LOVE LETTER: Thinlai luahtu Angaih

 3.Thinlai luahtu Angaih,

Ka tan lawmna siamtu ni lo mah la, ka hmangaih leh duh em che vang talin he lehkha thlawm tak hi min lo chhiar chhuah sak a,min lo tihmualpho sak loh hram ka beisei. 
A hmasa in i lehkha tur ziak thei a hmngaihna min tuksak a, ka nunna derthawng tak min la zuah sak tu Chung Pathian hmingin ka duhsakna sang ber nen kut suih loh chibai ka buk a che. He lehkha tlawm te hi i tan a tling lo tak leh holam tak, ka tana thil pawimawh leh hlu em em ni bawk si hi khawngaiha min lo hlut dersak hram turin i khawngaihna sang ber ka rawn dil hmasa duh bawk che a ni. 

Mite anga tawngkam mawi leh tha ka thiam lohna hian i hmangaihna thinlung
kawngkhar kik hawng se chuan he lehkha hlutna hi a tel tur ka ni ngei ang. I chhiar tur
lek phei chuan ka thei tawpa uluk pawh ka duh, mahse ka tawngkam thiamna leh
theihna in a tlin ngang loh avangin ka thiam ang tawk a ka ziah hi min lo chhiar chhuah
sak hram ang che. 
Mite angin tawngkam thlum, mawi leh nalh tak tak pawh thiam lo mah ila, i lakah chuan
chung zawng zawng chuan awmzia a nei tam pui lovang.Tawngkam thlum leh mawi
mai mai avang a thle tawn mai mai tur hi i nih loh tur zia pawh ka hai lo. 
A zun a uai ka inrin miah lo mi chu nang hi i ni,mahse, engtin nge chiang zawk a, ka
thinlung zawng zawng luahkhattu i nihna hi i lakah hian engtin nge ka pholan ang tih ka
ngaihtuahna avang chuan he tawngkam mawlmang te hi,ka hmusit tlat bawk si.Eng
pawh nise ka phak tawk leh ka thiam ang tawk a ka ziah hi min lo pawmsak ve hram
dawn nia. 
Ka hmangaih che han tih tawp pawh i tan huat thlala a tling ang tih ka hlau bawk
si,mahse he lehkha i chhiar chhan ka thinlung leh ngaihtuahna zawng zawng ka phawrh mualpho dawn a ni si chuan he thu lo hi chu sawi tur ka hre mawlh si lo. Khawngaih takin lo haw lo hram rawh aw. 
I lakah inchhuanna tur leh insawi theihna tur tawng lo mah ila, nang ka tawng che hi ka hlim a, mahse he ka hlimna hian awmzia a neih thei lohzia erawh chu ka hai chuang lo. 
Engmah ni lo chung leh awzia a awm lo tih hre reng chungin hlim hle mah ila hlimna tluantling chang lo tura ka ngaihtuahna ka kawm erawh chuan lungngaihna in ka khat leh thin. Nang ka tawn avang che a ka thinlung a tanga rawn luangchhuak 'hlimna vawrtawp' ka chan mek hi ka phu reng em? Nang ngei hi ka chanpual tura khuanu ruat chu i ni ngei em? tih ka ngaituah thui poh leh ka buai si a nih hi. 
He thu khawvela thu mawi ber 'HMANGAIHNA' hi ka hnen a tang chauh lo pawhin i dawng fo ang tih chu ka hai lo. In sawi theihna ah min lo ngaih sak lo la, kei engmah ni lo pawh hian hmeichhia hnen a tangin ka dawng ve fo tawh thin. Mahse,ka lungdumtu leh ka lawmna famkim min siamsak thei tu erawh tun thleng hian ka la tawng chuang lo. Min hmangaih ve theihna turin eng nge ka tih ang a engtia ka awmin nge i thinlung ka hneh theih ang a, ka chiah zawp theih ang? He ka neihchhun hmangaihna tlawm te hi lawm takin engtinnge ka pawm tir theih ang che? 
Eng ang pawhin ziak kur nasain ziak sei mah ila, i thinlung chhungril hmangaihna sang ber hlawh chhuak tur chuan ka thiamna in a tlin dawn chuan loh avangin i mit ti khamtu leh i tan ninawm mai a chan takin duh tawk phawt mai ang aw. 
Hmangaihna a min rawn chhan leh kher kher zawng ka phut lo che a, mahse i ngaihdan
dik sawina tlak ah min ngaih a nih chuan i chhanna chu ka phut na meuh mai, i
ngaihdan ka lo thlir reng ang. 
A chhiartu mitmeng mawi tak kha a kham palh hlauh ang e.Duh tawk phawt mai
ang.Mangtha le. 
Nangmah hmangaih leh duh em em tu.
Ruata Hmar
Ziaktu:Lalremruata
2nd Semester



3rd Prize -in Love Letter Writing Competition (Mizo) Organised by Students Union of Govt Aizawl North College, 2021

Media partner - EXPLORE MIZORAM




(Feedback at: admin@exploremizoram.com )

[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]




(Website leh a hnuaia fakna hi lo hmet ve rawh.)

Post a Comment

0 Comments