Sports minister-in a bial chhunga hripui do nan leh harsatna tawkte tan nuai 10 ruahman

 Aizawl, 8th May, 2021 :Aizawl khawpui chhunga Covid kai tamna zinga mi Aizawl East-II bialtu MLA leh Sports Minister ni bawk Pu Robert Romawia Royte chuan a bial Aizawl East-II veng hrang hrangah Covid hripui kai an pun zel avanga  Chite Veng, Armed Veng leh Armed Veng South khawtlang hruaituten an dinthar, Chite Horticultre Centre a 4C(CCCC) leh Chhinga Veng LLTF ten an din thar, Govt. KVM High School a CCCC te chu vawiin khan a tlawh a.  Heng Centre enkawlna atana thil țul mamawh te LTTF te nen an sawiho a ni.




Minister chuan heng Centre 2 te hi inspection an paltlang hnuah Aizawl DC in dinna Order a tichhuak tawh a. Heng Centre a awm ten Healthcare Scheme hnuaia tanpuina an dawn ve theih nan Health Department pawmpuina dil mek ani tih a sawi.
Sports Minister chuan tun ang hripui karah chuan dam khawchhuah tlan a pawimawh ber tih sawiin hripui laka him turin Sorkarin inkaihhruaina a siamte tha taka zawm turin LLTF te kaltlangin mipuite a chah nawn leh a. Mizoram Sorkarin Covid veite harsatna leh mamawhna hriaa mi pakhat tan Rs 2,00,000/-thleng Sorkar pawmpui covid enkawlnaa inenkawlna senso an bill thei chu lawmawm a tih thu a sawi a.State dang sorkarin Covid hriveite an enkawl dan leh Mizoram sorkarin a enkawl dan chu a inanglo hle a ni a ti.Covid do chungchanga Chief Minister leh Health Minister hmalakna ropui a tih thu sawiin Pu Roberta chuan Sorkar Department hrang hrang, Kohhran, tlawmngai pawlte leh mipui tanhona pawh India ram pum huap pawha chhuan tham a tling a ni a ti a. Kum 18 leh kum 44 inkar mi nuai 5  chuang te tana covid vaccine a thlawna Sorkarin a pe tur pawh hi state tam zawkte thutlukna la siam theihlohna a ni a ti.
     Aizawl East-II bialtu MLA Pu Robert Romawia chuan a bial chu dawrkai leh nitina bazara eizawng tamna a nih avangin Lockdown leh a kaihhnawih harsatnate an tuar nasa hle tih a sawi a. A MLA Fund atangin Covid hri lo leng thar leh (covid 2nd wave) do nan leh mi harsa zualten ei leh in an tlakchham loh nan Rs 10,00,000/-(Cheng Nuai Sawm) a ruahman thar tih a sawi a, a hman tangkai dan tur chu Vengtin LLTF hotute nen sawiho tur thu a sawi. Sports Minister Pu Robert Romawia chuan a bial mipuite chu thlaphang lova awm tura chahin MLA dangte ang bawkin a bial chhungah chhuanchham an awmloh nan tan a la zel dawn tih a sawi bawk.

- DIPR

Post a Comment

0 Comments