ZMC lab-a thawk staff te zingah COVID-19 positive an awm avanga harsatna tawh mek chungchangah ZMC Director-in mipui hriatthiamna a ngen

Aizawl | May 19, 2021: Zoram Medical College (ZMC) lab-a thawk staff te zingah COVID-19 positive an awm leh avanga harsatna an tawh dan thuchhuah siamin ZMC Director Dr John Zohmingthanga chuan hetiang hian a sawifiah:-

COVID-19 Laboratory (VRDL) a thawktu staff pakhat 18.05.21 khan COVID-19 hri a kai tih hmuhchhuah a nih avangin vawiin chhun atangin laboratory tihfai leh then thianghlim a tul a. Loh theihlohin vawiin nileng hian laboratory khar a ni a, tlai dar 6 atanga dar 7 bawrah hna thawh tan leh theih beisei a ni.

May ni 7 atanga May ni 11 inkarah khan VRDL staff te zingah COVID-19 positive 3 an awm avangin May ni 12 atang khan khar a lo ni tawh a. Staff thawk lai mi 19 te chu an vaiin quarantine zui an ni a. An aiawh hian back-up team te chuan May ni 13 atang khan sample test hna hi an thawk chhunzawm nghal a. Amaherawhchu, vanduaithlak takin back-up team te zingah positive hmuhchhuah a lo nih leh tak avangin vawiin atang hian an vaiin quarantine tan an ni.

Hetiang dinhmuna ZMC a din tak avang leh sample test tur a tam chhoh em avangin test loh (backlog) sang tel a awm mek a, report pek theih hun pawh a tlai chho lo thei lo a ni. Tluang taka Covid Lab (VRDL) a kal zel theih nan theihtawpin ZMC chuan tan an la a, heng harsatna avanga report a tlai hi pawi an tih takzet thu ZMC Director chuan a thuchhuahah hian a tarlang a ni.

- DIPR