COVID-19 : Saron veng-ah test runpui nei; Sorkar mawnghlimna mai a ni - BJP Mizoram

Aizawl | June 15, 2021: Vawiin June 15, YMA Day pualin Mizorama Covid hrivei tamna ber Saron Venga Containment Area a chengte tan Covid Test runpui neih a ni.

He Test runpui hi Bialtu Minister Pu Robert Romawia Royte rawtna leh Health Department hriatpuinain  BN Hospital, Kulikawn ten an kalpui a. Saron Veng LLTF ten a tul angin an puibawm  a ni.

Pu Robert Romawia chuan “Saron Vengin mi bakin Covid hripui an tuar a, inchhan chhuah nan pawh mi baka chet a tul tih sawiin Health Minister leh Health Department te pawhin Test Runpui neih hi tha an tihpui angin LLTF te nen tangrualin Test Runpui hi buatsaih a ni, a ti a.

Covid hripui dona kawnga Mizoram sorkar hmalakna leh a insenso tam bik dan te, a chet that leh that loh hre tur chuan State dangten Covid hrivei an enkawl dan leh an inenkawlna atana an sorkar insen dan zirchianin a hriat a ni, Pu Roberta chuan a ti a. Aizawl East-II bialah hripui a tam rih a, mahse vengtin tanrualna a tha in he hripui hi Pathian zarah kan la do hneh ngei ang a ti a. Saron Venga Covid Test Runpui a hlawhtlin dan azirin Aizawl East-II veng danga containment zone ah te pawh chhunzawm a nih tur thu a sawi bawk.

Function zawh hnua Press mite zawhna chhangin ICT Minister Pu Roberta chuan “Urban Ministry chuan kan rawt angin DRDO kaltlangin Oxygen Plant lian chi 13 zet min pek an tum a. Aizawl Districtah 3 leh District Hqrs dang 10 ah heng Oxygen Plant te hi DRDO in a rawn bun thuai dawn niin Urban Ministry a Director in telephone a rawn hrilh thu leh approved list pawh a rawn thawn tih a sawi a. He project hi Health Department te nena sawiho a nih tawh thu a tarlang a ni.

Pu Robert Romawia hian Tata Trusts atangin niminah Oxygen Concentrators 11 leh Accessories a dawn thar chu a mamawh zualna hmunah semchhuah tura enfel mek a nih thu a sawi a. YMA Day chibai buk nan a biala Veng 7 ah Rs 10,000/- theuh a sem a. Aizawl South-I biala LLTF 7 te leh 4C tepawh YMA Day chibai buk nan Rs 10,000/- theuh MNF Aizawl South-I Block kaltlangin a hlan bawk a ni.

He thilah hian BJP Mizoram Pradesh chuan thuchhuah suamin, "Sports Minister Pu Robert Romawia Royte in, a bial chhunga Covid hrivei endikna tur a a hmalak dan chuan, Mizoram Sorkar Health Department lam chak loh zia leh nep zia a tilang chiang hle a, Sorkar anga an tih theihloh amimal in a buaipui hi a lawmawm rualin, Sorkar mawnghlimna mai a nih zia alang chiang hle a ni," an ti.

"Tunlaia hri kai tamna veng Saron Veng te tan a, YMA Day denchhena Pu Robert Romawia Royte in Saron Veng chhung ah hripui vei an awm dan enfiah tura a hmalakna hi kan lawmpui a, hetiang ang chiah hian Sorkar hian hma la sela, tuna hri inkai chhawnna tamtak chu chhutchah anih ngei a rinawm a ni." an ti a.

"Tuna hri darh dan en hian Lockdown vang mai a chhut chah theih a nih hmel ta lova,  Mizoram sawrkar hian Health Department hi chak taka a thuam a tul a, thawktu pawh a tul anga lakbelh hial pawh a pawimawh awm e." tiin, "Thla hnih dawn Lockdown kalpui a nih hnu ah pawh heti khawp a hri ala pung leh, an kaina chin hriat hleihtheih loh a tam tak dan ah hian, hri hi a darh nasa tawh hle tih ahriat a, Random test hi kalpui ngei nise tih chu BJP Mizoram Pradesh ngaihdan a nih thu an thuchhuah chuan an tarlang a.

"a enkawl dan tur pawh Khawtlang, Kohhran leh mipuite inpekna na zarah Sorkar hian sum aneih loh pawn hma alak theih ngei a rinawm a, ruahmanna fel a awm theih ngei BJP Mizoram chuan kan ring tlat a ni." an ti bawk.