HSLC PASS HNU A ZIRZAWM THEIH LEH THUTLUKNA SIAM

- Sangpuii Chhakchhuak

HSLC result kum tinin MBSE in a lo tichhuak a. Naupang tam takin hlawhtlinna changin a ṭhen  chang ta hrih lo pawh an awm nual ṭhin. Engpawhnise, HSLC hi result hrim hrimah chuan Mizo mipuite ngaihven hlawh leh buaipui a ni. Tun hma chuan HSLC miin a pass hian sawrkar hna awlsam taka thawh theih tam tak a nei ṭhin, tunah erawh chuan chutiang ni chiah lovin HSLC result hi chu admission hmuhna atana ṭangkai leh a ni ber ta zawk.



Mizote hian zirna lama kan hnufualna em em pakhat chu ‘Career guidance’ ṭha kan neih lohna hi a ni a. A ti ṭha apiangin science lak tumna leh a ti ṭha lo deuhvin  Arts la tura in dahna rilru kan pu ṭhin. Hei hi a chhan ni bera lang chu in hrilh hriatna ṭha kan neih loh vang a ni. Mi tam takin stream (zir bik) an thlan emaw an fate an thlan sak hian anmahni tuina emaw thiam lam ngaihtuah lovin ṭha tura an ngaih lam an awn pui fo. Nimahsela heng stream thlante hian damchhung kawng hrang hrangin a nghawng a ni tih erawh kan ngaihtuah thleng lo fo. India ramah phei chuan mi tam zawk hian an fate science  la ngei ngei turin an nawr a, stream dangte hi science a beidawngte kalna tur ang hiala dah an awm ṭhin. Nimahsela thu dik chu hei hi a ni. Mihring hi in ang lova siam kan ni a, kan ngaih pawimawh zawk a in ang lo ang bawk hian kan tuina leh kan thiamna pawh hi a in ang lo a ni. Subject/stream ṭha ber a awm lova, nimahsela mihring mimal tin erawhin kan kalna tur awm kan nei ṭheuh thung. Chu kan kalna tur chu HSLC pass hlim naupang tam zawk hian hrethiam lovin, nu leh pa suk thlekna lam leh tu emaw hrilh lam an awn ringawt mai zel a ni.

Ram tin hian Basic education, subject zawng zawng zir vek ngaihna chin an nei vek a. India ramah pawh tuna kan kalpui mek zirphung chu NPE 1986 (National Policy of Education 1986) in a lo ken 10+2+3 a ni. A awmzia chu ‘Basic education’ India rama kalpui mekah hian kum 10 chhung (HSLC) thleng subject zawng zawng zir tur niin, a bak ‘2’ hi class 11&12 emaw a dang (kum hnih chhung zir) leh ‘3’ khi higher secondary leh graduate level a ni. Hengah te hian naupangin an duh subject an lak theihna stage a lo ni ta. A aia chung lehte chu masters degree leh a dangte an ni  thung. Tichuan naupangin subject thiam loh bik lo nei pawh nise pawl 10 a nih thleng chuan ‘Basic education’ hi a zir a ngai a, HSLC hi a pass chhuah ngei ngaiin, a hnu lamah hian a duh subject/stream a zir bik duh chu a lo thlang thei ta a ni.

Tichuan he duhthlanna hian zirlai nun thui tak a nghawng thei a, a damchhunga nuam ti taka lehkha a zirna te emaw ni tin maia hreh taka class a kal ṭhinna turte, a lo puitlin hnu a hna nuam ti taka  a thawhna turte leh a hna bansan chak ngawih ngawih reng a a awm phah theihna tur a hril ta tlat mai! Mi thiam ten an sawi dan chuan naupang za zela sawmthum vel chauh hian an zirchhuah huna an hna thawh duh dik takte leh an tuina an hria an ti. Chuvang chuan nu leh pate hian uluk lehzuala naupang stream thlan turte kan ngaihtuah pui a ngai. Ram changkang angin career guidance councelling (ram dangah chuan a darker bi a sum sen turte awmin, mithiamte rawn tur an awm ṭhin) mumal takin kan nei lo na a, keimahni tawka kan lo inzir a, kan lo in enfiah ve a ngai a ni. Naupang hlawhtlin leh hlawhchham hril thei thuthlukna a ni tih hre reng ang u.

A hnuaiah hian he thuthlukna kan siam theihna tura min pui thei thil chi hrang hrang dah a ni a, kim biaiin sawi thei lo mah ila, kan tarlan theih chin hi kan hlawkpui ngei a beiseiawm.

1. Mahni inhriatchian:
 HSLC pass tawh hnuah chuan rilru zawng zawng senga mahni inhriatchian tum a ṭha. Inhriatchian kan tih hian kawng tam tak a kawk thei ang a, a pawimawh ber chu eng subject ah naupang a chak lohva eng subject ah nge a chak tih in zawh a ngai. Hemi tur hian kan tih theih hmasa chu list siam a, heng a hnuai amite hi ziah chhuah a ṭha:
(1) Subject zir zawm châk.
(2)  Subject thlauh thlak duh
(3)  Subject zir zawm emaw thlauh thlak duh hriatthiam loh
 Point 3 na, thuthlukna siam theih chiah loh, duh leh duh loh inkara mite bik tan hian heng zawhna hi zawh leh ṭha:
• Chu subject chu nuam a ti tak tak em?
• A aia nasa a zirin, midang ṭanpuina nen tun aiin chu subject ah chuan hma a sawn thei ang em?
• Chu subject zirna atan chuan naupangin a hun pek nasat a in huam em?
 
