Health Minister hovin inkhuahkhirhna kalpui mek thlirho; SEC-in a ṭul angin July 1 aṭanga hman tur SOP buatsaih dawn


Aizawl | June 26, 2021: Nimin khan SAD Conference Hall, MINECO ah Mizorama COVID-19 inkhuahkhirhna kalpui mek thlirho a ni a, he hun hi Health & Family Welfare Minister Dr. R. Lalthangliana'n kaihruaiin, DM&R Minister Pu Lalchamliana, MOT Chairman Dr. ZR Thiamsanga, MLA, AMC Dy. Mayor Pu R. Thanglura, Chief Secretary Pu Lalnunmawia Chuaungo, bakah COVID-19 dona kawnga hmalatu department hrang hrang hotute, Indian Medical Association, Medical Operational Team, Jt. NGO Coordination Committee leh Mizoram Kohhran Hruaitute Committee (MKHC), Local Task Force aiawhte an tel.



Nimin thlirhonaah hian june ni 30, 2021 zing dar 4:00 thlenga hman tur SOP kalpui lai mek sawiho a ni a, ngaihdan leh rawtna hrang hrang sawiho niin State Executive Committee on State Disaster Management Authority in a tul angin July ni 1, 2021 atanga hman tur SOP an buatsaih ang.

Vaccine pekchhuah runpui kalpui mek chungchang report ngaihthlak niin june ni 24, 2021 thleng khan Vaccine dose 513641 pekchhuah tawh niin, vaccine full dose la tawh mi 53960 an awm a ni. Vaccin epek chhuah kawngah theihtawpa hmalak niin kum 45 chunglamte first dose pekchhuah tawh zatn hi india ram pumah 43% a nih laiin Mizoramah chuan 76% a ni a. Kum 18 – 44 inkarte vaccine pekchhuah tawh zat hi India ramah 11% a nih laiin Mizoramah chuan 41% a ni.
Vaccine second dose la turte pekchhuah tur stock a awm that thu pawh tarlan niin hlauhthawn tur a awm loh thu sawi a ni.
COVID-19 hri kai zinga a na zualte enkawlna hmun Zoram Medical College-ah COVID-19 positive mi 1342 admit tawh niin, chawhrualin damlo 1 hi ni 11 chhung enkawl ang an ni a, enkawl rei ber chu ni 63 chhung admit a ni. Damlo admit zinga 83.5% hi kum 18 – 59 inkar an ni a, CT scan tih sak mi 535 zinga 30% chu COVID pneumonia vei an ni. Damlo admit zinga 18% hi ICU a dahluh ngai an ni a, admit ruala ICU a dahluh nghal ngai hi 12% an ni. Admit hnua ICU a dah ngaite hi admit an nih atanga ni 6 ral hmaa dahluh deuh vek an ni bawk. ICU a dahluh zinga 77% hian natna benvawn an nei a ni. Naupang 66 admit an ni tawh a, a tam ber hi kum 1 leh a hnuai lam niin, chawhrualin ni 10 chhung vel enkawl an ni.
Medical operational Team leh ICT department in contact tracing software an buatsaih chu a tha tawka hriat niin hman thuai tura tih a nib a, hei hian contact tracing khawihtu police te leh LTF te nasa taka a chhawk zangkhai beisei a ni.
Meetingah hian dawr hawn chungchang kalpui zel dan turte, Containment zone puanna hmuna hmalak chhunzawm zel dan turte bakah sample test a tam zawka kalpui theih dan turte leh thil pawimawh dang tamtak sawiho a ni.

Post a Comment

0 Comments