Rev Lalhmingchhuanga Zongte

Ziaktu, Zirtirtu, hruaitu leh Puithiam nih fawm Rev Lalhmingchhuanga Zongte chanchin tlangpui a vuina huna sem tura buatsaih atanga lakchhuah a hnuaiah hian kan dah e.



A CHANCHIN TLANGPUI
Rev Lalhmingchhuanga Zongte hi Upa Siamhleia (L) leh Pi Zaichhingi (L) te inkarah 1st July.1966 khan Hmawngchuan khua, Zampui Tlangdung, North Tripura ah a lo piang a. Kum 1982, January 15 ah Hmawngchuan khua ah Pastor Lalthuama’n ringtu Baptisma a chantir a. An Unau hi an rual a, mipa 6(paruk) leh Hmeichhia 4(pali) niin Rev Lalhmingchhuanga Zongte hi a naupang ber dawttu a ni.

AN UNAU INDAWT DAN CHU HETIANG HI A NI.
1. Vanlalvuli (L) w/o Upa HC Lalrinmawia (L) Hmawngchuan,Tripura
2. Lalbiakhnuni w/o Laltanpuia Khiangte Hmawngchuan, Tripura
3. Rothangluaia h/o Zasangluri Mamit, Mizoram
4. Zarzoliana h/o Lalrammawii Vanghmun, Tripura
5. Kamdingliana(L) h/o Weldenmawii Hmawngchuan, Tripura
6. Tlangthanmawia h/o Lalsangpuii Hmawngchuan, Tripura
7. J.Lalthakima h/o Biaknghilhlovi Hmawngchuan, Tripura
8. Nuntharmawii Jongte w/o Rev James Thansanga Hlychho Bishramganj, Tripura
9. Lalhmingchhuanga Zongte h/o Malsawmdawngliani Delhi
10. Malsawmkimi Jongte w/o Rev Laltanpuia Colney Serchhip, Mizoram

ZIRNA LEH CHHUNGKUA
Primary School hi Hmawngchuan Basic School ah kalin, Middle School hi Hmawngchuan Junior School ah a kal leh a, 1985 kumah Jampui High School atangin HSLC a zo a. Kum 1989 ah St Edmunds College Shillong atangin PUC a zova, 1993 ah he College atang tho hian B.A (Hons) a zova, NEHU Shillong atangin 1995 khan M.A (Sociology) a zir zo leh a ni. January 12.1995 ah Hmawngchuan Baptist Kohhran Biakin ah Kohhran Dan Puitling in Pu Lalmuana(L) leh Pi Lalramengi Hmar te fanu Malsawmdawngliani, Shillong, Meghalaya nen an Innei a, Pastor Lalthuama’n a in vawn tir a ni. Fanau malsawmna changin Fanu 2 leh fapa 1 an nei a, chungte chu- Esther Lalhruaitluangi Zongte, Ruth Lalremruati Zongte leh Joshua Remruatfela Zongte te an ni. 


RAWNGBAWLNA
Rev Lalhmingchhuanga hian mite angin pianthar dan leh pianthar lai hun sawitur a nei lova “Chumi khami hunah ka piangthar tih sawi tur ka neilo. Ka tet te atanga ka nu leh pa min zirtirna atang hian Lal Isua hi ka ring nghet em em mai ani” a ti. A tlangval chhoh a tangin Kohhran ah a hun tam zawk a hmang a, 1986 ah TKP Hmawngchuan Unit Secretary a ni a. 1987 atangin Shilllong-ah lehkha a zir chhunzawm a, TKP Shillong-ah inhmang chhunzawm zel in hruaitu dinhmun pawh tum engemawzat lo chelh tawh a ni a. 1988-1989 ah Shillong Kohhran TKP Unit ah President a ni a, 1989-1995 inkarah ZPMBK TKP Bial President te a lo ni tawh bawk a ni. M.A a zir zawh hma hian a Pa hnenah “Fulltime a rawngbawl tur hian Lalpan min duh a, M.A ka zawh chuan Pathian thu (Theology) ka zir i remti em?” a ti a, a Nu leh Pa chuan “Fa sawm(10) zinga Lalpa rawngbawl tur a kan serh hran i ni a lawm” tiin an lo rem ti hle mai a, Chutia an remtih hnu ah Shillong Kohhran kaltlangin Pathian thu zir turin a chhuak ta a ni. 1996 -2000 chhungin Union Biblical Seminary Pune ah B.D a zir a, hemi hun chhung hian Pune Mizo Christian Fellowship (PMCF) ah Chairman term hnih a chelh hman a ni. B.D a zir zawh hian Mizoram Baptist Kohhran hnuai ah Pastor atan a lak a ni. Thil chhinchhiah tlak tak leh ropui tak chu, hetia rawngbawlna a ke a pen tan dawn tak tak ah hian a nupui Pi Malsawmdawngliani hian a pasal rawngbawlna tibuai tu nih hlauvin hlawh tha tak nei a hna a lo thawhve Assam Regiment Center Record office a LDC hna chu a bansan a ni. Pastor-a lak a nih hnu hian Probationary Pastor in Lengpui Pastor Bial (2000-2002) leh Saitual Pastor Bial, Seling (2002-2004)-ah te a awm a. BCM Assembly 2004, Ramhlun ‘N’ Kohhran Aizawl-a neih ah Rev.C.Rothuama’n a nemnghet (ordained) a. Nemngheh a nih hnu hian Lunglawn Pastor Bial (2004 – 2005) leh S.Vanlaiphai Pastor Bial (2005 - 2006) ah te Pastor a ni a, 2006-ah MTh. Zir tura tirh a nil eh ta a ni.

