Tachhip mipuiin Republic vengthlang tan chawhmeh thahnem tak an pe

Aizawl | June 17, 2021: Hripui leng karah Mihring inhmangaihna hlutzia a lang chho zel a, Nizan khan Tachhip khaw mipui chuan Republic vengthlang, Aizawl mipui tan chawhmeh leh thlai chi hrang hrang pickup trip li zet an hlan.


Heng thilpekte hi vawiin khan Republic vengthlang huamchhung chhungkaw tinah semin, mipui an lawm hle a ni.

Tachhip khawtlang hian nimin khan mahni lo leh huanah te an thlai neih ang ang an la khawm a, a then chu ramah te chawhmeh vaikhawmin an kal a. Heng chawhmeh leh thlai leh thei chi hrang hrang an zawnkhawm te hi ruahmanna fel tak siamin a dahkhawmna tur hmun thum an siam-ah dahkhawmin, chung chu a hlawmin nizan khan Republic vengthlang thlenpui a ni.


Pickup pali in an phur a, an chhuah dawn in, Salvation Army bialtu CO Lieutenant C Lalbiakdiki'n Pathian hnen ah tawngtaina-in a hlan a ni.

Tachhip mipuiin Republic vengthlang tana thil an pek hi thlai leh thei lam chi mai ni lovin Ar vulhtute'n an thawhkhawm Ar pum 29 zet a tel bawk a, an thilpek hlutzawng hi cheng nuaih 2 chuang daih a nih thu thudawnna chuan a tarlang.

Thilpek an pek chungchangah EXPLOREMIZORAM.COM zawhna chhangin Tachhip VCP J Thangliana chuan, "mipui kan phurin kan hlim tlang a. Kan theihtawp kan chhuah a ni" a ti a, Mi dang tana malsawmna ni tura khawtlang an inlungrual leh mipui an phur em em mai chu sawi nuam a ti hle.


Tachhip khaw mipuiin Republic vengthlang tana an thlai, chawhmeh leh thipek dang an thawhkhawmte hi Antam tel 575, Kharek hnah, Anthur,  Maian, Dawlzik, Thingthupui, Tawkte, Bawkbawn, Aidu Ria, Rawtuai, Phuihnam, Behlawi, Chingit,  Hmarchaté, Samtawk, Satinrem, maipawl, Sawhthing tak, Sawhthing mothar, Rengan, Saisu, Fangra, Changkha rah, Mai rah, Pelh hnah, Lambak, Bahkhawr, Sapthei hnah, Anhling, Tumbu, Hmazil, Fanghma, Theiherawt, Theihai, Nimbu leh Ar te a ni.


Heng bakah hian chhungkaw eng emaw zatin a phurhnaa hman tur pawisa an thehkhawm bawk a. Hriat theih chinah Tachhip khua chhungkaw 200 chuang zette chuan phal takin an thlai, ranvulh leh pawisa te an thawh a ni.

Tachhip khua hi in 260 bawr vel khua niin, Aizawl - Thenzawl road-a awm a ni.

Thudawnna-in a tarlanin, tachhip khawtlang hian an thilpek-ah a doletna emaw thilpek let an duh lova, Mizo takin, rilru thianghlim takin an pe a. Petrol man emaw pek let an duh lo niin thu dawn a ni.



























































Post a Comment

0 Comments