhtling mai dawn a lo ni. Ram leh Hnam tan a, i theihna kha i hlan ve theih nan i awm hmunah tal khan hmasawn tumin pheilai i khai ve thei! Intodelh la, midang te entawn tlak a nun leh midang te tan a zirtirna pe tlak a nun i tum ang u.

Chhungkua hi khawvel a sikul hmasa ber a ni a, inchhung khur  hi inzirtirna hmun ṭha ber a ni, khawvel hmasawnna leh ṭhan na avangin, mitin mahni tawk ah kan buai a, nunphung a danglam a, chhungkaw inkawm khawm emaw chaw tak ngial pawh kan ei ho thei ta lo ṭhin, mi tam zawk hi Pathianni tih loh ah chuan kan ei ho khat khawp ang. Chhungkua aṭang vantlang nun, nun dan mawi leh ṭha inzirtirna hun kan nei thei ta meuhlo, heng te avang hian zirna in hi a pawimawh hle. Zirna In hi kan tan Zawlbuk a ni a, zirna in ah moral life inzirtir in, infuihna thu in zirtir tam ila, zonun ze mawi kan zirtir a te, hnenah hrilh tam ila, kan ṭanrual a, kan in fah tam a va ngai em.

Zirna Uar hlawhtlinna tur chuan YMA in a theih tawk in Zirna atan chhawmdawl ngai te, ṭanpui ngaite ṭanpuitu a nih ang ngeiin, a ṭanpui in a umzui tur a ni. Tin, mimal tin pawh in kan theih ang ang in he Zirna hi awmze neiin, tum nei ran in kalpui ila, a va duhawm em. Zirna in ah hian zirtirtu te pawhin kan zirlaite ram leh hnam hmangaihna rilru pu chungin fah tam ila, kan ram hmasawnna tur leh humhalh a ngaih zia te inzirtir tam ila, a va ṭha dâwn em. Kan ṭanrual a, zirna kan uar deuh deuh zel a ngai a nih hi maw.. Hawh u, Zirna kan Ram leh Hnam tan ti chung zelin Raltiang Ram thlir chungin Zirna i uar deuh deuh zel ang u.