Kum 2006 – 2008 chhung in UTC Bangalore ah M.Th (Counselling) a zir leh a, Bangalore-a a awm chhung hi rei lovin kum 2 chauh ni mahse, hemi chhung pawh hian Bangalore Mizo Christian Fellowship (BMCF) leh Bangalore Mizo Association (BMA) ah a tangkai hle a, BMA Annual Magazine leh BMCF Weekly Newsletter (KOINONIA) ah te a awm chhung hian Editor niin thuziak lamah Sulhnu pawimawh tak tak a hnutchhiah hman a ni. M.Th a zawh hnu hian Academy of Integrated Christian Studies (AICS), Tanhril Aizawl ah 2008 (June) atangin Lecturer atana dah a ni a. AICS-a kum 5 a zirtir hnu in, 2013 kumah D.Th (Counselling) zir turin FFRRC, Kottayam, Kerala ah a liam leh a, hetah hian kum 3 a insawrbing hnu in, 2016 ah North India Mission, New Delhi-ah a zirna chhunzawm chung zel in Field Director atana dah a ni a, a boral thleng hian North India Mission Field, New Delhi ah Field Director hna hi a chelh a ni.

Delhi an awm chhung hian 2017-2018 ah Delhi Mizo Inkhawm (DMI) Vice Chairman a ni a, 2018-2020 chhungin term hnih lai mai DMI Chairman a ni bawk. Hebrai Bung 12 thu hi a dam hun chhung a a nun kaihruai tu leh khalh ngil fo tu a ni. DTh. a zirna lamah hian a tluang ta lo deuhva, a Thesis hi inzial fel in, a submit hman chiah a, tunah hian a result a nghak mek a ni. Reilote ah hian a result tha tak kan beisei a, mahse a Viva Voce examination ti turin he khawvel ah a awm ve ta lo a ni.

A NUNGCHANG LEH MIZIA.
Rev Lalhmingchhuanga hi naupan tet atanga Nu leh pa thu awih em em a ni a, a tleirawl chhuah hun lai pawhin a Nu in lengchhuak lo tur a tih chuan I he lovin In ah a awm a, a farnu te kiangah awmin an inkawm ho thin a ni. Amah hi pa tawng hmang thiam tak, thil sawi thiam, thil chik mi tak, thil chhui peih, titi thiam, fiamthu thianghlim thawh tur hre em em, a hun leh hmun a ngaihtuahna seng (Presence of Mind) zung zung thiam a ni. Tin, Zai hi a ngaina in zai hruai te a thiam em em a, dikna duh mi, hleihlenna leh eirukna do tlat mi a ni. Thudik ni a a hriat chu huai taka sawi chhuak thin mi a ni. Pathian a tanga chhuak thudik ni a a hriat te ngawihbo pui mai theilo mi a ni. Chhung leh khat, u leh nau, thenrual te huikhawm leh ngaihsak, Mizo tlawmngaihna vawng nung duh mi, a kova awm hlenchhuah ngei ngei tum tlat mi a ni.

