TLAI NI ÊNG MAWI

 



— Centenary C. Lalzahawma
Columnist, Explore Mizoram


          “In nunna chu engnge ni? Chhum rei lo tê lo lang a, ral leh ta mai ṭhîn ang hi in ni si a.” — (Jakoba 4:14)


          Mihringte nunna chu engnge ni? Chhum rei lo tê lo langa ral leh ta mai ṭhîn ang hi a ni. Rei lo tê atâna mawi tak ni tûra Siamtu'n a siam, minute chu sawi loh, second khat lek pawh kan duh thua ko kîr thei kan awm lo. Khawvêla Scientist ropui tak tak te pawn kum tam tak chhûnga thil thar leh thil mak tam tak an hmuh chhuah theih laiin, second khat lek pawh an ko kîrin, hun ngaiah an dah lêt thei bîk lo! Pathianin ama anpuia a siam lei mihringte hi thil siam dangte lakah chuan kan ropui ngei mai, mahse, Siamtu [Pathian] lakah hi chuan kan ropuina a va nêp si êm!

          Mi zawng zawngte hi chhan ṭha tak tak neiin min siam a. Tin, tute mai pawh hi a hun lai a zir zêla ropui tak ni tûra a siamte kan ni. Mihringte ngaiha mi ropui tak tak te leh mihringte ngaiha engmah lo anga mite ngaih pawh hi Siamtu ngaih chuan ang khat vek kan ni. Tumah ropui bîk kan awm lo. Sual saa piang ṭheuh ṭheuh, saruak leh kut ruaka piang ṭheuh ṭheuh, kut ruak vêka lei vaivuta kîr leh tûr ṭheuh ṭheuh kan ni. A pawimawh ber chu, a mi siam dâna lungawina nun neih hi a ni.

          Naupang pakhat chu saihlum tam tak nên Sava veh tûrin ramah a kal a. Sava chi hrang hrang, rawng chi hrang hrang a perh tla ṭeuh mai a. Meia a rawh hma zawng an rawng nalh dân a inang lo hle mai a, meia a rawh zawh meuh chuan an nihna hriltu ber an Sava rawng chu a bo a, rawng pakhat inṭawmin 'rawng dum' ṭhiau-ah an lo chang ta a. Tin, naupang dang pakhat erawh chu luiah a kal a, Kaikuang ṭhahnem tak a man a, chûng a Kaikuang man te chu a rêp ta ṭeuhva. A rêp hma zawng chuan chûng Kaikuangte chu a dum te, a vâr lam deuh te an ni. Mahse, a rêp zawh meuh chuan rawng pakhat inṭawmin 'rawng sen' ṭhiau-ah an lo chang ta a. Mihringte pawh hi hêng Savate leh Kaikuangte ang chauh hi kan ni, kan dam laiin kan nihna, dinhmun, khawsakzia, thiamna leh adangte inang lo tak tak nei mah ila, kan hun a liam a, thihnain kan chungah ro a rêl meuh chuan tumah kan danglam thei tawh lo. I ral dâwn, ka ral dâwn, inchhuang thei i ni lo, inchhuang thei ka ni lo! Rei lo tê atâna Siamtu'n a duan leh a siam chu, rei tak a daih ring suh. 

          Hun râlmuangah pawh tlâwm taka an nun laiin, hun râlmuang loah phei chuan tlâwm taka nung tûr kan lo ni, mi zawng zawngte hi! Kan hma lam hun kan hre lo. 'Kan la ral ngei dâwn engtik nîah emaw chuan' tih chauh loh chu! Tlai ni tla tûrin a bul vêla thing leh mau te, râlkhata tlâng mawi tak tak te leh tlâng leh tlâng inkâra luite tui luang te chu a kâp sen riaî mai a. Vawi leh khatah thil siam aṭânga a siam leh chhâwn, Camera chi tinrêng mai chu a thil siamte hmuh tûr vêka pho chhuak leh tûrin tlai ni tla tûr lam chu tinin an hmet de chuai chuai mai a! Thil siam mawina phênah Siamtu themthiamzia a lang a. Siamtu mawina pho chhuaktute hi an thil siamte vêk an ni ṭhîn tih hi hai rual a ni lo.

          Rei lo tê atân mawi takin kha tlai ni tla mai tûr kha a êng a, a mawina kha ama tân chauh a ni lo, mite hmuh theih tûrin mawi takin a êng chhuak a, mite tân hlimna a thlen a ni. Rei lo tê atân Siamtu'n mihringte pawh hi min siam a, kan dam chhûng tawi têah hian kan thiamna neih te, mahni tân chauhva hmang mai lovin, midangte tân hmanga, nî êng anga êng chhuak ve thei tûrin i inbuatsaih thar zêl ang u.

Post a Comment

0 Comments