2. Stream (zir bikna) in a ken tel hrang hrang hriat
 Stream Mizorama kan hriat theihte chu Arts, Science, Commerce te an ni a, vocational subjects school a zirin optional a lâk theih a ni bawk. Heng pathum aṭang hian naupangin a zir zawm tur a thlang tlangpui. Kim biaia sawi theih loh mah ni se, heng stream te hian an ken tel subject te leh career option (hna thlan theih) te han tarlang ila.

Science:
 Science stream in a ken tel subject ah hian Physics leh Chemistry hi lak ngei ngei ngai an ni. Tichuan hei bakah hian Mathematics emaw Biology thlan theih a ni a, kawng hrang daih a kawk na in a pahnih pawh hian a thlan theih a ni. Tichuan a school in a offer a zirin Computer Science leh Mizote pawh a thlan tel theih. Science aṭanga career luh theih tlang lawnah chuan medicine lamte leh engineering lam a langsar a, tin a subject bil a zirin general studies (B.Sc, M.Sc, etc) a chhunzawm theih a, teaching lamah a kal theih bawk.
 Science atang hian stream dangah duh chuan college level aṭangin a in leh theih a ni.

Commerce:
 Commerce stream in a ken tel subject te chu Business studies, Economics, Accounts te an ni a. Mathematics hi thlan theihin a awm thung. A career option langsar zualte ah chuan, Finance accounting lamte, Banking lamte, teaching  leh Entrepreneurship lamte a tel a. Sumdawn tum tan a ṭangkai em em a ni.
 Commerce stream aṭang hian Science lam tih lovah chuan a pakai theih a ni.

Arts:
 Arts subject in a ken tel subject te chu History, Geography, Psychology, Sociology leh Political Science ten a ni a. School a zirin subject hrang hrang mathematics, economics and marketing, logic tih te hi thlan theih a awm ṭhin. Career thlan theih langsarah chuan Mass Communication te, Journalism, Writing, teaching te an ni a.
 Arts aṭang hian stream dangah a in leh theih lova, nimahsela Economics leh mathematics an lo la a nih chuan, bachelor ah Commerce an la thei thung.
 Tin, heng stream hrang hrang aṭangte hian competitive exams erawh a pek theih deuh vek a ni.
 
 Vocational:
 Mizoramah hian vocational subject lâk theihna hi school 5 bawr vel a awm a, heng school ah te hian Information Technology & Infromation Technology Enabled Services, Apparel makeup and Homefurnishing, Automobile Engineering, Sericulture leh Lab Technician te hi a school a zirin a zir theih a, optional subject anga lâk theih an ni.

3. Subject hriatchian lohte zir chian
 Stream hrang hrangin a ken tel subject kan tarlan tâkte kan hre ta bawk a, kan duh stream kan thlan hma in heng subject HSLC china kan la hmelhriat chiah lo, Psychology te, economics leh a dangte hian eng lam nge a kawh a, eng chiah nge heng subject ah te hian awm a lo zir tawhte aṭangin emaw mahni pawhin kan zirchiang tur a ni. Hei hian kan stream thlan a kan tui leh  tui loh tur a hril a, a pawimawh em em a ni.

4. Hnathawh duh leh thawh châk thlan
 He point hi pawimawh em em mai a ni. Tleirawlte duhthusamah chuan hna ṭha deuh neiha hausak châkna a lian thei hle. Tunge duh lo bik ang? Nimahsela kan hriat tur chu hna ṭha taka thawk a ei hmu tur chuan kan hna ah kan tui tawk ve a ngai. Doctor nih naupangin a châk anih chuan a châk chhan leh doctor hna in a ken tel duty hrang hrangte, tin doctor ni tura zir tur leh lehkha zirna atana hun pek ngaite a hriat a ngai. Bank manager ni duh emaw, MCS ni duh emaw pawh nise chutiang zelin. Entrepreneur nih tum chuan eng lam hawiin nge hmalak a duh ang a mahni a hma la turin a hun a pe thei nag em tihte a ngaihtuah a ngai. A awmzia chu eng hna nge kan ṭhawh duh tih ngaihtuah a, chu hna thleng tura zir tur subject te chu ka tui em tih in zawh a, tin, eng nge chu hna chuan a ṭhawh ber tih hi n zawh a ngai. Chumi hnuah chuan chutiang hna thlen theitu stream chu thlan chauh a ṭha a ni.

5. Thuthlukna siam tura hmalak
 Heng stream hrang hrang aṭanga duh thlang tur chuan tunlai chhanah mahni pawhin hma  alk theih a ni. Eng stream a kal tur chi nge ka nih tih hre tur pawh hian test hrang hrang ‘Online test’ a awm a. Tin, mithiamte leh zirtirtute pawh râwn ṭhin a ṭha. Kan subject zir tur hrechianga kan tuina lam a ni em tih kan in zawh a ngai.

 Engpawh zir dawn ila, hlawhtling tur chuan taimak  a ngai. Mahni tuina taka kalte pawh hlawhtling tur chuan an taima tho a ni. Nimahsela, ṭha nia ngaih ngawt lama kal hian a laklawha chawlhsan duhna leh hlawhchhamna a thlen thei. ṭha taka HSLC pass a, science stream a beidawng  si, Arts a inlet ta, Mizoram puma HSSLC a pakhatna hial nite pawh an awm. Mahni tuizawng leh thiam lam thlang lote chu lo inzir chhuak pawh nise, tui si loh chuan nitin mai hian tih tur a nih avang ringawta hnaṭhawh a awm thei a, hei hian puitlingah pawh depression a thlen thei a ni. An zirtur uluk taka thlang a, an hna tui chilh tam takte erawh nuam ti takin an duhzawng an ti a, tichuan an duhzawng ti pahin sum a lo lut ve chauh a ni ṭhin.

Post a Comment

He post chungchanga i ngaihdan lo sawi ve rawh:

Previous Post Next Post