THU LEH HLA LAM A SULHNU TE.
Thusawi mi leh nuam ti em em a ni a, zai pawh nuam a tiin Solfa a thiam tha in Solfa Trainning pe in a chhuak fova, TKP Hmawngchuan UnitTKP Shillong Unit leh
TKP Shillong Bial  ah te a lehkha zir chhung zawngin Zaipawl Conductor ani zel a. Thuziah lamah pawh Kohhran Chanchinbu hrang hrang leh College Magazine leh Souvenir hrang hrang ah thu a ziak hnem hle. Tin, ‘Seminar Paper’ buatsaih a thu sawiin hmun hrang hrang ah hun a hmang tawh a ni. A hun lai ang zel a thiamna leh hmasawnna te rawngbawlna atana hmang tangkai leh thiam tak niin a in tuaithar peih a, hmasawnna lo awm zel rual a ke pen turin a inbuatsaih thin a ni. Lehkhabu rotling tak tak hi Paruk lai a ziak hman a, India ram leh Mizoram a Computer leh Internet a rawn lar chhoh laia a ziah “Computer Zirtirtu (2001)” pawhin mite ngaihhlut a hlawh hle a, a lehkhabu ziak pakhat “Savun Kawrfual” chu kum 2017 khan Mizo Academy of Letters ten kum khat chhung a Mizoram a Lehkhabu chhuak zinga tha ber an thlan chhuah thin ah thlan a ni a, ‘Mizo Academy of Letters - Book of the Year 2017 Award’ a dawng a ni.

A Lehkhabu Ziah te.
1. Hla Ropui te leh a phuahtute 1998/1999
2. Computer Zirtirtu 2001
3. Hmasang Kohhran Chanchin 2004
4. Chhandamna tluantling chang turin Pianthar a tawk lo 2004
5. Savun Kawrfual 2017
6. Mizo Buanpuite 2021
(Heihi la tlangzarhloh ani a, engkim peih fel vek tawh a ni a, a dam loh tak avangin a tlangzarh hman ta lo a ni)


A HUN TAWP LAM.
Field Director, North India Mission Field hna a chelh chu a term hmang zovin Mizoram lamah Tlabung Pastor Bial enkawl turin kumin 2021 khan sawn (Transferred) a ni a, a hna zawm tur a an in sawn hma in Covid 19 Hripui thawh hnihna (Second Wave) chuan nasa takin Delhi a tuam a, vanduaithlak takin anni chhungkua pawh he hri hian a man ve ta a, hri vei te natna lanchhuah dan chi hrang hrang – Khawsik, khuh te an neih avangin April 17, 2021 khan a hmasa ber atan a sample test a ni a, mahse engmah an hmu lova, an damloh danah hmasawnna a awm thei lova, a vawihnihna atan April 23,2021 ah an thisen an endik tir leh a, chutah pawh chuan Covid 19 hri an la hmu leh ta chuang lova, an chhungkua hian an damlova, an fate erawh chu mahni inbuaipui thei siin an awm a, an khawsik leh khuh, thaw hah, taksa na te a reh theih loh avangin April 26, 2021 ah a vawithumna atan an nupa in an sample test tir in Damdawi in an pan leh a, heath hian Covid 19 hri chu an hmu ta a, an taksa a hri in hna a thawh te a lo nasa deuh tawh bawk nen taksa chhung enna khawl (CT Scan) in an han enchiang chu ‘Awmna’ natna (Pneumonia) alo nei nasa in chu chuan a chuap a lo khawih tan tawh a lo ni a, chumi ni chuan Indian Spinal Injury Centre ah an in dahlut ta nghal a ni.
Tarlan tawh angin Hri in a chuap leh Lung te a lo khawih nasa in thawk lamah harsatna a lo nei chhova, April 29, 2021 atang in Oxygen pek a ni a, hma a sawn chho hret hret a kan hriat laiin May 13, 2021 ah a dinhmun hniam lehin ICU ah Ventilator hmanga enkawl a ni a, hemi zan hian Plasma Therapy pawh pek nghal a ni. Nasa taka tawngtaina nen, mihring thiamna tinreng nen a enkawl a; dam leh mai tur a kan beisei lai leh a dinhmun pawh hmasawn hret hret ni a kan hriat laiin May 29, 2021 zing dar 4:00 ah a thawhrimna kalsan in natna leh lungngaihna awm tawh lohna hmun min lo pansan ta a ni.

LAWMTHU:
Rev. Lalhmingchhuanga Zongte damlohna chungchang ah hian a rawngbawlpui te leh hotu te, Delhi Mizo Welfare leh Delhi Mizo Inkhawm, Indian Spinal Injuries Centre, New Delhi-a thawkte leh Mizo Nurse leh Doctor amah ngaihvena enkawl tu te, Delhi-a Mizoram Sawrkar hotu te, BCM Shalom leh Mission Vengthlang YMA leh Local Level Task Force te chung ah Rev. Lalhmingchhuanga Zongte chhungte leh Mizoram Baptist Kohhran Puipa ten lawmthu kan sawi tak meuh meuh a. Tin, hmun hrang hranga a chanchin hria-a alo dam theih nana thahnemngai taka tawngtaisaktu te leh tawngtai mai piah lama sum leh paia tanpuitu te zawng zawng chung ah lawmthu kan sawi a ni.

Post a Comment

0 Comments