Hnam ropuite u, tho r'u le XIX

- Lalhruaitluanga Chawngte

A la rei lo - a kum zawnga chhut chuan hman ni mai kha a ni; mahse Covid-19 hrilengin khawvel a nuai lingleh nasat em avanga kan nunkhua a lingleh nasatzia ngaihtuah hi chuan, a rei tawh hmel!

Mahni mihringpuite hlata awm a la ngai lo a, innek leh innawk kha hri kaina a la ni lo. Hmai tuam kher tur a la ni lo a, hmai han tuam kha thuawih tihna ni lovin rukru tur tihna te pawh a la ni zawk ang, chung lai chuan. Mahse hman ni mai kha a ni.

India sorkarin Rs 500 note leh 1000 note a tithi thut a, Covid-19 hrilen hmaa thawklehkhata min nuai bingbilenglailet nasatu hnuhnung a ni mai thei, kha thil kha. A hun lai chuan ngaihțhat lohna tham a tling a, chi-aina tham pawh a ni ang.

Chutiang hunah chuan zumzuk ang reng tak, mahse zumzuk anga lan tum bik lo tak siin State Bank of India Aizawl (Main) Branch-ah hian ka lut ve a, lut ve fo, bank dawr ve fo te pawh ka ang mai thei. Mahse bank dawr tura kal ka ni lo a, an hotute kawm (interview) tura kal ka ni.

A chhung chu, luh tirh ațangin, ni lo, luh hma ațangin a ni, a kawt leh a piah vel thlengin mawle, mi an lo khat dul mai a, Inrinni tuk bazar emaw tih hial tham a ni. 

Chutiang karah chuan ka inzep a, pindan pakhat, a thawkte min kawhhmuh, an assistant general manager țhutna chu eng tin tin emaw ka thleng ta hlawl a.

Pa fel tak a ni ang, biak a nuam khawp mai, kha mi kha, Pu Pradip Kumar Sen kha.

Biak nuam viau e ti lo chuan ka biak loh dan zawngin min kalpui tlat a, ka chan loh lam zawk a sawi leh țhin. Ka zawh avangin pawisa note tihthih leh a chhehvel te chu han sawi ve bawk mah se, he hnam chanchin bawk hi a hrut leh țhin a, 'demonitisation' leh pawisa note thar rawn thlen hun tur te chu han sawi ve țhin bawk mah se Zofate nun mawi a tihzia leh ropui a tih thu-ah bawk a lut leh țhin, chutiang ka zawt tawp si lo!

Pawisa note tihthih a nih lai, ni tin khawsak a nghawng laia bank lian ber hotu pawimawh interview ve lem, tuin nge 'Kan hnam hi min ngaisang em?' ti nulh nulh ang? Mahse Pu Sen-a khan khatiang lam kha a nger tlat a, amaha thil khatliam kha a rawn bua ni ber hian ka hria!

Chung lai chuan mipuiin bank an bawr nasa a, bank hotute sawi danin, a hmaa ni khata mi 400 velin an dawr țhin kha, a let fein an pung a, a sang tel teh meuh meuh an ni tawh. Chung mipuite awm dan chu a ni Pu Sen-a'n a sawi ban theih loh chu ni!

"Bank khat tlata mipui an awm pawhin an bengchheng lo a, an innek hek lo a. Ṭha takin an nghak mai a. Mizote awm dan hi a mak ka ti hial zawk," a ti a, "Pawisa neih loh hlauva bank-a kalkhawmte 'peaceful' taka an awm thei kha a ropui ka ti," a ti bawk a.

An bank dawrtu an pun hluai thu a sawi a, sawi lo mah se ka hmu ve reng; mahse a hmuh danin ka lo hmu ve lo a ni ang, ka kal pelh mai maite kha "... Chuti khawpa mipui an țhahnem chung chuan mawi takin an awm thei a, mahni hun an nghak mai a, Mizote hi ka fak lutuk," a ti.

Mipui kha chuhhelh lo hi a ti em em mai a, an khu hluai lo leh an  chi-ai lo te, mi khati zat pungkhawm an ri nuai nuai lo te kha mak a ti. "In cool..." min ti leh țhin.

Khatia thil a'n inlumlet thutah khan, bank lam khan anmahni dawrtute kha an duhsak em vang ni miah lovin an dawn tur aia tam an pe leh hnawk țhin! Mahse chutiangah pawh chuan a dawngtute khan an pe kir leh thlap zel a, bank an chhuahsan hnua hrechhuak, bank lamin an hrechhuak miah lo chunga va dah let leh vang vang te, a tuka kal țha leh ngat te an awm tih te kha chu Pu Sen-a chauh ni lovin mi dang pawh khan an sawi.

Chung chu a la rei lo ka tih kha. History-a mite chanchin a nih loh chu aw, ka unaute u!

Pic: #John_Chhana