Aizawl | June 12, 2021: Nizan dar 9:30 vel khan Thuampui Veng Ainawn Section huamchhunga Pu Lalbiakzuala te chuungkaw luah lai Assam type chhwng khat chu an in chhak lungrem chimin a hnawl a, ruang 3 lakchhuak tawh niin Laltanpuii (16) chu la zawn mek a ni.
He in chim hi a chhawng chung lam Pu Lalbiakzuala (75) te chhungkua member 7 in an luah a, in chim lai hian an tlangval Lalremruata (19) chu in chungah a awm lova, a him hlauh. Chhungkaw member dang zawng mi 6 te chu in hian a chim pui ta a ni. In chim atang hian chhungkaw pa ber Pu Lalbiakzuala chu a vakchhuak a, hliam na vak lo a tuar. Chhungkaw member dang pakhat Zairimawii 35) pawh hun engemaw chen a kawng chin hnuai lam in chim karah a tang a, hliam tuarin lakchhuah a ni.
Chanchin buatsaih lai hian mi 3, Lalthlamuani kum 16, Joseph Lalrinhlua kum 5 leh Lalngaihsaka kum 3 mite chu thiin lakchhuah an ni tawh a, Laltanpuii kum 16 mi chu chin hriat lohin a la awm a ni.
Inchim hnuai lamah hian hnamdang an cheng a, vanneihthlak takin anni hi an tlanchhuak hman a, an him vek niin thu dawn a ni
Nunna chan te:
1. Lalthlamuani (Kum 16)
2. Joseph Lalrinhlua (Kum 5)
3. Daniel Lalngaihsaka (Kum 3)
4. Lalțanpuii (Kum 16) - Ani hi la zawn mek a ni (2:20 am)
"Nunna chan, hliam tuar leh chhiat tawk chhungkuate ṭanpuina leh chhawmdawlna tur pawh ngaihtuahsak an ni ang." tiin CM Zoramthanga chuan Instagram-ah a post a ni.
4:30 AM: Zankhuaa ruang zawn a nih hnuin tukin zing dar 4:30 khan a Lalṭanpuii ruang chu hmuh a ni ta.
Post a Comment
He post chungchanga i ngaihdan lo sawi ve rawh: