State tam takah May 1 atangin kum 18 leh 44 inkar hri danna pek kalpui thei dawn lo

Aizawl | May 1, 2021: India ram pum-ah May 1 atanga Kum 18 leh kum 44 inkarte hri danna pek tura ruahman chu hri danna siamtu SII lamin a daih tawk an siam theih loh vangin state tam takah vawiin atangin kalpui theih a ni dawn lo.

Hri danna pek kalpui thei lo tur zingah hian Mizoram state pawh a tel niin thu dawn a ni.

Nimina Health minister Dr R Lalthangliana hova thukhawm-ah Vaccine chungchang report ngaihthlak niin nimin thleng khan vaccine dose 2,99,870 Mizoramin a dawng tawh a, nimin khan dose 1,00,000 a rawn thlen belh leh a ni.

Vaccine dose 2,46,478 pekchhuah tawh niin, mi  45,435 in vaccine second dose an la tawh a ni. Sawrkar laipui record danin Mizorama kum 45 chin chunglam zinga 54.29% hnenah COVID-19 vaccine hi pek tawh a ni tawh a, India ram puma kum 45 chunglam hnenah pekchhuah zat chu 29.73% a ni thung.

Sawrkar laipuiin May ni 1, 2021 atanga kum 18-44 inkar vaccine pek tur a tih chungchanga hmalakna tarlan niin,  H&FW department Special Secretary-in COVISHIELD siam chhuaktu Serum Institute Pvt. Ltd., hnenah kum 18-44 inkar tan vaccine dose nuaih 10.22 Mizoramin a mamawh thu a thlen tawh a, hei hi Serum Institute Pvt. Ltd., chuan rawn chhang let tawhin kar 4 chhungin an rawn tihchian theih an inbeisei thu an sawi a, Mizoramin dose a mamawh zat chu thla 3-4 chhunga mamawh dan azira a tahtawl deuh hleka pek chhuah tura ruahmanna siam turin an rawn hriattir a ni.

Hetih lai hian sawrkar laipuia  Ministry of Health & Family Welfare hotute chuan vaccine siamtute nen an inbiak rem hnuah Mizorama a bul tan nan (kum 18-44 tan) COVISHIELD vaccine dose 16,340 lo dah hrang turin an tih thu an rawn sawi a, vaccine man hi Mizoram sawrkarin a pek tur a nih vangin a siamtute nen indawrna kalpui mek a ni.

Tarlan tawh thin angin kum 18-44 inkar te hnena vaccine pek tur hi State sawrkarin an lei vek a ngai tawh dawn a, vaccine siamtuten mamawh ang zat an siam chhuah theih loh avangin State tam takin May ni 1 atangin an kalpui thei dawn lo a ni. Vaccine dose khat man hi Serum Institute hian an rawn tihniam leh tawh a, dose khat zelah Rs. 300 (GST tel lovin) chawi a ngai dawn a ni.

- DIPR