Ticker

10/recent/ticker-posts

INLAMLET A HUN

Bible: Matthaia 21:28-32
 
- Vanlalthansanga
 
Eng nge kan sawi tak ang le? Khawngaihna chu a pun lehzual theih nan sualin kan awm reng dawn em ni? Hnai lo ve. Keini sual kawnga thi tawh sualin engtin nge kan la nun theih cheu vang? - Rom 6:1

pic: Alamy stock photo
 
Fapa pahnih tehkhin thu
Matthaia 21:28-32 ah Fapa pahnih tehkhin thu kan hmu a; Mi tu emaw hian fapa pahnih a neia, grep huanah a fapate pahnih chu hnathawk tura a tirh thu kan hmu a ni. Fapa pakhatna chuan ‘ka duhlo’ a ti a, amaherawh chu a hnuah chuan a kal leh tho a ni. Fapa pahnihna erawh chuan ‘ka kal ange’ a ti a, nimahsela a kal ta si lova. Fapa pakhatna chuan ka kal lovang a ti zet nain, a inlamleta a kalta a ni. Fapa pahnihna thung erawh chu kal kal ang ti siin a kal chuang silo a ni tih kan hria. Fapa pahnihna dinhmun hi tunlai ringtute dinhmun anih hmel hle mai. Min tirtu chu kan hria, thu min petu leh thupek pawh kan hria. Kan kal ang, kan zawm ang kan ti, nimahsela tun thlengin kan hun kan khawhral zel chu a nih ber hi.   
 
Pathian ramah min luhkhalh dawn
Isuan an hnenah, “Tihtak meuhvin ka hrilh a che u, chhiahkhawntute leh nawhchizuartute chuan Pathian ramah an luh khalh dawn che u a nih hi” (Matthaia 21:31) a tih kha. Pathian ram hlat si lo, Pathian rama lut chuang silo hian kan awm ang tih a hlauhawm hle mai. Lehkhaziaktu zinga mi pakhat khan Isua hnenah, “Thupek zawng zawngah eng hi nge ropui ber” tiin a zawt a. Isuan heti hian a chhanga, a tawi zawngin sawi mai ila, “Pathian chu thinlung zawng zawnga hmangaih hi” a ni tiin a chhanga. Tin lehkhaziaktu chuan, “A ni tak e, zirtirtu … i sawi dik zet mai,” a ti a. Tin, fingtakin a chhang tih Isuan a hriatin, a hnenah chuan, “Pathian ram i hlat lo ve,” a ti a. Lehkhaziaktu ang hian Pathian ram hlat silo, Pathiana rama lut chuang bawk si lo hian kan awm ve ang tih a hlauhawm hle a ni.

pic:internet

Ring duh lo khuate
He khawvela Isuan rawng a bawl laia ringduhlo khaw thenkhat ang mai kha kan ni ta. He leia a len laia thilmak a tihna khuaah te khan an ring duh chuang lova, ringduhlo khua te chu a chhuahchhal hial a nih kha. “Korazin i chung a pik e! Bethsaida, i chung a pik e! Nangmahnia thilmak tak tihte kha Tura leh Sidon khuaa tih ni sela, saiip puan sina vut zinga thuin an sim daih tawh ang” (Luka 10:13). “Tin, nang Kapernaum, van thlengin chawimawi i ni dawn em ni? Mitthi khaw thlenga nam thlak asin i nih dawn” (Luka 10:15) a ti hial a ni.
 
Inlamlet a hun
“Johana chu felna kawngah chuan in hnenah a lo kal a, amah chu in ring si lo va; chhiahkhawntute leh nawhchizuarte erawh chuan amah chu an ring a; nangnin chu chu in hmuh hnu pawhin, amah chu in rin theihna turin in inlamlet chuang si lo va.”  Matthaia 21:32. Tun hun hi a ni kan inlamlet hun tur chu. Kan khawvel leh kan hun tawng han thlir hian muanga kan awm a hun tawh lo takzet a ni. Kan hmaah hian eng thil nge lo thleng zel dawn kan hre si lo. “Chutichuan, chung thil lo thleng tur zawng zawng chu pumpelh tlakah leh Mihring Fapa hmaa ding tlaka ruat in nih theihna turin, eng lai pawhin tawngtai chungin ngaihven rawh u,” Luka 21:36.
Post i hmuh dan

Post a Comment

0 Comments