Covid 19 ( Coronavirus Disease 2019) tihna a ni a, kum 2019 khan China Wuhan City ah a hmasa ber atan mihring ah hmuhchhuah a ni. A natna hi hrik paitu leh a kailo nen a inbiak tawnna, khuh emaw kan tawng laia chil per awm te hi kan bul a mite taksa ah a kai thei a ni.
North - East ah a hmasa ber pawl ni tûrin 24th March, 2020 khan ramri ah screening neih a ni a, hetah hian Mizoram Covid 19 case hmasa ber chu hmuhchhuah a ni.
He hripui vang hian kan sawrkar pawh an che nghal vat a, 19th March, 2020 khan inkharkhipna puangin Inter-State Border leh International Border pawh an khâr nghal vek a ni. Screening nei nghal zung zungin state border ah entry point an siam a, hmun pawimawh hrang hrang zirna in, dawr leh bank te engkim deuh thaw khar vek a ni. Mizo te hi hnam intlawhpawh nuam ti mi in len pawh reng reng kan ni a, kan sakhuana pawh an innghat thui viau hêng tello hian kan hnam nunzia a bo vek thei a ni. HIV natna hrik dotu chak taksa neilo tamna kan ni a fimkhur a tul takzet . He hripui hian min thawng theih awm e hnam tin amaherawh chu keini ang, khawvel ram map ah pawh ram a si per ang chauh nei ve tawk te tan chuan mahni hnam bopil theihna remchang a tam hle . Mizote hi chu mi nuaihsâwm pakhat vel chauh kan ni a, he hripui laka kan inven fimkhur loh chuan mang rup theihna a sâng hle a ni.
Hripui avanga sumdawnna tamtak khâr a ni a factory liante, industry liante, engkim chhek khawlh sa a zova, ramdang bungraw mamawh lût leh chhuak a buai phah viau bawk. Lo neitute an chawl a mi rethei an kûn tlawk tlawk a, ei leh bar haihchham in an awm ang tih hlau leh natna hri tih thlabarin ni an vuiliam a. Hringnun hian thimna thuahhnih an tan a buaitsaih a ni ringawt.
Kum 2021 kan lo chuangkai a state border kan hâwng leh tan a hetah chiah hian active case kan ngah hle tan a ni, 2569 kan kai chhova thi hi mi 34 lai kan tling ta. Inkal pawhna tamzawk kan dang chung hian 2020 kan phalo hle a , Mizo hnam thuawih ti a midangin minlo hriatna kha kan pha lo hle tan in a lang. Kan LLTF te an chau in an lu a hai takzet a, a ngaihna hriat loh chin an ngah contact tracing chhui ngai an tam a kan fimkhur lo hle tih kan result ah a hriat hle. Engkim hi Mizoram chuan kan kei vek ang a ni a, mahni ram thawhchhuah hi kutzungṭang a chhiar tham chauh kan la nei si a. Central chawmhlawm kan ni a Central economy a tlak hniam chuan kan chhe ve tel nghal zêl chu a ni.
Kawng lehlamah chuan he hripui hian Mizote min phuarkhawm in inunau tawnna te, tlawmngaihna te, sem sem dam dam ei bil thi thi kan pi puten minlo chah lawm lawm thin hnan inpumkhatna kha kan chhawm nun phah a ni. Kawngpui te chu reh thuap mahse kan mizo nun hlu tlawmngaihna intin atangin hriattur a awm si, a te leh lian ang khat vek a, a al a thlum kan ei za theihnan hripui leng karah kan sawrkar leh LLTF te a sur a sa in mittin inah dinhmun hniam deuh tan an phe sung sung a. Hmeithai tan pa, fahrah tan nu leh pa an chan hi Mizo nunzia diktak tlawmngaihna nei tu tan lo chuan thawhsen a ni lo. Engkim a sur a sa dovin hnam pasal tha dik tak nunan pholang chiang hle, hei bak bak chu Vanapa leh Khuangchera te pawh khan an tih bik ka ringlo . Mi phal te in phalna a zauva mahni chan ai midang tan a hlan an va tam em.
Kum 1958-60 Mautam hunlai a, Assam sawrkar inbuatsaihna chhiat avanga kan tuar zia hria a he zalenna kan sual chhuah ang chiah hian, mahni hnam tharchhuah hlutna chang hria a ei leh bar a intodelhna kawng sual chhuah duhna hi kan thinlungah intuh sela. Kawngsir a chawhmeh zuar kan kal pel mai mai thin hlutna te, kan pi pute ei leh bar a an intodelh ṭhinzia hlutna te, Pathian faka inkhawm hlutzia I zirchhuak ila.He natna do tur hian Davida ang chauha te nihmahila Pathian leh inpumkhatna kan hmachhuan chuan kan do hneh ngei ang.
"Tihdam aiin inven a tha zawk" tih hi I hre reng ang u.
- C Malsawmkimi
Red house ( Mizo te leh Covid 19)
3rd Prize in Article Writing Competition (Mizo) Organised by Students Union of Govt Aizawl North College, 2021
In Association with - EXPLORE MIZORAM
(Feedback at: admin@exploremizoram.com )
[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]
[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]
EXPLORE MIZORAM
email: admin@exploremizoram.com
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
(Website leh a hnuaia fakna hi lo hmet ve rawh.)
Post a Comment
He post chungchanga i ngaihdan lo sawi ve rawh: